Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

إنكان عباه على كعوان

اسماه في الكواغط متع الحكومة... كمال كعوان...
اسماه المزبوط...الليّ في شهادة حسن السيرةوالسلوك... كمال االلفعوان
والنِك نييم النضالي امتاعه في الديار البالتوكية...زمزامة اسماها لي 121....!

آه آه آه آه آه آه آه آه آه آه أووووووووووم.. .جاكم خوكم لي (جاكم عنتر)...قول هذي هي الشريانة اللي يشَرْيـِن بيها على الروم...هي موش بالزبط روم متع حوار وخوذ واعطي.. لا... هي وكر....ورشة متع التهنتيش والترييش في عباد الله..هو والمكاليب اللي معاه واللي رافعين يافطة
ديموقراطية.... هذا هو خوذ وإلا خلي.
الزمزامة...(لي121) هو واحد من اعْتِرْبـِية الآدمنية..وهو عنده صحة وجه و وقاحة اللي تخليه يركل أي واحد ما يناسبش مزاجه من الغرفة ..وبعدين يقولك علي الخاص..آسف ياخوي والله كله من إس أبو..ميش مني!! وإس أبو هو.. سامي العالم.. حفيد من استقبل موسيليني واهداله سيفه..... سيف بو الأسعاد المسلول!
مرة قلت لواحد من الأشخاص اللي بــ وجوههم لما سمعته يسب في معارض محترم....هذا شنو....منين جي... وكيف خش للمعارضة الوطنية اللي عابيين عليها...قال لي..هذا يا سي..المتكنطي
يقولوا عليه انه بدي نشاطه الثقافي والسياسي المعارض في ظروف صعبة بكل..أول طلة يطل بيها على الجمهور...كان معلّق من الأربعة..يعني شادينه اثنين..الأول من يديه والثاني من رجليه وِرْموه خارج الصالة...زي ما ترمي شكارة الكناسة...والسبب قالك انه قعد يسب في واحد من الضيوف اللي كان يتكلم في ندوة بمناسبة ذكرى استقلال ليبيا داروها في لندن....ومن هذاك اليوم وهو يحقد على صاحب الندوة وضيف الندوة...وعلى المعارضين المثقفين وحتى علي المعارضة الوطنية الحقانية....ما خلى حد !
قالك..... وين ما تم الإعلان عن الموتمر الوطني جاته خبيزة طايبة لعنده..وما صدّق..وبدت المواهب امتاعه في التلتيل واللقان تتطور ..ومنها بدي المدعو كمال اللِّفعوان يتحضر للموتمر..يعني بدي يلمع في روحه ويبوي في وجهه..خش في روحه وطلع.. يحاول أن يتخلّص من وضعية الصئبانة اللي كانت امعششة في اللحي متع الإرهابيين من جماعة تورا بورا..يعني سلح وضع الصيبان وحط عينه على حشرة ثانية تضمنلله التبرطيع في الموتمر!
لما بدي الموتمر الوطني..تفاجو الناس لما شبحو خوّانكم لي 121.في لجنة الاستقبال في الفندق اللي صار فيه الموتمر ..ونتذكر إن واحد من الجماعة استغرب وقال.....يا جماعة هذا كان لاصق زي الصيبان في لحي أمراء المؤمنين متع افغانستان شنو جابه للموتمر؟!!!
وزي ما انتم عارفين الموتمر ما فيشي لحي(ميد إن.. تورا بورا)..واللي عنده لحية غم عليها..أو حسّنها عالسفر..زي الليّ جي للموتمر وقال إنه مستقل...ولما ورقوله الجماعة وانعرف بأنه من الاخوان المسلمين... اعطوه كالشوا...علاش لانه الاخوان اللي ما يعرفوش يكذبوا بكل.... دارو بيان قالو فيه انهم مقاطعين الموتمر علي عيون حبيب القلوب والجيوب سيف القذافي المكلوب!!!!!
