Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

مشكلة ليبيا بين تجاهـل الابرار واصرار الثوار

الاخوة الافاضل ...
من الله علي بزيارة الغرب القريب وذلك بعد جهد جهيد بين قرارات اللجان باشكالها وانواعها وما اكثرها وبين مسؤليات الشغل التي لا تنتهي.
والحمد لله فور وصولي الي سكني الجديد والمؤقت كان اول شي بدأت به هو الاطلاع علي اخبار بلادي ... وكم صدق غوار الطوشي عندما قال افتح علي لندن حتي نعرف اخبارنا... ولكن للأسف الشديد فوجئت بالمفاجأة الغير سارة وصعقت بأخبار الاخوة في المهجر... الاخوة الذين يتنعمون بالحرية ويعيشونها ... اقصد حرية التعبير... اخباركم بين سب وشتم في بعضكم البعض ... سب في السرتاويين وورفلة وغيرها... كيف يهون لكم وعليكم بسب بعضكم ... والله انه لعار عليكم.

أخوتي واخواتي الليبيين الاصليين ... ما يجري في بلادي اليوم أمر يتطلب منا التغاضي على الفرعيات من الامور وامر لا يحتمل السكوت عليه ... الناس في ليبيا اليوم بين موظف منكوب معاشه لا يسد اولاده خبزة والتي هي ارخص شي في ليبيا ... الناس في ليبيا فقدوا معني الحياة ... لا هم لهم الا قوتهم اليومي المر.

العبد لله كنت اشتغل محاضر بجامعة من الجامعات وما ادراك ما الجامعات ... مرتبي يصل احيانا الى الف دينار شهريا والحمد لله كنت علي قولة الليبيين نغرف بالكمشة ولكن والله صدقوني لا طعم للفلوس عندما تكون وكانها مسروقة ... لماذا؟ تسأل... لا لم اسرقها بل هي عرقي وحقي المشورع ولكن لان المحاسب اللي يعطي في في الشيك مرتبه مية وثمانيين دينار وسائق التاكسيستي حالته حاله واخي العسكري مرتبه دون الميتين و و و و كيف يا ترى تنعم بالاف؟

اليوم ليبيا اصبحت بلد متخلف في ثياب جديدة ... لا خدمات ... لاطرق .... لاتعليم ... لا صحة ... لا رياضة ... لا ضمان اجتماعي ... لا مواصلات ... لا جيش .... لا شرطة ... لا شئ علي الاطلاق! أما الثياب الجديدة فهي الموبايلات ... السيارات السمحة .... الموضة علي اخر صيحة... التبرج ... الدعارة.... قلة الادب... الساتلايتات... كل ما ينكره الشرع والعرف.

ايها الاخوة الاكارم ... هل فكرتم ولو مرة في ظل هذه الحرية التي تنعمون بها ان تفكروا في الخلاص من هذا الكابوس ... نعم انه والله لكابوس يعيشه اخوانكم واهليكم واخواتكم في الداخل...

ومشاركة مني سوف انقل اليكم اهم تغيير حديث في وضع ليبيا الجديد الا وهو استيلاء الثوريين علي النفوذ السياسي والتجاري في ليبيا ... فمن الواضح هذه الايام في ليبيا هو عودة الثوريين وبقوة في كافة الساحات السياسية والتجارية في ليبيا بعد غياب وربما يكون تحجيم مقصود ... والاغلبية يقولون بان السبب هو عودة العلاقات الامريكية والتمثيل الدبلوماسي المتبادل. فلم لا وخاصة بعد ان اصبحت طز الامس ذل ومهانة وركوع وتهليلات وتمجيدات اليوم.

الثوريين اللي كلهم وبدون استثناء مصلحيين انتهازيين خنابيين غوغائيين جهلة زنادقة كذابيين همهم الاول والاخير الكرسي والمنصب والسيارة والموبايل ... كيف نرجوا من هؤلان ان يدفعوا بالبلاد الي الامام. كل الاموال والثروة والمخصصات الهائلة بددوها وسلبوها وحولوها الي حساباتهم الخاصة في الخارج.... وحالهم حال المثل الطرابلسي .... جمل وطاح في باسطي.

لكي نصلح ليبيا لابد من ازالة كل هؤلاء الزمرة ... لابد من ازالتهم فهم كالسرطان ... ان لم تستأصله يقتلك وحتي الاستئصال لابد ان يكون في المراحل الاولي لان رجوعه حتمي.
استئصال الثوريين امر لا مفر منه لاستصلاح البلاد مهما قالوا ... فهاهو ابوزيد دوردة أمرمن قبل سيده لكي يتفوه بكلمات لتسييل لعاب البناغزة ولكن مفضوح مفضوح ياابوزيد وصدق من قال فيك لوكان بوزيد عمار عمر سواني بلاده... ماذا فعلت في السكة عندما كنت مديرها؟

فهل لهذا النداء من مجيب؟

الي اللقاء في الحلقة القادمة.

ابولعـيد


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home