Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

شباب بنغـازى البرقاوى... لله دركم اضحكتمونا

بسم الله الرحمن الرحيم
انتكلموا بالعامية المرة هذى بلكى البدوسكة يفهموا شوية(البدوسكة كل انسان لم يعرف الحضارة) والله ياشباب برقة ظحكتونة الله يسامحكم لين تمينا انقرقروا على جوكم السمح
قاللك سكان برقة الاصليين ....خوذلك هى ...هى تفضل ...جابت برقة
يا اسمكة راهى برقة ماكاينش يسكنوا فيها العواقير ولا السعادى وامشى تعلم واقرا
سكانها الاصليين تكلموا عليهم اصحاب العلل اللى يفهموا
امشى اقرا لابن بطوطة واصحاب العلل لخرين زى ابن الاثير وابن كثير وابن جرير
سكانها لما جنها الفتوحات الاسلامية كانوا بربر وخليط من بقايا اليونانيين والاغريق
وتكونن بعدها قبايل عربية من الفتوحات والهجرات كهجرة بنى سليم وبنى هلال
ولما تحكى عل الملك السنوسى امشى شوف من اللى كاين ايلقق
موش بعض الناس اللى فى برقة اللى قالو لقرسيانى....مرحبتين بكازى روما...من غيرا مافيش حكومة
وقالوا لادريس .....بجاه اللى جاب التوحيد.....ربى يخللى اولاد السيد
وبعدها قالولا ...ادريس ولا ابليس
ونسيتوا اول من زيط للثورة منو.....ومعسكر قاريونس شاهد عليكم
وبعدا قالوا للقذافى بوادى لاباسين جرود....ايهدوا عل النار ابارود
وطبعا انا مانقصد كل سكان برقة طبعا فيهم ولد الاصل والشريف
ليبيا كلها من اولها لاخرها فيها اللقاقة والبصاصة وفيها اولاد لصل
وتبوا اديرولنا برقة هيا بوها وكيالها تى بالله فكونا من الدفنقى
انا انتشرف بهذه المدينة اللى انا من سكانها ومافيش حد يجمّل علينا بسكنتها سكننا فيها بعرقنا وجهدنا وكفاحنا ومانبيش انقول ان هلها كانوا متاعين زرع ورعى مايعرفوا شى لين نورناهم
لا موش انا اللى انقول هكى
ومن زمان قالوا.....الناس بالناس والناس بالله
ؤكلام المريوح اللى كتب الكلام هذا ويسحاب روحة من احفاد سيف ابن ذى يزن ولا ملاعب الاسنّة ويفشك علينا بالسعادى والعواقير اللى نحترموهم بس ماايتعالوش علينا.....ؤكيف ماقالوا المصاروة.....كلنا فى الهوى سوا
الكلام هذا ذكرنى بواحد بدوسكة متخلف.....انهدرز انا وياه على قصص الانبياء ؤبعدين طلعلى بطامة ظحكت منها لين خلاص حتى الدوة معاش قدرت تطلع منى والعيون قعدن يرقرقن
القصة ومافيها كنا انهدرزوا على سيدنا صالح عليه السلام وقصة الناقة متاعة
ؤيطلعلى بالقنبلة ؤقاللى تعرف ناقة سيدنا صالح من قتلها قتلة بحسن نية قتلها اشقى القوم
قاللى لا
قاللى قتلوها العواقير
قتلة ومنين جبت هالكلام يابوبن اخى
قاللى ربنا قالها
قتلة وين
قالى متقراش فى الاية اللى اتقول
فقال لهم رسول الله ناقة الله وسقياها فكذبوه(فعقروها) ..وفعقروها معناها العواقير
ؤخش خيكم فى حالة من الظحك اللى ماظحكتش زية لين شفت البدوسكة متاع شباب بنغازى البرقاوى
والبدوسكة ياخوتى والله مانقصد بيها عرب برقة بس انما كل واحد متخلف متعصب لقبيلتة وداير روحة النمبر 1 هذا هو المقصود من كلامى
واللى احلى من هكى ساوى بين الروافض وبين عرب الغرب ويبى ايطلع غرابة درنة والمنطقة الشرقية اللى طاحوا عليهم بيش ايخلصوهم من ظلم الجوازى
انا معاش نبى انكثر الدوة مع المتخلفين ؤمعاش نبى انرد عليهم هالبلاعيط
بس نبىكم اتخشوا فى دوامة من الظحك على كاتب مقال ..شباب بنغازى البرقاوى والرابط تلقوه لوطة كيف ماهوا مكانهم لوطة اسفل سافلين...(*)
واللى يبوا الوضع ايتغير بيش ايبينوا خيابهم ودفنقيهم واللى نحنا نعرفوه قبل غيرنا.

عدو المتخلفين والعنصريين اللى موجودين فى كل ليبيا من شرقها لغربها ...
ولد البلاد
________________________________________________

(*) http://www.libya-watanona.com/letters/v2007a/v07jan7l.htm


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home