Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

فرج نجم ومسلسل القبيلة والجامعة... وهلم جرا

يا فرج نجم والنبى فكنا من دراهات الكبد ودوتك على القبيلة ايلى شادنا فيها... وماناقصك الا اتجيب عياد الزليطنى وتبرطع معاه فى اذاعة القنفود.
تى حتى الانكليز راهو مش معدلين عليها القبيلة ويقدر اى واحد يدير فيها اطروحة ويعطوه الدكترة وانت واقف .. لان القبيلة لا تهمهم فى بريطانيا بقدر مايهمهم الطب والفيزياء او العلوم الاخرى التى تستفيد منها البشرية بالله عليك شنو فيها القبيلة باش ادير عليها البروباقاندا الزايدة امتاعك هذه والهيلولة.
القبيلة اليوم فى ليبيا.. ياسيدى بن سيد رز ولحم.. وكشك ..ونفاق.. ولقاقة.. وبصاصة.. وزمزكة.. وكران حبل ...وايلى يدفع اكثر او تكبرله اللحيمة اوتكثرله الرز.. يموتوا دونه.. وشوف فى العراق شنو دارت القبائل لما سقطت بغداد؟؟ الامريكان قعدوا يوزعوا عليهم فى الدولارات باش قدروا ايسكروا افامهم من الغزو ...القبيلة عندنا كانت زمان لما السنوسية الله يذكرهم بالخير... هذبوا القبائل وخلوهم بنادمية ... وصححولهم الاسلام وخلوهم رجالة بعدما كانوا قطاع طرق وصعاليك ويعبدو فى الاصنام الليبية وشوف توا الهرواك القذافى حفيد عبدة الاصنام فى ليبيا شنو قاعد يقول على الكعبة ... وللاسف فى التسعة والستين لما الخاين القذافى وباقى المتمردين وايلى واحد منهم المجرم الجيفة محمد نجم؟ تمردوا على وحدتهم العسكرية وسرقوا السلطة؟؟؟؟ شفت شنو صار ولا واحد فرطاس وقف مع الملك او ولى عهده ..واول برقية تاييد جت من طبرق ايلى كانت القبائل فيها تتمرغد عند رجلين الملك وتقوله انموتوا دونك ونفدوك واحنا واحنا وبعبوص قرد.. واول من ايد الانقلاب شيوخ القبائل ايلى تحاضر عليهم وايلى ايدوا الانقلاب ومتحركوش ولاداروا اى حاجة او حرضوا امتاعينهم ضد الانقلاب؟؟؟... الا عدد محدود من المخلصين واولهم الضابط على عقيلة ايلى قعد يدافع بسلاحة على الشرعية.. ابروحه ليلة الانقلاب فى مديرية الامن بطرابلس (قروبو سيدى عيسى) حتى اخر طلقة واعتقل.. وعلى فكرة البطل على عقيلة هذا من الغرب.. ومع هذا دافع بضراوة وشجاعة نادرة على الملك وولى عهده والمملكة الليبية... اما ايلى امدايريين نفسهم زعماء قبائل الدفنقى.. واخوان سنوسية وكرنكيط زايد.. طلعوا دوة فارغة وفشنك. واثبتوا الطرابلسية ان هما ايلى ليهم شرف الدفاع عن الملك والسنوسية ليلة الانقلاب .....ولهذا ربى سلط عليهم ابليس باش ينتقم من هالمنافقين الجيف ايلى ربى قال فيهم انهم فى الدرك الاسفل من النار وهؤلاء هما نفسهم ايلى طاردوا سيدنا محمد صلى الله عليه وسلم فى الجبال وعارضوا دعوة الاسلام.. وهما نفسهم ايلى قطعوا راس سيدنا الحسين رضى الله عنه وسمموا اخوه سيدنا الحسن رضى الله عنه وهما نفسهم ايلى طعنوا فى شرف ال بيت رسول الله صلى الله عليه وسلم...وهما نفسهم ايلى كانوا يقولوا لاهل البيت :قلوبنا معكم وسيوفنا ضدكم( قمة النفاق والخسة والحقارة والنذالة.. والتاريخ يعيد نفسه اليوم)... وجاينى توا ياسى فرج تتكلم على القبيلة واخلاق القبيلة؟؟؟
الاجلاف هاذم مايبوا ايلا اتشدلهم سوط فى يد ودستور وقانون فى اليد التانية وايلى يلعب بذيلة تعطية النار وتشلطه بيه على مؤخرته... على خاطر البدوى مايفهمش ايلا بالدبوس والعين الحمراء.
