Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

أتمنى من الله ان لا يْذهب عقلي كما فعل بعبده المْسمى مصطفى البركي

بسم الله الرحمن الرحيم وبعد.

أتمنى من الله العلي القدير ان لا يْذهب عقلي كما فعل بعبده المْسمى مصطفى البركي.

أتقي الله فيما تقول على قوم لم يضروك بشي‘ و لم يأتوا بفاحشة اللهم ان الحاكم منهم, أتقي الله و انت راجل بشيبتك, في بداية مقالتك الي كتبتها في يوم 05/07/2007 توصي و تنصح في الليبيين يردوا بالهم من معمر و التفرقة اللي يخططلها في بلادنا بين القبائل و بعدين تجي قبل لاتوصل لنص المقالة و تقلب الموجة و تبدى تتركب في قبيلة القذاذفة. قلت.
" كما يعلم الجميع بأن القذاذفه قد اجتمعوا أخيرا وركزوا على أن يبقى الحكم فى قبيلتهم, قال لى صديق قديم ورث محل تجارى فى سرت ورثه والده عن والده أى أنهم قضوا قرابة المائة سنه فى سرت ويعرفون القذاذفه معرفة جيده. قال لى هذا الصديق عن والده عن جده, بأن اجتماع أى عدد من الأشخاص غير القذاذفه لابد وأن يسفر عن خير ما. أما اذا اجتمع مائة قذافى فلن يأتى منهم الا الشر, وهذا ما رأيناه فعلا خلال الأربع عقود الماضيه, لم نجد فيهم رجلا رشيد ولاعاقل ليقول كلمة حق فى صالح شعب ليبيا بل تكالبوا جميعا على نهب أموال ليبيا بشتى الطرق محاولين اذلال الشعب الليبى كلما سمحت لهم الفرصة
بالك صاحبك قالك حتي شنو الكلام الي انقال في الآجتماع, و بعدين على قولتك ما فيش قذافي يقول كلمة الحق في صالح الشعب الليبي ... حسن أشكال قال كلمة الحق و أنقتل "الراجل من الهنود الحمر, مهوش قذافي" و بعدين من الي خبر معمر على حسن ,, مش الي تسمي في روحها بالمعارضة و الى أنت واحد منهم.

أنت قلت في مقال 13/10/2006
http://www.libya-almostakbal.com/MinbarAlkottab/mMAlborkyArticles.htm
الشعب الليبي لا تمثله حفنة من المقارحة او حفنة من ورفلة. ان معظم المقارحة لا يريدون القذافي ولا ابنائه, اما ورفله فتاريخها في عدائها للقذافي معروف.
حتى القذاذفة لا يمثلها حفنة "كانك عاقل و تفهم"و بعدين شنو تاريخ العداء الي بين ورفلة و القذافي ,, غيرشنو حفنة من ورفلة بديروا أنقلاب على معمر "سامحوني ياخوتي"... و معليش يا مصطفى الكلام مش ليك. و بعدين الي بين ورفلة و القذاذفة ليعرفه أنت و لا غيرك. و كان في عرب من ورفلة ما يحبوا معمر هذا شيء يخصهم " سياسة" مادخلش ورفلة و القذاذفة فيه .و بعدين من من ورفلة عنده مشكلة مع معمر اتماهو جماعتة الي 24 ساعة وهم لاصقين فيه.

01/10/2006 مقالتك في
هكذا تعيش عائلة القذافي تلعب بأموالكم لعبا وانتم تعانون الفاقة والعوز, زواج بنت القذافي كلف اكثر من 200 مليون دولار. زواج الأميرة آن ابنة ملكة بريطانيا كلف 100 الف استيرليني.
ياراجل تقول معمر حطك مسوْل على الفرح وعاطيك مفتاح الكاصة.. ياراجل منين جبت هالمبلغ . وبالك حلمت به .. و بعدين بالك مش واصلك الخبر بأن في عائلات من القذاذفة يباتوا من غير عشاء.. وغيرهم بايت في تريلات... باين الآخبار توصلك من اْذاعة فانتا...سولتك بالله تزور هالموقع و أقراء شنو صاير في بعض القذاذفة.
http://www.justice4libya.com/index.php?option=com_content&task=view&id=3321&Itemid=160

في مقالتك بعنوان "ليس دفاعا عن أبي العشة" يوم 05/10/2005
http://www.libya-almostakbal.com/MinbarAlkottab/mMAlborkyArticles.htm
ياناس أقروا المقالة تربحوا " السيد مصطفى نازل في الآخ سليم حامد البرعصي , يدافع على العشة و يقول يا برعصى كم من مرة و لا مرة ناداه بأسمه الاول, غير لان الراجل برعصي.. " قبلية و عنصرية عيني عينك" غير باش تعرفوا .. ما احرف من معمر غير مصطفى البركي.

