Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

عـندما تصبح الدولة مجرمة

خرجت مساء يوم قريب لشراء حاجة من منطقة شارع بن عاشور بطرابلس. حيث توجد بضع محلات للمأكولات والحلويات الفاخرة ومحلات للملابس وغير ذلك .. وكانت المفاجأة ... عدد من الاطفال الليبين فى عمر الزهور يبيعون أو فى الحقيقة يحاولون أن يبيعوا شيئا من مناديل الورق الصغيرة .. (كلبنكس) ويتسولون ويتسعطفون من يتوسمون فيه خيرا من المارة.
هنا تذكرت ماساة أطفال شوراع .."بالرازبل" ايام زمان .. فقررت أن اغامر وأتحقق من عينة مر بي وطلب أن يبيعني كلينكس "واللي تبي تدفعه أدفعه" .. الطفل ولد ما بين العاشرة والثانية عشرة بحد أقصى ودار بيننا الحوار الاتي .. لعل السيد سيف الاسلام يفعل شيئا قبل أن ابدأ " بشرب البحر من الساحل الليبي حيث أنني من الليبيين الذين لا يعجبهم طغيان ابيه .. ولكن هذه عينة من جيل انتجه ابيك ياسيف .. بعد أن اشتريت..
الطفل: زيدني ياعمي.. والله ما عندنا باش نتعشوا
أنا: أنت وين بوك وعلاش قاعد ادور فى الشوراع فى الليل؟
الطفل: أمي باعتتني بيش نجيب فلوس لان بوي مات وما عندنا حد
أنا: أنت تمشى للمدرسة ؟
الطفل : أيه نمشى للمدرسة المركزية وناجح للصف السادس لكن توا عطلة .
أنا: عند ك إخوة؟
الطفل: ايه احنا اربعة وخوي الكبير عمره 15 سنة وأسمه عبدالرؤوف
أنا: وين أمك؟
الطفل : أمي فى الحوش والله يا عمي معندنا شي وأمي متقدرش تخدم واحنا بنضيعوا
أنا: معندكمش حد والا معاش والا فلوس؟
الطفل: أمي اتقول نحصلوا فى تسعين دينار مازلنا ومش عارفة وين نحطهم ميسدوا شئ
أنا : أنت شنو اسمك .. ونبيك تقول الحق؟
الطفل: " بحماس وبراءة على أمل أن يكون ورائي شي من الفرج "ميلود محمد دحقول
أنا: شنو اسم والدتك؟
الطفل: كميلة عبدالله
أنا: وين تسكنوا
الطفل : شارع "جمال عبدالناصر" زنقة بن الهمالي"
أنا : باهي؟ توا لكن ممكن نبعت حد والا يجيكم حد .. أنت متأكد من كلامك ؟
الطفل: ياريت ياعمي نلقوا حد يساعدنا
أنا: باهي لو كان نعطيك شوية فلوس تمشى تروح وتسيب الشارع وتعرفهم لأمك؟
الطفل: باهي ياعمي والله انا مانبيه الشارع لكن الله غالب

أعطيت الطفل خمسة دنانير وراقبة .. فشكرني وهو يقول ان شاء الله بصوت خافت .. زعمه فيه حد يعدل علينا .. كان نبراته البرئية يائسة .. يائسة متشككة في من أكون .. يائسة من الناس .. يائسة من المجتمع .. يائسة من دولة يأتها المال النفطي الساهل دون حساب. اليس لمثل هؤلاء نصيب . ولعلها ببراءة طفولتها لم تيأس من رحمة الله ..... ياريت يا "دكتور سيف" قبل ما تشربنا من البحر.. تبعت حد لهذه العائلة المسكينة قبل أن ينحرف ابناؤها من فقر الجماهيرية الغنية وتتلفت شوية ودور فى طرابلس وبنغازي والزاوية ودرنة وسبها وخليك من لندن والجزيرة والبي بي سي دور بعيد عن الطرق الرئيسية وبعيد عن كورنثيا وشف ليبيا الحقيقة . وتشوف ميلود وعبد الرؤوف وأمهم ومن غير ما يمشو قدامك" الانتوراج" . بلكي شوية عمل خير تلقاه لقدام .... وتوا سامحني انا ماشي للكورنيش باش نشرب .. لان بوك مش عاجبني وبوك دمر البلاد والناس .. واللي خربه بوك فى أربعين عام انت داير روحك بتصلحه ..... ونفوض وربي يفرج علينا منك ومن بوك .

مواطن من قلب طرابلس .. طبعا خايف يذكر اسمه ليطبوه اجماعتك .. وبالمناسبة انا ذكرت القصة بالاسماء على أمل أن يكون هناك شخص فى موقع مسئولية فى قلبه خير فيفعل شي لهؤلاء المساكين .. والا حتى يتوسطهم عند بلغاريا بلكي يحصلوا الجنسية البلغارية ويفتكوا من جماهيرية القذادفة التى اصبحت بحق "دولة مجرمة" .

عبدالله المتوكل


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home