إيوااااااااااااخوّانكم لي 121.... لقي الحشرة التي تناسبه وما فيش أحسن من البراغيث للقيام بهذه المهمة..حتى كانه فيه زحمه عليها..من شلة الدراويش.!!!!
ومن هذاك اليوم اللي اتحسن فيه وضع خوّانكم لي 121..واترقى من وضعية الصيبان إلى وضعية البراغيث..وهو يمارس بكل فخر دوره القيادي الجديد في الموتمر..وطب زن ..بدي في تنفيذ مهماته في التنقيز..لصالح منهو ينقز ربي يعلم...طب زن..بدي يبرّح على بعض الاسامي اللي تصور انها تعطيه قيمة وبدي يهاجم في اسامي ثانية شريفة يتصور انه لما يسبها يولي حاجة كبيرة!!....
وبدي عمكم لي 121 يرقد في النهار ويقيم فيها الآذان في الليل..شغل..قوي يسي..حتى هو يبي يثبت روحه..قول حاط بالموتمر...وبدي يلعب في اللحمر..يسبك اليوم....وبالك يرضى عليك غدوه..ها البني آدم يا اما عنده مشكلة نفسية وإلا تجيه أوامر كل مرة شكل...!!!!
....قول بدي يبرّح علي بريك اسويسي ومنصف البوري تقول عليهم ملايكة نزلوا من السمي على المعارضة يعني موش هم اللي ليهم 30 عام (زي ما يقولوا) يمعكو وما داروش فايده إلا العرايك والفتن والموامرات على الفصايل الوطنية الشريفة..! من الناحية هذي كمال اللفعوان أثبت أنه آية في في الرديح والنبيح والتبريح تقولش عليه طالع من حارة اليهود!!!قول.. طب زن إتنطّر في لجنة العمل الوطني، طب زن اصبح من قيادات لجنة العمل الوطني.هيه...هيه.... يا بابا هيه..عليك لجنة كان يقود فيها حسن لامين المعروف باللصقة..وهو من اللي يزاحموا في كمال الإفعوان في صراكة البراغيث. قول ما تمش الموتمر عامه لوّل حتى شمّر خوكم البرغوث وقال يا فكيك..وبدا يلمز ويهمز ويغمز.ورجع يتطاول على المؤتمر ويفتي في فلان ويحكم علي علان.الحاصل يفتي في الامور الصعبة.بعد ما صدق روحه انه يفهم في الأمور كلها وبدا يزدم علي كل المواضيع والقضايا الكبيرة ما خلى شي وما خلى حد..لا اخوان مسلمين ولا جذريين ولا علمانيين..هذا الجاهل لا يعرف حتى معنى كلمة العلمانية..وما خلاش حد إلا وبدي فيه ترييش...ولما ما يفشِّش غله في البالتوك....يِعْلِق في المواقع ويدوِّر علي وينك يا كلام امسّخ ويدف تحت اسم ولد ميزران هو وجماعة السو امتاعه وكل مرة باسم جديد وضحية جديدة... وبدون ما يستحي أصبح يتطاول على أسماء وطنية انظيفة ما تلوثتش يديها بالدم والدسايس في تورا بورا....وها الناس اللي يهنتش فيهم معروفين بمواقفهم الوطنية المشرفة ويحترموها الناس اللي عندهم عقل يوزنوا بيه....إلا ها الزمزامة اللي يشترك مع القذافي وزبانيته في كرهه لهذه الاسامي الوطنية الشريفة..والله وين يقعد يسب فيهم كل واحد باسمه اتقول إلا ينقي في الشوك على قلب خوه القذافي اينعم ...خوّانكم لي ميش صغير يعرف شن يدغدغ القذافي ويقيمله معنوياته!!!!! في رمضان الماضي..طب زن خش على الخلاوي..حسب ادعائه انه قضى خلوة لوجه الله ...قلنا بالك الراجل تاب وتاب الله عليه...تاريته روّج حكاية الخلوه هذي حتى بيش يصدقوا السميعة ان الوحي نزل عليه..هذا علاش قعد يفتي....قول التوبة النصوحة متاعه ما طولتش هلبه...لين انتكس و
رجع مرة ثانية لحالة البراغيث..وبدي ينافق في إخوانه المسلمين وبعد ان كان يسب في سنسفيل اجدودهم أصبح صلاح الشلوي الاخواني والا سفير سيف عند الاخوان يمثل له رمز الصلاح والتقوى.إينعم..التقوى ومع صلاح الشلوي..مسكينة ها التقوى ما تتحمل من دراهات..