قلت::: القذاذفه لم يكونوا سادة قوم فى يوم من الأيام الا فى هذا الزمان ألأغبر, ان المعروف عن القذاذفه انهم تبع لأولاد سليمان الذين يترأسهم أولاد سيف النصر منذ مئات السنين, وكان القذاذفه اما رعاة مع عائلة سيف النصر يرعون لهم أغنامهم وابلهم او يعملون في بيوتهم, أقول هذا الكلام وانا اعرف ان معمر ليس قذافيا لكنه تربى في بيت محمد بومنيار الذي كان يعمل سفرجي في بار اليهودي جده, واصبح محمد بومنيار من عامل في بار الي مجاهد اخر زمن.

ياسدي نقولوا أن القذاذفة عمرهم ما كانوا سادة .. لكن انك تقول أنهم تبع لولاد سليمان فراك غالط .. القذاذفة كانوا يحاربوا مع أولاد سليمان " أنشد أولاد سليمان" .عبدالجليل سيف النصر كان مسميهم "زنابيل الحديد". و بعدين شنوا الي خلى أحمد أبراهيم و غيره ينزادوا في تشاد و النيجر و السودان و غيرهم . ماهو القهر و العازة الي الطليان قهرالقذاذفة و أولاد سليمان بيهم و خلاهم يجلوا برى ليبيا زي ماخلاك معمر اتدير كيفهم." مش دفاعاً على أحمد أبراهيم".و الا تبيهم يبيعوا البلاد زي ما عرب واجدة دارة.

قلت::
إن قبيلة القذاذفه هم اول من يعلم بأن معمر ليس بقذافيا رغم انها قبيلة متواضعة, ولم يكن القذاذفه على مر العصور الا تبعا لعائلة سيف النصر.
ياناس توا هذا نموذج من المعارضة, الكلام مش راكب على بعظه.. كاني فاهم من كلام السيد مصطفى .. أنه يدور فالقذاذفة مش في معمر.. هذه هي المعارظة الي بتلم شمل ليبيا.؟؟؟

