Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

اتفاقيات عـظمى لغـسيل الأموال

ماشاء الله على شلقمنا!! منيسترو أفّاريات برّانيات باهي هلبة والله.. وزير خارجية كيفه ماهناش بكّل في الموندو كله... اتفاقية دولية نمرة واحد... ما بين دول عظمى ماشاء الله... عاد توا أحنى نسموا أنفسنا عظمى مافيش باس... مساحة بلادنا زوز ملايين كيلومتر ومواطنينا فوق الخمسة ملاين ودرنا حرب مع لاميريكا والفرنسيس والمصاروة والتشاديين والأوغنديين والتوانسة والسييرا ليوني والإنجليز الملاعين... وأجبرناهم كلهم باش يسلموا ويعملوا معانا اتفاقيات. لكن عاد خالتك "جمهورية سان مارينو" امنين جتها العظمة؟ يا ناري...

هي يسموها "جمهورية طوابع البريد"... سان مارينو مساحتها 39 كيلومتر مربع بس وعدد سكانها ما يوصلش حتى 39 ألف بنادم... وموقعها في وسط جبال إيطاليا... وشهرتها في العالم في طوابع بريدها. شوية عصير وشوية خنازير وشوية مصارف غسيل أموال وشوية بضائع تهريب... لكن المهم أنها مركز رئيسي لعصابات المافيا الطليانية. وطبعا شلاقم كان سفيرنا عند الطليان زمان أيام الحصار والمشاكل... ويعرف البلاد كويس وعنده اصدقاء هلبة في ايطاليا... وفي كل التخصصات الاستراتيجية.. أماللا..؟!

باهي إحنى توة قررنا باش نبيعولهم غاز ناتورالي لكن شنو نستوردو منهم؟ وباش يخلصونا؟ بجلود حللوف زعمه؟ لازم عاد يسافر وفد كبير من حكومتنا باش يشوف شنو نعملو معاهم ويجينا وفد كبير منهم وبعدين ساهل... هدا الل قاله شلاقم.

أني إللي دايخ فيها شنو دخّل سيدي سيالة في الموضوع... الراجل مش يعرف يقرا؟! وإلا كبر في العمر؟؟ وإلا زعمه تعليمات عليا وصلت من اللي يقولوا عليه "كابو المافيا الليبية" الدكتور محمد عبدالمطلب الهوني... مش غريب!! خاطر الدكتور صاحب شلاقم واجد وفيه كلام يقول أن الدكتور يحب يستثمر أمواله في ليبيا عن طريق سان مارينو... وكان لازم يعملو اتفاقية حماية استثمارات... عاد شنو دخّلنا إحني في الشفاشية والإقرارات.. وابصر كيف...

لكن فيه واحد قالي حاجة غريبة.. الدكتور سيالة الله يبارك فيه، راجل فنان وكان متخصص في تصميم وطباعة طوابع البريد امتاع القادئد.. قصدي امتاع الجماهيرية (ياو ودّي كيف كيف!) وأن الطباعة كانت دائما في إيطاليا.. موش عارف زعمه في شعبية سان مارينو العظمى الصامدة؟... الواحد موش لازم يصدق كل حاجة يسمعها خاطر سوء الظن موش باهي!

عاد ما تقولوش علي أني أنكشّ من كل حاجة... والا اني موسوس... لكن بصراحة الواحد مرات يتلخبط وما يعرف شنو يقول... وزي ما قال التونسي: تحب تفهم ادّوخ!!

يقولو أن أيام سيدي شلاقم في الخارجية أصبحت نعدودة... وأنه يحب يودع وزارته بتعيين حوالي خمسين سفير جديد (قالوا هو بروحه ماشي سفير أشبح وين؟)... البعض حقاني والغالبية واسطات علشان خاطر عوينات فلان وعلان... وبعض منها علشان السترة خاطر فيه هلبة مسؤولين يحبوا يهربوا برة رسمي... البلاد تغيرت ياكبادي... والبيزنس قعد صعيب شوية! وكثرة المراقبة والتدقيق والتقصقيص على كل شاردة وواردة... وكثرت الناس اللي تحشر في خشومها في كل حاجة... منين جبت السيارات هادي كلها؟ ومنين ليك هالحوش؟ واصغارك كيف يقروا برة؟ الحاصل بلاد ما عادش تنعاش بالنسبة للي عرقوا وخدموا على ارواحهم وداروا قريشين... وكله بالحلال!!

السنيور عبدالرحمن العبار المنيسترو امتاع العدل امتاعنا زمان والمتخصص في الفورتو والخطف تعيّن سفير في ماليزيا... جماعة المعارضة اللي غادي بالله ياخدوا بالهم... وطبعا علشان ولده ماشاء الله عليه مؤهلاته أنه زوج كريمة السيد الجارح (مانيش عارف لواء وإلا دكتور) اللي هو عم سيدة الجماهيرية الأولى، عينوه قنصل عام في تشيكيا... وقالوا زعلان ما يبيش يمشي وقال يايعطوه سفارة بحق وحقيق يا بلاش... أني نقول بلاش خير!

وقالوا فيه سنيور كازي كبير من اللجان التورية حيمشي لدولة قرنقة.. عليشان لونه سمراوي شوية يمكن تكون الغابون ويمكن يكون اسمه عبد(...) الشريف... المصيبة الباين إن حكومة سيدي حمد بن ابراهيم التشادي طاح سعدها.. قبل كان يوقف في وجه كل تعيين نين يطيب خاطره! لكن توة شوره الجماعة ورقوله وتمت له!! انقولو انشا الله...

وفي الحفظة الجاية نحكي لكم على بقية السفراء القطوطة.

الحاج الطرابلسى


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home