الحاصيلو...لا نطول لا نقصر....خوّانكم لي 121خش علي الدستور........الدستور؟
إينعم الدستور إللي كان كفر وإلحاد في( تورا بورا) ولى عند ها البرغوث بغلة يركبها وهو ماشي لزنقة السيد محمد الرضى السنوسي...ومرضة الدستور هذي اللي تركبت فيه(حاشاكم) جاته بعد ما جبدت المعارضة سريب الشرعية الدستورية..ومنها قعد خوّانكم لي 121 خبير دولي في الدستور..لا ميش بس هكي البرغوث ولى داعية سنوسي.....بالك ....وبالك.. يولي ياور والا رئيس التشريفات والا حتى رئيس الخدم في البلاط الملكي!!! قول البرغوث لقي وين يقيّل...قول كرّش في كبوس السيد محمد الرضى السنوسي...
اللي حصّل قريشات (اشبح منين).وبدي يتكتك بيهم....وبعد أن كان وجهه ما يبانش اصبح لا يفوته اعتصام إلا ويظهر فيه من جملة المعتصمين..وما طولش إلا ولقي طبالة وزكار..كمال اللفعوان يطبل وإس أبو.. الزكار..قول ولى اللفعوان مسؤول الدعاية وفي وحدة من الدعايات اللي بوكّل ..حتى غوبلز متع هتلر ما حلمش بيها...قالك(لي 121)إن(الأمير بالرغم من أنه أمير لكنه كان في واحد من الإعتصامات يلم كناسة المعتصمين وهذا دليل على التواضع الذي لا يقوم به إلا أمير من نسل أمير)!! على العموم الراجل ما شفنا منه شيء وما نواخذوشي بتسلط هذه الشلة الفاسدة عليه..وميش ذنبه اذا التموا حوله ها الاشكال وبدو في ابتزازه بيش يتكتكو.... للشرعيته الدستورية.... أماله كل شي يبي اتكتيك....
انكان على غناية الاعتصامات هذي راهي واجب وطني وما فيهش جميل واللي يقدر يحضر وما يحضرش معناها مقصر في ها الواجب وهذا اللي لاسبد يعرفه السيد محمد الرضا..من غير ما يدرهلنا كبودنا بي ها العصابة اللي التمت حوله وعلى راسها البرغوث اللي اتحسنت احواله وسمن بفضل باوندات محمد الرضا..وقدر يكري غرفة ملونة بـ 6000 آلاف دولار..يجتمع فيها كل ليلة بجمهور العازة والقهرة..ثلاثة ارباعها من مخابرات القذافي...يتسلوا كل ليلة وينقبوا في السامينسا على راي المخبر اسكمبيل.. في تلك الغرفة على حساب أمير كمال اللفعوان وجماعته..!
كعوان مصاب بعقدة اسماها العظمة ..والعظمة هذي تقدر تفهمها علي وجهين ...الوجه الأول هو طرف اللحم اللي راكب علي العظم بعد ما تاكل اللحم وتمكمك العظم وبعدين ترميه للكلاب يكملوا عقابها...!! أما العظمة الثانية هي مرض نفسي يصيب الواحد لما يحس بروحه انه تافه....ومرات ذكريات الطفولة هي السبب في المرض...هوينه ..تعرفوا ان ذكريات الطفولة فيها الباهي وفيها الشين اللي ميش مستحب....زي اللعب في الزنقة في زنزارة القايلة...لما يرقدوا الكبار وتقول النساوين لفروخها امشي سلم وليدي ألعب في الزنقة مع الصغار خلي بوك يقيل...ويمشي يلعب مع الصغار...كيف وشن يلعب.. ميش شغلي..!!!!