بالله يا ناس أقروا الي كاتبه السيد المحترم البركي
اقول للقذاذفه بأن الشعب الليبي جربكم طيلة اربع عقود فلم يجد منكم مصلحا ولا عاقلا ولا كريما, كنت اظن أن خليفه حنيش عاقلا الي ان علمت انه شارك في مذبحة بوسليم, وانتهيت بقناعه أن القذاذفه لو اجتمع منهم مائة أو حتى الف شخص لن يأتي منهم خيرا والاربع عقود الاخيرة لاكبر دليل بأن لا عاقل بينهم ولايزالون يطمعون في استمرار حكمهم حتى بعد نفوق هذا الطاغيه.
توا تقول جربتنا أربع عقود.. بالله قولي من من القذاذفة الي داسلك على طرف.. و كان عندك حد قول عليه للناس , ولو كان الناس ما خذولكش حقك أذكًر مازال فيه رب في هالوجود. و كانك بتقولي معمر .. دير زي ما دار لما قال لريغن "كانك راجل أطلعلي برة". القذاذفة طلع منهم ناس وقفوا لمعمر " حسن أشكال ألي انتم "المعارظة خبرتو فيه", مفتاح خشيبة, خميس الغناي" هؤلاء قالوا لمعمر "لا" قدام وجهه و شنوا الي صار بعدها ؟؟؟ مش زيك قاعد برة البلاد و تفوشك عالفاضي.
حتى الصفحات متع المعارضة عمرها ما ذكرت هالناس على انهم شهداء. تقول عندكم أنتم مفاتيح الجنة و أنتم الي تقرروا من الشهيد و من لا, سبحان الله في من ناس ماتوا موتة عادية و طلعتوهم شهداء,, مسكين مفتاح خشيبة الي قطعوله صباعه و جروه بالسيارة في باب العزيزية " ماهوش شهيد" لأنه قذافي من قبيلة القذاذفة.
و خليفة حنيش الي تتكلم عنه قلت أنك سمعت أنه شارك في مذبحة أبوسليم """ سمعت""" "" شنعلمك الكذب يا جحا قال الي نسمعه نقوله"
كلا ثم كلا لن نترككم تحكموننا من جديد فلقد جربناكم فلم نرى منكم الا الشر والحقد والكراهيه. وسنظل نحرض الشعب الليبي على العصيان المدني وأعرف أنهم سيتجيبوا للعصيان المدنى وسوف لن تجدوننا مطية سهله , أنا أتوقع أن يثور الشعب الليبى فى وجه هذا الطاغيه لا أن ينتظر أن تحكموه أنتم , وكأن ليبيا عقمت ولم يعد فيها رجال سواكم أنا لن أقول عليكم أشباه رجال ولكننى أقول بالفم المليان بأننا لم نجد فيكم رجلا واحدا عاقلايقف مع الشعب الليبى, عرفناكم كلكم لصوص حاقدين مغرورين , تتصرفون وكأنكم خلقتم للحكم . والله لو عقل الدهر لرجعتم رعاة حفاة كما كنتم. وان غدا لناضره قريب. هل تضنون أن ليبيا قطيعا من الأغنام يسير وراء من يشتريه ؟ ان الشعب الليبى حارب الأتراك بقيادة عبدالجليل سيف النصر وحارب الطليان من جنوبه الى غربه الى شرقه ولن يضيره أن يحاربكم فما أنتم الا ذيل قبيله. أولاً عمرنا ما حكمنا ليبيا, معمر و شلتة هم الي حكموا سوا كانوا من القذاذفة و من القبائل الآخرى.. و كلامك هلي تقول فيه يدير الفتنة بين الناس. و كلا مننا أحنا ماناش أشباه رجال " أنت ما قلتهاش" و الله يا مصطفى البركي لو ما يقولوا الناس عيب الواحد يوريك أشباه الرجال "ليس دفاعاً علي معمر". لكن رد بالك يا مصطفى.. راك بالطق في ناس أبرياء من هالقبيلة و راهوا والله يدعوا عليك" أنت عارف دعوة المظلوم" والا يقولوا لظناهم ياخذوا حقهم منك و الا يحكموا الناس عليك.
القذاذفة الي حاربوا الطليان مع أولا سليمان و غيرهم في القرظابية و غيرها من المعارك و الي شردهم الطليان راهو قاعدين يردوا الظيم و أولاد أصل.. و كانك تشوف في حفنة من القذاذفة زي ما قلت علي بعض من المقارحة و و رفلة يديروا فالبطال .. نقولك صباع يديك مهنش كيف بعضهن.

لم تسلفونا خيرا ولاتطمعوا أن نسلفكم خيرا, سنحاربكم بكل مانستطيع وفى النهايه التاريخ يقول لنا أن النصر للشعوب , اقرؤا التاريخ أيها الجهله لتدركوا أن ليبيا ليست عقيمه لا تلد الا القذاذفه, ليبيا ولاده وسيخرج من بين أبنائها من يذيقكم طعم الظلم الذى سقيتوه للشعب الليبى. قد يقول قائل منكم أن الحكم بايديكم ولن تتنازلوا عنه, فأقول لكم ماقاله عز وجل (اللهم مالك الملك تؤتي الملك من تشاء وتنزع الملك ممن تشاء) والله موجود وكما مكن عقيدكم المريض لقادر على نزعه والله غالب على امره ولكن اكثر الناس لا يعلمون.
ليبيا لم تلد غير القذاذفة. بل بلعكس . ليبيا ولدت عمر الختار المنفي شيخنا و عزة ليبيا, و رمضان و سعدون السويحلي من مصراتة و خليفة بن عسكر و سليمان الباروني من الجبل الغربى الأشم و غيرهم كثر.
و ولدت أيضاً بعض قليل من الحقاد و خالقي الفتن مثلكم.
و أنشاء الله ما يعطي الملك لك يا مصطفي لأنك حتحرقها بالنار حرف من معمر.
وأنشاء الي يدير شر و بطال في الناس يرد عليه و على عيوله يارب ياقدير.

ملاحظة : دفاعي ليس على معمر وأعوانه و لكن على القذاذفة الي انا منهم.

و أحكموا ياناس

قذافي أبن قذافي


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home