Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

خسارة يا برقة والله

يا خسارة ويا الف خسارة, ياخسارة ضاعت الامارة !
وفوق الاماره سرقة بترولك وقتلة ضناك وعويلك وخيبة رجاك وتقتيل رجاجيلك ؟
خسارة وعليك خلطة يابرقه !
عليك خلطة خلطتنا مع الطرابلسية والله يسامح اللي كان السبب فيها وخلاص !
هالخلطة الزورة والعورة اللي خششونا فيها ابهاتنا الله يسامحهم وانتهت بحكم هالغرباوي والسرتاوي المعفن اللي ذل برقة وهلها وسرق بترولنا وقتل ضنانا في تشاد وفي معتقلات اطرابلس الغرب ؟ ولو شفتم المساجين والمعدومين وضحايا بو سليم تلقى الاغلبية من برقة مع ان عدد سكان الغرب ضعف سكان الشرق؟
يعني لو كانوا ابهاتنا الله يسمحهم بدل مايخششونا في هالخليطة الفاشلة والتشاركية الجربه مع طرابلس خلونا في حالنا واستقلالنا وفي خيرنا وبترولنا في امارة برقة العربية رانا توه والله اليوم في عالم آخر مختلف 180 درجة عن هالزريبة المعفنة - حاشا خشومكم - اللي قاعدين توه نحن البرقاويه انتعايطوا فيها ونصايحوا بين المعيز والضان والإبل والبقر وانداعكوا على العلفه المضروبه والميه المالحة ؟
يعني لو كانوا ابهاتنا واجدادنا البرقاويين - الله يسامحهم - خلونا في حالنا واستقلالنا وبترولنا رانا والله توه في عز ولا عز دولة قطر والا دولة الإمارات والا على الاقل كيف دولة الكويت وراهو عندنا فوق العز والرز والوز حرية صحافة وتعبير واعلام وفن وديموقراطية على الاقل كيف ما في الكويت !
أيش هالخلطة البايخة يا سبحان الله ؟ ايش زرنا عليها الشفاعة يارسول الله ؟
ومن صاحب هالراي الاجرب اللي ورطنا هالورطة الكبيرة وطيحنا هالطيحة الخطيره ولا طيحة حتى الطليان الفاشست ؟
من صاحب هالرائ الاجرب بالوحدة مع الغرب ؟ ومن مذهوب الشيرة اللي شاور علينا هالشيرة المحمسة ؟
من بالله عليكم خبرونا بس ؟
انا متيكد انه مش سيدي ادريس الله يرحمه وما نطريه الا بكل خير هو صاحب هالشيرة العطيبة الشطيبة والزورة العورة لابد انه شخص آخر ؟
انا متيكد انه مش سيدي ادريس لاجني عارف ان امير برقة كان رافض بتاتا ومن ايام حكومة اجدابيه الخلطة مع الطرابلسيين وعارف انهم قطعيين ووحوود متاعين مشاكل حتى في بعضهم قليلي رحمة من ايام جمهورية طرابلس اللي انتهت بتقتيل بعضهم وعارف ان غالبيتهم مايحبوش السنوسية الا من رحم ربي !
منو زعمك صاحب هالرأي المحمس والعطيب الشطيب بالوحدة مع طرابلس الغرب ؟
منو بالله عليكم مذهوب الشيرة اللي ورطنا هالورطة الكبيرة وطيحنا وطيح سعدنا طيحة إعديك في يدين الغرابة ؟ زعمك الانجليز ؟ والا الامريكان ؟ والا الطليان ؟ والا جمعية عمر المختار اللي كانوا ديرينها غرابة درنة وبنغازي علشان يدردحوا برقة بالشواش بالشواش وبالكلام الحلو وبالضحك واللعب لعند مايعزقوها في فم الطرابلسية ؟
خسارة يابرقة والله يا خسارة !
وين كانوا هلك السعادي والمرابطين راقدين ساعتها ؟
كانوا فرحانين بشوية الناياشين والاوسمه اللي علقوهن لهم على صدورهم لأنهم همه بالفعل كانوا فرسان الجهاد ضد الطليان في برقة والادوار كانن ادوارهم ؟ والا كانوا يجلموا في السعي ؟ والا كانوا لاهيين في مناب يكشكوا ويمجردوا ؟ والا كانوا مشغولين بتاليف غناوة علم يقولوها للغزله وين يحدرن على البير ؟ والا كانوا مشغولين بلحس اصابعهم من وكلة عصيدة مع شوية رب وسمينه جديده ؟
وين كانوا اهل برقة من السعادي والمرابطين راقدين يوم صارت هالخلطة العطيبه والشركة الشطيبه اللي ودرت برقة في ستين الف داهية وخلت غرباوي وسرتاوي معفن كيف هالوسخ الفاسد القذر معمر القذافي يجي و يطاول علينا ويحكمنا بالحديد والنار ويذبح عيالنا ويسمم دماء اطفالنا وينهب اموالنا و يذل دين أمنا في وسط برقه ؟
وين كانوا راقدين يشخروا هالسعادي والمرابطين ؟ وين ؟
وين بالله عليكم وين ؟
كذه واحد ولد حلال وولد اصل ومفصل يجاوبني ؟ كذه ؟

ع العرفي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home