Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

الحرب اللي أخدت أتريس الليبيين

يحكو لعزايز والشيابين لولين على ان زمان صارت حرب كبيرة بوكل ولعدو حاصر ليبيا من كل جيهه؟ يعنى لعدو اتفق على ان لازم ايخشو لليبيا اوياكلو خيراتها ويغتصبو نسوينها. يقولو الناس لولاه ان الليبيات كانو شى ماصارش بوكل من الجمال والاخلاق والتربية اوكان فى ليبيا خير واجد اوهذا اللي خلاء العدو يغزو ليبيا.
ايقولو الناس لولاه ان الليبين وصلتهم الدوه بان العدو متربص بيهم وعاد حتى هما قررو ان ايدافعو على بلادهم وارضهم اوشرفهم واجتمعو كل الليبيين مانيش عارف كيف اجتمعو ولا كيف اوصل الخبر اوقبل مافيش لا موبايل ولاتلفون زى توى (ليبيانا والمدار واذاعة القنفود )المهم عاد اجتمعو ولكن زى مايحكو ايقولو مافيش حد محضرش هلجتماع كبير وصغير ارجال ونساوين وياسيدى عاد من اجل الوطن كانو ايقولو الناس لولاه الوطن قبل البطن هذي مقولتهم الواحيده اللي جمعتهم من كل مكان وايقررو ان يطلعو لهذى الحرب اومايقعد حد يايعيشو كلهم ولاء ايموتو كلهم فى ارضهم اوبشرفهم اوباش عاد مايقعدوش مضحكة واحد جايبهم اوحد رافعهم اوبره من هاسيرة.
ولكن عاد بعد مااكمل الاجتماع اجمعه الاقو ان فيه اعجائز وشيبين واصغار او رضع واللي مريض والا مكسر او غيره قالو نخلوهم ونشاءالله مايوصل فيهم حد ولكن طلعو جماعه تانيين فيهم المسبل ولاي داير روحه امريض والاي كسر رجله باش يقعد لانه خائف والاي اقعد يبكى قالو اتريس خلوهم فكونا من دعوتهم والمهم ياسيدى لبلاد مقعدش فيها راجل امصحصح اولا مره امصنعه كلهم امشو وتوزعو على الحدود الكبيره فيه الي امشى لشرق اوفيه الي امشي للغرب اوبره عاد الحدود ماهيش غابيه اعليكم.
اوصارت الحرب او ماتو كل الليبيين تريس ونساوين او مقعدش منهم غير هادوكا المرضى والعاجزين والخايفين والملايخين اوهدوكا اللقاقين والشحاحين واللي عاد على ابطونهم باعو وطنهم.
اوصل عاد العدو والقى هالمجموعة وبدا ايغربل فيها من جديد غير اللي ايبان اعليه بالكش ايولى سجاع ولا باين اعليه ولد ولا بو واحد من الي حربهم كلهم قتلوهم النهايه ماقعدش حد الا هدوكا اللي علنو استعدادهم بتعاون مع العدو مقابل بطونهم يعنى باعو الغالى والرخيص.
والبائن ياسيدى هذى مش خرافة ولكن هى الحقيقة لان اللي انشوفو فيه تو ايقول هكى؟؟؟؟؟؟ تعاد بعد هالخراب والقهر والتعديب والكبت والانحطاط والانحلال والقتل العشواى وغير العشواى والتفرقة العنصرية والعربية والافريقية والامازيغية والاسرائلية والصهيونية وتغليب القبائل الاقل اهمية وادخال الجنسيات الوهمية وتبدير الموارد النفطية على المصالح الشخصية والملاهى اليلية وجرائم الخطوط الجوية ومحاولات الوصول الى الاسلحة النووية ناهيك عن انعدام البنية التحتية لا كهربا ولا اميه ولا طرق ولا اراضي زراعية وكان القيتها كلها نفايات كيماوية الناس تربطهم امراض سموها امراض عصري الليبيين تلاقيهم منتشرين في العالم للعلاج مهمش الشوى كل هذه الاسباب اومافيش من ايقول اه شنو هذا الي ايصيرالي فى البلاد ساكت والاى بره ايغنى على مواله تالي ايصير فى بلادنا حاجه غريبه بوكل تحتى جيرانا عاد مره مره هكى ايجربو انابشو بالاكش ايحصلو حاجة اتعاد زى مايقولو الناس الي ماتو فى هاذيكي الحرب ايقولو خنقت الكلب خير من قتلته؟؟؟؟؟؟ تمافيش راجل طلع يوم تكلم اكلام حسس فيه الناس ان قضية ليبيا واحدة وان الهم اللي ايعانو فيه واحد مافيش راجل صادق فعلا من احفاد الى ماتو فى هذيكى الحرب ؟؟؟؟؟ كل الي طالعين اعلينا يتجارو على مصالحهم الشخصية وكلهم بايعين الوطن من اجل البطن؟؟ تهادا هو... ليبيا يبو ايديروها كوبرى يركبو اعليه وخلاص.
تحتى الناس قبل تحسابها عندها اتريس ايوتو فى ارواحهم باش ايجو اينضمو البلاد طلعو حتى هما خراف زاي مهمش من احفاد اتريس لاول طلعو كلهم على بعضهم الي منهم سمسار والى منهم افقى متعرفاش شنو ايخربش ولا شنو يبى ولا تعرفه متعلم ولاجاهل ويخدم ولا بطال ولا صاحى ولا سكران ولا لابس ولا عريان ولا عاد تعرفه جيعان ولاعطشان؟؟؟ هادو اللي بره لبلاد والي عاد فى لبلاد نحسبوهم فيهم الخير طلعو حتى هما زي اللي فى بلاد العدو ياسيدى عاد كلهم علي بعضهم مايخدوش فى الكلام اويحسبو فينا الشيابين وعجائز منفهموش فى ها دوه قلنالهم نبوكم يد وحده او كلمة وحده فكوكم من الكلام الزايد او تطويل الخيط ايضيع اليبره والاي اديرو فيه ماينفعش؟؟ ياللي ملحد واللي مسلم والحمد لله واللي ايهودى والعيادو بالله واللي مطرف واللي على ليمين واللي على الايسار مزال ايتبع فى الروس واللي ايتبع فى البلغار واللي دائر لحية واللي ماشى راسه عريان؟؟ واللي مصاحب ناس ميعرفهمش واللي عربي واللي مش عربى واللي امازيغى واللي كورغلى واللي تركى واللي تونسى واللي تشادى واللي مش معروفله ساس من راس واللي متعرفلاش لا اصل ولا فصل وبرى عاد من ها لكلام فى البلاد ياسيدى تلقى الثورى والقواد واللقاق والبوليس اللي فى روابط الشباب واللي فى الحرس البلدى واللي فى الحرس الثورى واللي فى الحرس الجمهورى واللي فى الحرس الشعبى واللي فى الحرس الجمركى واللي فى حرس الحدود واللي فى حرس البوابات من غداس لمساعد واللي فى القوافل الثورية الثابته والمتحركة والسرية والعلانية واللي فى حرس معمر وسيف وادرارى كل واحد عنده من يجرى اوراه حتى خالتك صافية متتحركش الا معها الكتيبة الامنية نهيك عن الانسة عائشة لا تخرج الى الشارع قبل زيارة الكوافير فى اكبر الشواع الباريسية.
والخرافة طويلة ولكن اللي صار فى بنغازى ايقول بالاكش فيه واحد من احفاد اتريس لاول وانشاء تطلع هذه خرافة اوبس.
مع احترامي للمخلصين والوطنيين.

الغـزال


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home