خوّانكم البرغوث جاته حالة من المس مع جية ها الصيف...ربي يلطف بعباده...مسه جن اسماه علي اسم وحدة من الجبهات اللي تناضل ضد القذافي الحقير...ومن كثر ما هو يحسابه حق بدي ينتش ويهنتش في سمعة أسماء وطنية لا نريد حتى كتابة اسمها هنا إلى جانب اسم كمال كعوان وجماعته ما نبيش نشوّهها...ويكفيها عزة وفخر انها مازالت تناضل ضد ها المعفن القذافي اللي جاب لمجتمعنا ها الخلايق...!!
..وباسم الشرعية الدستورية اللي ما يعرفش منها هالحمار إلا باوندات اميره....بدي يتهجم على كل من يقول رأي ما يعجباش..وإلا يخالفه في الراي والا يطلب منه ينقص شوي من حسّه..وهوِّينه فيه حاجة لازم نعرفوها كويس وهي ان اللفعوان ديموقراطي لل......معناتها..انه في الديموقراطية صبعين والحق الطين...والله ما يعرفها وين اتقبل زيه زي جماعته يطرد كل من يكتب حتى سطير يشم منه ريحة المخالفة.....وكان بعثتله ورد يقعد يطبلك ويزمرلك...قالك ديموقراطي!!!!... القذافي فرّخ فلاليس ميش بس في الداخل..لا حتى في الخارج يوزوزو..زي فروخ الجران كل ليلة في غرف امعفنة يقولوا انها غرف المعارضة...كانه المعارضة هكي قول غبـْرِت..!

شورني طوِّلـْت ....سامحونا ...لكن العوج ما حد يرضى بيه ولا يسكت عليه...اوكار المدعيين انهم معارضين بدت اتحشم....ربوا هالفروخ وإلا لوحوا عليكم ها الكوازي...راهم شوهوا المعارضة وركبولها سمعة شينة.....اخطونا يا ناس اللي يبي يعارض القذافي ما يديرش هكي..ولو تقعد يا فرخ انت والفروخ اللي معاك تسبوا في القذافي من الصبح لليل راهو كلامكم ما ناخذوشي بجد لانكم انتم اقرب للقذافي من صغاره.....انتو تخدموا فيه خدمة ما يحلمش بيها حتى من اذاعة القنفوذ.....الله يهلككم هلكتونا وشمتوا فينا كلاب القذافي اللي امقحمين كل ليلة في خربكم....يضحكوا عليكم ويبعثولكم في الورد....
اما من جيهة السيد الرضى فياخذ مني نصيحة لوجه الله...انه ما يعباش علي ها الاوباش....وما يعطيهمش الفرصة بيش يبرطعوا كل ليلة ويسبوا مناضلين نحترمو فيهم باسمه وباسم شرعيته .....وكانه يبي ايدير حاجة وعنده جهد ليها ننصحه يدور علي ناس مزبوطين ناس اميصله ميش ها النخالة هذو مشكوك في امرهم مانشدتش عليهم حد وعطي فيهم راي يفرّح...كعوان وسامي ومصطفى وشعبان الخوان والزاوي وعيسه وكوسه وباطاطا...وها الكواسم كلهم.....وكانه مقتنع بي هالرابش وهذو همه الحاشية امتاعه ...طريقه بيضة يا بابا...وخوذ من الآخر..يا حسين..الربيع من فم الباب يبان....وانكان....انكان.....إنكان عباه علي كعوان....يا قعاده ينش الذبان...يا علم..!!!!!!!

المتكنطي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home