Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

حزمة كرناف

والله يا جماعة انا كنت متبغدد في نفسي وساكت من فترة وحاط راسي بين الروس ونراجي في سيدنا قطاع الروس ولكن انفجرت مرارتي في اليام الاخيرة ومعادش قدرت نصبر على الحال الليبي الصعيب.

توا والله فعلا نحنا الليبين صدق اللي وصفنا بكلمة انا حزمة كرناف. وراهو موش كرناف عادي احني كرناف من نوع خاص. يابس وخشن ومكرنف وياحليل اني يجي بحداه والا اللي يمسه يخبشك ويجرحك وموش هكي بس ويتركب فيك مناوشه وموش هكي وبس ممكن يطاردك ويتركب فيك زي الجدري..

راهو حني الليبين من زبيبة نسكروا. زمان كان الشرب وبعدين طحنا في السبيريتو وبنزينة الطيرات وتوا غير عطيني زبيبة نشمها موش لازم نمضغها، ولما نسكروا ربي يستر منا وعينك ما تشوف الا النور يابوحميد.

شنو هالحالة طايحين في بعضنا ناكلو في بعضنا ونتهاوشوا زي الهامعين. وين الأدب والتربية. توا راهو احني متركبين في بعضنا وكلنا راهو مقهورين ومستكردين من الكابو الكبير وجميعة اللجان وفروخهم. توا لو كان عندنا سلطة على بعضنا والا حكم على بعضنا، تي والله العظيم رانا توا نكنو اسوأ من الكابو الكبير وجميعته ومن المرحوم المجدوب والسيد كوسا وخوه خيار وبن عمهم بطيخ. وراهو بعدين نبدوا نقولوا يا حسره على ايام مكتب اللجان.

توا شوفو اللي يسموا انفسهم مثقفين الليبين كيف متركبين في بعضهم. نار شايطه يا خوي نار شايطه. وين احمد سعيد وايام صوت العرب؟ ياراجل والله شئ يحشم وراهو لا حشم ولا جعره. تستور يا جدودنا جماعة داحس والغبراء. نبوا نقوللكم راهو ما تخافوش علينا مازلنا حمشين وشجعان على بعضنا البعض ومتاعين عراك ونشاف وحروب فيما بينا. نحنا احسن خلف لافضل سلف، وراهو جيناتكم الاصلية العربية الداحسية والغبرا ما اندثرتش وما تخافوش على تراثكم العربي الاصيل.

نحن الكرنافيين الليبين قدها وقدود. مشيطينها في بعضنا (نار ياستعمار) بش لما مشي الاستعمار هاوينا تركبنا في بعضنا ونار قوية نحرق القريب والبعيد. وتستور يا سيدي الشعاب.

اللي يسموا ارواحهم معارضة ليبية راكبين في بعضهم واللي يسموا ارواحهم مثقفين طايحين في بعضهم وبعض كلامهم فوق السرة وبعضه تحت السرة والله يستر والليبين اللي يقروا ويعلقوا حتى هما تعلموا كيف يفشوا غلهم ويسبوا براحتهم.

وقالك اصلاح قالك. تي كيف تصلح كرناف يابس ومتعكرش ومعوج. نوا انا ما نبيش نجيب قصة فتلوة الكلب اللي حطوها في قصبه وبعد اربعين يوم وطلعت ... كيف ما تعرفو.

عيب يا ليبيين حشمتونا وضحكلتو علينا الدنيا.

والاستاذ فلتان والمفكر علان، والدكتور ما نيش عارف اسمه والمحامي اللى فرحان بروحه. متركبين في بعضهم وممكن حالهم يوصل لحال جدهم العربي الحطيئة اللي بدا يهجي في الناس وبعدين طاح في بوه وامه وبعدين رد على رويحته لما شاف وجهه في المراية. على الاقل جدنا الحطئية اهو كان صادق مع نفسه لما شافها في المراية. زعمه هالجميعة عندهم مرايات والا نطلبوهم طلبيات خاصه بيهم؟ والله المرايات على حسابي ياجماعه اذا كان تبو تبعوا اثر جدكم وجدنا الحطئية بيض الله وجهه.

وبعدين العتب على جماعة المواقع الليبية اللي يحسابو ارواحهم يقدمو في خدمة للبلاد بفتح ابواب مثل هالمواقع للسب والشتم. وخوذلك واحد زي متاع ليبيا وطننا والا موش عارف شني. طالق الناس على بعضها البعض يتهاتكوا وهو فرحان بروحه ويحساب امه ما جبيتش حد كيفه.

ياراجل تحشم على وجهك واجعر وتحمل شوية مسئولية. ونحنا الليبين كيف المعيز اللي طاحوا في برسيم والا على قولتهم الجمل اللي طاح في باستي. والا الكرناف اللي تنقع في اميه حتى انتفخ.. وخوذ عندك ياواد.

والله بغددتوني وخليتوني نخرف وراهو كان ما تبطلوش راني توا نتحول الى كاتب ومثقف ونتركب فيكم واحد واحد.

تحشموا على وجوهكم واستحوا والا راني توا نتحول الى كرنافه ليبية داحسية غبرا وياويلكم وقد اعذر من انذر.

متبغـدد


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home