Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

السيد الدكتور بوفايد... والسيد حسن الامين

السيد حسن الامين

كلماتي من صدري المتمزق لا تزعل عليها لنقنك لابزتها ولابزتها واجد واجد .. خربت المباراة ، واعتقد انك وبعض المواقع الاخرة والاذاعة في المهجر ازعجتم النظام ، وخوفتوه ، حتي قررالسيد العقيد ورجال البوليس والبصاصة ليراقبوكم ويسجلوا اخباركم وهواتفكم .

تي كيف يارجل تدير مقابلة وتحطها في موقع ليبيا المستقبل وتقول لعدوك خذ بالك "" نحن جايين " ولكن بدون نار وسلاح " ،، ارحم ولديك خلينا بس نطلعوا ، هكي .. نطلعوا ندير مظاهرة وتجمع سلمي بلبلاش ضد النظام ، وزاد في البلاء كذلك السيد احمد كتب شوية لافتات لرفعها في الاعتصام السلمي.. ياناس انتم تحلموا وتخرفوا ، والا شنوا تديروا ، والا ماذا .

السيد حسن

انت السبب في ظهور الظاهر -المختفي السيد عاشورالورفلي ، كما طلع السيد الخوجة السيد شاكير اللي فرغ جعبتة واعلن عن افلاسة معلومات حول الجبهة .

وشوف اليوم ظهر السيد القزيري يزغرد علي طرابلس وهو حاط كراع علي كراع في هولندا شقة سمحة وكبيرة ومش عارف ان كان الراجل يسكر والا يخاف شوية ربه اللي ديمة نازل في المسلمين والاسلام .

والسيد بنقا رسم كاركتير حط فيه الرجل " فوق السيد فايد والسيد بوزعكوك والسيد سليمان والسيد بويصير تحت ، وصفهم بالجبناء .. تو يابنقا حتي اسمك متلخبط واكيدة شين ، كيف وجهك الان ستتعلموا انت وامثالك اللي نازلين في الاخوان المسلمين والسيد بوصير ، واعلم انني مستقل تماما واحب السيد بوزعكوك والاخوان المسلمين وتاريخهم السمح المسوط وما فيش خير للبلاد الا بقيادة حكمة وصبر الاخوان المسلمين ،راهم جماعة تتشاور وتخطط ، وعقل جماعي ، مش هروكة عقاب ا.... ، الواحد ماعندش اعدادي ، يبلعط ، ويرغي في البالتوك وحايس فيها تشاد وخسائر ، ويحلل ، والان اكيدة سيعيط ويزيط ويجمع تواقيع وشوية فلوس للمحامي ، او ربما سيعود بروحة وجلدة ويديرها مظاهرة في فزان او الزاوية ، وهو يحلم ولا يدري وين قاعد ، والاخوان راهو يابنقا والحاقدين عليهم او اللي غايرين منهم ومن اعمالهم النظيفة ، هم نظرهم طويل ، ويخافوا علي بوك وامك العجائز والصغار اللي تركتهم ورحت حايس فيها في امريكا او السويد ، المهم بعيد عن الوطن .. وهذا اولا غصبن عليك وعلي والايام جاية وحتشوف انت والساطور اللي طلع بعد عقد صفقة مع روحة او خوفوة شوية جماعة لندن والمباحث ... فكروا ياعلم فكروا واسأل المجرب ولا تسأل الطبيب .

السيد بويصير وبوزعوك مش في عز الشياب ، ولكن علي الاقل في الخمسينات والستينات وعندهم خبرة وخبرة وغلطنا في حقهم وارجو ان يسامحونا بكلمة لوجة الله فهل ممكن .

نعود للسيد حسن الامين

المقابلة بالهاتف شنوا قال السيد بوفايد ، الناس راقدة ، الناس غير مهتمة ومكترثة ، والناس هلكهم الخوف " مش الحكمة والصبر " وشوف انا راجل ونصف بعد صقع سويسرا والحرية خليني اندير محاولة بتجمع سلمي في ، ووين ، واين ؟ في ميدان الشهداء في طرابلس ..هكي مرة وحدة ، هكي بكل سهولة وغباء .. تحدي في دولة ظالمة تحكم وتشنق وتسجن وتصادر العقل والاجساد امام العالم بالحديد والنار وانت ياسيدي الدكتور اخر العمر تطلع في مظاهرةة ويطلع معاك سيدي الكاتب السيد جمال بعد نوم طويل ويبرعط يكتب علي الحرية والحقوق وينقد في الحكومة ... وطلقت لهم الحبل ،وخلتهم يتكلموا وهي تقري وتسمع وتسجل في حركاتهم وسكناتهم وكلامهم .. حتي بيش تذبحهم وتشنقهم به ياسلام عليك رجالة شجعان ، والا متهورين ومستعجلين ، صبروا اربعيمن سنة مش عازين يصبروا شوية اخري .

الان ياالسيد حسن الامين والمواقع الليبية والاذاعة وجماعة الحقوق

هيا ابدوا في الاعتصام ، وهيا نشحت الامم المتحدة وهيومن واتش ونطالب باخلاء السجين او اختفاء الكيخيا او الجهمي اللي كان حايس فيها في الحكومة لعشرين سنة ثم صحي ضميرة وطالب بالحرية والديموقراطية بعد اشارة من واشنطن لتعرف الردود .

ياجماعة راهو امريكا والمخابرات مش اغبياء .

سيمسكوكم واحد بعد واحدا ويعرفوا المعارضة جوة او في البرة واحد واحد ويعرفوا العقيد السيد القدافي كويس كويس وحتشوفوا شنوا نقول .

الان يا حسن وبنقا

شنوا حاتديروا تطلب من الكتاب المراهقين التونسيين او هويدي ان يكتب علي الظلم والاعتداء وتخلطها كالشرمولة .

نصيحة اخيرة يا سيدنا حسن

انت لا تبي الشهرة ، وانت رجل مسوط اللسان ، ديمة قلبك حامي وساخن علي الليبين واحوالهم ، وتلف يمين وشمال والنار حايسة فيه وشايط هنا وهناك ، ركح شوية واقرا شوية التاريخ وشوف التجارب ووين الربح ووين الخسارة .. هكي مرة وحدة ، مقابلة وبالهاتف ، وانت تعرف المخابرات تسجل وحاطها وزنها لكل كلمة.. ، .

ولكن المهم الان اعلم راهوا الشوية الي يخشوا علي الانترنيت " شوية " كما قال بعظمة لسانة الدكتور الفايد ، عرفوك وحجزوا لك مكان في المستقبل ، والسيد مدير الاداعة في المهجر راهوا الاذاعة لا تسمع في العاصمة المسوطة ، ولا معدلين عليها ، كما وصفها القريزي وفقط في طبرق ، راهوا همومهم وكثرة الفلوس وقلة البخت والحظ المايل هو اهم واكبر من يسمعوا كلامكم المسوط مرات مرات .

ياسيد حسن ركح الكارطة واشقي بعويلتك والا حاول ترجع للبلاد ان كنت .. وتعمل محاولة جديدة للاعتصام وتطلع السيد بوفايد .

الحديث يكره الكبد ولكن بالله عليكم شنوا رايكم مش هو الحق .

واخيرا من هذا المنبر الحر نطالب السيد العقيد والمخابرات الامنية الافراج دون قيد او شرط علي السيد بوفايد ، والسماح له بالاعتصام والمظاهرة السلمية ، والا سنشعل في ليبيا النار بالعصيان المدني السلمي .

واعذر من انذر .

ولد البلاد الثاني


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home