وبعدين تى كيف واحد زيك يافرج يتكلم على السنوسية ويدير عليهم ندوة(ندوة نيقولا زيادة) ويمشى ويجى على ليبيا ؟؟؟؟ ايلى يحب السنوسية وايلا هو يقول على نفسه اخوانى ...((انى نتكلم على الاخوان السنوسية ومش اخوان المسلمين بتوع مصروسوريا وليبيا الهلافيت وبتوع التلات ورقات...))لازم يكون زى عمر المختار فى تعاملة واحترامة ووفاءه ودفاعه للسنوسية ومايبدلش جلده مهما حصل هكى الاخوان السنوسية الاصيلين.. وقسما بالله لو عمر المختار اليوم حى وشاف ايلى درتوه فى السنوسية والله العظيم مايضلا الا قاطعلكم روؤسكم ويحشكم حش زى ماحش الطليان.
يافروجة احسنلك توقف مع الليبيين الشرفاء ضد القذافى وتشارك فى اعتصاماتهم وتخليك واضح وتساعد اخوانك فى الكشف عن مصير الناس ايلى انقتلت وايلى انخطفت... زى الله يرده الى اهله.. منصور الكيخيا وايلى تورط فى خطفة القذافى وطبعا عن طريق عملائه من امثال البصاص يوسف نجم؟ .. ايلى كان اخر واحد شاف منصور الكيخيا قبل خطفه من القاهرة احنا فى حالة حرب مع القذافى والحرب الجميع يخشها الطبيب والتاجر والمحامى والجزار والتمرجى والمؤرخ والكناس... حتى تنتهى الحرب ويعود الجميع الى اعمالهم وخصلتهم.
التاريخ مايرحمش يانجومه.. والقذافى ايامه قربت اما محاولة مسك العصا من النص وكراع عند القذافى وكراع عند المعارضة او تكتب فى جرايد المعارضة وفى نفس الوقت تنشرلك العاهرة فوزية شلابى عشيقة القذافى.. مقالة فى جرايد بنغازى ايلى يصرف عليها النظام... او اندير سبلة ان انى رجل مثقف او امتاع حقوق انسان زى للاسف ناس منافقين هلبة ولقاقة.. (زيدان وبوشويقير والقماطى والشامس" ايلى بدى يسكر فى موقعة "اخبار ليبيا" بسبلة تطويرة فى كل اعتصام او مناسبة ضد القذافى وتقول موقعة عنده ماصة اوتشنتيلا ويهرب عليه الكورينتى مع كل اعتصام او مناسبة وطنية ضد القذافى؟؟ اه ياشامس.." وغيرهم..)وقاعدين بين سويسرا والمانيا وبريطانيا ويتفتفوا من سيف الفلوس المخنوبة من ليبيا؟؟؟.. ويقولوا ياناس احنا مادخلناش فى السياسة ..باش ماينحرجوش ويتهربوا من الحديث عن جرائم القذافى او المطالبة باسقاطه.. وتكون سبلة لزيارة ليبيا والجلوس مع سيف ومبعوثى القذافى... ولحفظ ماء الوجه امام الشعب وامام المناضلين الحقيقيين ...هذا اذا كان عندهم مازال وجه.
بالله نبى نسالك سيوال؟...حاق انت تبى ادير ندوة وتجيب فيها ابنة المجرم والسفاح المدعو سليمان محمود ؟؟؟؟؟ رد بالك يانجومه تتهور واديرها لانك هكى اتزعل ناس صيع وزوفريه مايحبوش صنة القذافى وفيته.
اخيرا ايلى يبى يكون مؤرخ لازم يكون محل احترام وثقة من الليبيين.... اما تطفلك وصعلكتك انت وامثالك على تاريخ ليبيا وكتابتك بالطريقة ايلى قاعد تكتب بيها فهذا مايصيرش منه ولايؤخذ عليه لانك قاعد ترفس وقاعد اتبل وتعجن ومش انت بس... فيه ناس هلبه خاشين الموجة وقاعدين يرفسوا ويكذبوا على احداث حصلت فى ايام العهد الملكى ومكانوش فيها صادقين لغرض فى نفسهم...من امثال العتررربى الفاضلى ايلى خلط وجلط فى سرده لاحداث يناير التى حصلت ايام الحكم الملكى ومكانش فيها امين.
يا فاضلى لازم تعرف ان فيه فرق بين كلمة ترفس وكلمة تفسر يعنى فيه ناس تبى تكتب كلمة تفسر فيغلطوا ويكتبوا كلمة ترررررررر...فس.
تاريخنا الحقيقى سوف يكتبه مؤرخونا الحقيقيين والذين عاصروه بعد ان يتخلص الشعب الليبى من الطاغية القذافى وتعود الطمانينة الى نفوسنا جميعا وتكون الاجواء مهيأة لكتابة تاريخ ليبيا.. .
والله ايلا امدرهلى كبدى يافرج..... تنزلى بره.

ولد ميزران


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home