Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

الكذبة عـند بن غـلبون ولاّ عـند لملوم؟

( ما إلك إلا غـوغـل )

سبق وأن ذكرت في رسالة سابقة بأنني أتابع بشغف حلقات مسلسل بن غلبون عن تأسيس الاتحاد الدستوري الليبي، وأنني استمتع أكثر بقراءة الردود التي أثارتها هذه الحلقات منذ أن ابتدأ اللعب في (السطّاش) لأن هذه الردود والردود عليها طلّعت هتايك جديدة اكبار بكّل بكّل.

ؤطبعا أنا تريّحت مع الكتيبة بالعرْبي فنبّي نسلح النحوي اشويّة.

بن غلبون قال في هامش الحلقة 16 ان مفتاح لملوم كان من ضمن جماعة (جبهة الوطنيين الليبيين) اللي انضمت بكاملها للاتحاد الدستوري، ؤكان مفروض يطلع معاهم باسمه الحقيقي في بطاقة الاعلان ولكنه في آخر لحظة طلع نذل. )هوّا بن غلبون ماقالهاش هكي طبعا، هوّا كلفتها في كواغط هدايا وناستروات لكن هضا المعنى، خلونا ملكلام الزايد(.

عمك لملوم ماهوش ساهل حتى هوّا، ردّ عليه ؤقال أنه عضو مؤسس وأن بن غلبون كلا حقّه ؤقاللّه 3 مرات ان محمد القزيري في الحمام، فقرر الانسحاب حفاظا على ماء وجهه. (طبعا لملوم ماقالهاش هكي حتى هوّا، لكن هذي هي الزبدة).

خوكم الككلي داخ، الجماعة فيه واحد منهم أيدلّس (على راي سي بن غلبون اللي كل كلمة ولاّ كلمتين يقول لك أفطن راهي فيها تدليس، افطن راهو فلان ايدلس). ؤكيف ما يقولوا اخواننا اللبنانيين في محطات الستلايت (ما إلك إلا هيفا)، قلت لروحي (ما إلك إلا غوغل).

ؤطبعا غوغل اجعنّا وليدي ووليدك غير قولّه جيبلي هذكّ النشرة. دقيقتين إلقيت عند الصادق شكري (الخبر اليقين). كيف يا سي الشكري قصة الجميّعة ؤمن منهم اللي ايدلس؟ قال واللاهي (يُعد الأستاذ/ مفتاح يوسف لملوم القيادي الحالي بالمؤتمر الوطنيّ للمعارضة الليبيّة من قادة ومؤسسي "الحركة الوطنيّة الليبيّة"). (هوّا الصادق شكري ماقالهاش هكي طبعا، فأنا لانعرفه لا يعرفني، لكن قالها في الحلقة رقم 12 من الجزء الثاني من هدرزته (هدرزة في السّـياسَةِ والتاريـخ: الملك .. العـقيد .. المعـارضة الليبيّة في الخارج)) واللي امكذّب يمشي ايشوف بروحه. أونهي منشورة عند سي اغنيوة في 13 ستّة 2006. ولّلي معرفش إيطقّ فيها يعاود علي غوغل الفتّان النشوال شيّال الخبر تو إيشيله لاعند فم بابها عند اغنيوة وين ما لقيتها انا ولاّ عند سي لامين ولاّ عند لخوان لأنها منشورة على حبال الأنترنيت كلهن.
بَبْ ببْ بَبْ بَبْ ! كيف ياسي الشكري؟ هالكلام وين عاطي بوجهه؟ وانت قبلها ابسطرين كنت اتقول (أعاد البعثيون الليبيّون ارتباطهم بحزب البعث العراقي بعدما أعادوا تشكيل تنظيم أنفسهم من الخارج، وأسسوا في ديسمبر 1980م (الحركة الوطنيّة الليبيّة) كفصيل معارض لنَّظام القذّافي)؟
هكي يعني ان سي لملوم كان مؤسس في الحركة الوطنيّة الليبيّة ابتاع البعث من 1980 (على رواية الشكري)، ثم مؤسس في جماعة (جبهة الوطنيين الليبيين) من 1981 ( على رواية لملوم وبن غلبون) ؤبعدين مؤسس في جماعة الدستوري (على رواية لملوم).

وين ياسي لملوم؟ (اجخر هنا من فضلك لأن الكومبيوتر بتاعي أبل مايعرفش يكتب الجخر، وموصّي عالسوفت وير بتاع الجخر لكن مازال ما وصل)، تقدمي/بعثي (متخفي) ؤفي نفس الوقت دستوري/محافظ ؟ توّا بانت ليش سحبت اسمك من قائمة الاسماء المعلنة اللي قال عليها بن غلبون.
كان غيرهم ياخويا الجماعة ما ايقولولك صاحبك في الكنيف، خطانا ؤعدّي دوّر جماعتك (ولو أنه سي بن غلبون ما عنداش حق ايغلّظ الكلام كيف قالّك صاحبك عافك)، حتى وان كانت قلّة عطيتك لعنوانك شينة واتحمّق.

الله لا ايغيّبك يا سي غوغل.

وإلى اللقاء بعد الجولة القادمة

ناجي الككلي
najilkickli@yahoo.com


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home