Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

تعـارف

عبدالرزاق وعبدالرازق يلتقيان في أحد المطارات الاوروبيه...

عبدالرزاق: السلاموعليكوووم... الاخ عربي ؟

عبدالرازق: انعم عربي ومن بنغازي .

عبدالرزاق: اي.. اي.. عرفتها، خطمنا عليها واحني مروحين من مصر معا المنتخب الوطني. بس عليها منظر مالطيارة في الليل مش عادي بوكل.

عبدالرازق: مايغركش شى، امغير الليل سترا... وامنين الاخ؟

عبدالرزاق: اني من طرابلس.

عبدالرازق: آه... بلاد التفاح الباهي، وشن صار معاكم؟ انشالله غير لعبتو كويس؟

عبد الرزاق: حشمة،والله الا حشمة... طلعونا مالدوري لول، وروحنا نهزوا بنقطة وحدة...الا بالحق، سمعنا في الجزيره ان في عندكم مظاهرات، وقالوا في وحدين ماتوا... صحيح هالكلام؟

عبدالرازق: لامافيش حاجه... اشوية سوء تفاهم بين الحكومة والشرطة عدا فيها إحداشن واحد بس.

عبد الرزاق: حشمة والله الا حشمة ، الله ايكون في عونهم .

عبدالرازق: لا عادي، واخذين عليها، بس قوللي شنو الجو عندكم، قالوا فايح؟

عبدالرزاق: مشكلة كبيرة هلبة، ومصيبة جت على روسنا.

عبدالرازق: خير شنو فيه؟ حسينك شغلتني.

عبدالرزاق: طارق ياراجل.. طارق.

عبدالرازق: تي منو طارق هظا؟

عبدالرزاق: تي طارق التايب... قالوا مصاب، وممكن مايصيرص من نقلتا لليوفي... يا شماتة الميلان فينا.

عبدالرازق: آه قصدك طارق التونسي؟

عبدالرزاق: تي هادا ليبي ميا في الميا... واحسن لاعب في افريقيا.

عبدالرازق: والله بعد تهديمة نادي الاهلى، الواحد معد جاتا نية ايتبع الكورا.

عبدالرزاق: انشالله حتى انتو عندكم الاهلي، صار معناها اهلي عندكم واهلي عندنا واهلي قدا مصراته.هههههه. تي خيرك متغشش ياصاحبي، شنو بيك؟

عبدالرازق: شاغليني هالعيال الصغار، والنساوين اللي صايدهم الايدز.

عبدالرزاق: اى والله الا حشما، اسمعناها في الجزيره. هادا كوله بسبب السطالايت.

عبدالرازق: لاياراجل، هظوم اعيال وصبايا محترمات، المأساة مش هنا، المأساة ان الحكومه عطتهم افلوس بيش ايعالجوا بيهن برة، عدوا شروا بيهن سيارات، على قولهم الحي اولي مالميت.

عبدالرزاق: والله ماعندهم حق... المفروض شروه بيهن حافلات.

عبدالرازق: حافلات؟؟؟؟

عبدالرزاق: اى... حافلات، ويعبوهن تلاجات، ويعبوا كل تلاجة عجل سيارات.. امالا كيف.

عبدالرازق: ... خلينا في المهم،احكيلي ع الجو الفايح اللي عندكم، وزعما التأشيرة ساهلة بيش الواحد يحصلها؟

عبدالرزاق: تاشيرة شنو... العرب يدخلوا من غير تأشيرة، والافارقة من غير جواز مرة واحدة، بس برا لشارع الرشيد،وانت تلقى اللي خاطرك فيه، بناويت، حشيش، هروين...

عبدالرازق: حسك دوختني يا بوصاحب، لكن قوللي طرابلس تجي وين من مزارع شبعة؟

عبدالرزاق: مزارع من؟ انت عليش تحكي؟ اني من طرابلس الغرب .

عبدالرازق: صار انت ليبي، تى قول هكي مالول، مرحبتين بخويا وولد ابلادي، بالاحضان...وشن سماك ربي بلا صغارا؟

عبدالرزاق: العبد لله عبد الرزاق، ويسموا فيا تيحا.

عبدالرازق: قوللي يا تيحا، مالا اكيدا تسكن اقريب من سيدي السايح، وين ماطاحت الطايرة اللي جايا من بنغازي؟

عبدالرزاق: طيارة؟؟؟ طايحة؟؟؟ والله العديم ماعندي بيها علم. وهدى جابوها في الجزيرة؟

عبدالرازق: انعم جابوها ياتيحا كم مرة، بس اكيدة كنت اتبع في الدوري الايطالي هذك الساعة... ماعلينا شن قاعد ادير في مالطا؟

عبدالرزاق: ماشي لسويسرا، نجيب في سيارات وحافلات، وانت فيش ادير اهنى؟

عبدالرازق: انقولك بس ماتوقلها لحد، سلم تيحا.

عبدالرزاق: احكي ياراجل سرك في بير.

عبدالرازق: انا مقشع لعند السويد، نطلب لجوء سياسي، وانطيحلهاغادي.

عبدالرزاق: شن حسك قلت؟؟؟ لجوء سياسي؟؟؟ باهي عاد، السلامو عليكم، تأخرت على موعد الطيارة... انشالله معرفة خير.

مع تحيات الحسين


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home