Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

حكايات (6)

"في البداية كانت الحكاية"

كل العام و انتم بخير

تطالعون في هذه الحلقة :
16- النشدة تدل الذاهب، 17- تدل النشدة الذاهب؟، 18- الذاهب النشدة تدل؟!

16- النشدة تدل الذاهب

توقفت سيارة
- السلام عليكم يا جماعة
- وعليكم السلام, تفضلوا
- والله جايين نسألوا على الأخ سليمان صالح, يسكن هنا؟
- سليمان صالح!! سليمان صالح.. لا واللا ما نعرفوش شخص بهذا الاسم!! تعرفوش أوصافه, سيارته أو عمله, ؤ شنو تبوه؟
- ها هي صورة لسليمان, فيكمش حد يعرف صورة هذا الشخص اللي جالس في الجنب؟
- لا لا لا ما نعرفوهش!!
- شكرا السلام عليكم
- وعليكم السلااااام
1- زعمه شنو يبو من سليمان؟
2- و ين ندري عليهم!! ؤ وين ندروا عليه شن مداير..
3- تعال يا ولد بره لعمك سليمان قلله تو جو واحدين ينشدوا عليك..
سليمان صالح: السلام عليكم, شنو سيارتهم؟
1- واللا بالصورة يا سليمان, غير شنو مداير يا سي الحصلة؟
سليمان: لا و الله ما مداير حاجة, شكرا اللي ما قلتولهمش عليا...
1و2و3: عيب يا سليمان نحن جيران..

*   *   *

17- تدل النشدة الذاهب؟

- السلام عليكم
- وعليكم السلام
- أنا جاي من سرت ونسأل على مقر المثابة الأم, مستعجل على موعد مهم.. ونبي أسرع طريق...
- المثابة الأم؟ أسرع طريق, لف يمين وبعدين يسار.. مسافة 400 متر لف يسار ثاني, تلقى روحك في طريق المطار, قبل لا توصل المطار لف يسار على الجسر, وبعدين يمين مع أول طريق رئيسي, وخوذها طول يا بو صاحب, وين ما ينتهي الخضار والعمار تلقاها قدامك..
- هي المثابة الأم بعيدة؟ بعد المطار؟
- آما مطار؟ بعد المطار بهلبة هلبة هلبة..
- شكرا يا شباب السلام عليكم
- السلااام يجيبهالك الله زينة..
1- الراجل ريحته تبيه يوصل سوف الجين!؟..
2- سوق الجبن.. سوق الجبن.. على قول التوانسة.. ؤكان نشدنا على جامع راهو وريناه ودليناه.. تيهذا يبي لم.. لميمة.. قالك المشابة لم.. ؤكان وصل على الموعد حلقلي هاهيه..

*   *   *

18- الذاهب النشدة تدل ؟!

- السلام عليكم
- وعليكم السلام
- والا يا جماعة أنا طحت بين ايديكم ونبي نشري سيارة..
- طحت وين استرحت.. على قيس غطاك مد رجليك..
- و الا شنو نقوللكم أنا ما خليت عليا شيء حتى ذهيبات المرا طمعت فيهم ويا دوبك لمدت خمس آلاف.. ونبي كريهبة على قيس الحال للعيلة والعمل..زعمة 5000 يجيبولي سيارة باهيه؟
- يجيبولك سيارة على كيف كيفك, آهي المازدا.. والا حقها أكثر من هكي ولكن انت قلت ظروفك صعبة معلهش نساعدوك فيها بخمس آلاف.. زود و شوف..
- شنو نشوف .. أنا الحديد ما نفهمش فيه.. وبنعتمد على خبرتكم
- آ.. خبرتنا تقول السيارة عال العال.. كيف جاية من برة.. أوراقيها تامات.. طروفها أصليات.. الهيكل سليم.. والماتور (موووووتس) عسل.. سيارة عيلة و خدمة.. والمازدا معروفة.. زي الحمار.. أنخص وأطلع.. شنو قولك؟
- شنو اجراءات البيع والشراء المطلوبة؟
- لا اجراءات و لا شيء.. قعمز هنا خوذلك طويسة بالكاكوية ونحن نتمولك كل الاجراءات في ربع ساعة, تدفع وتستلم سيارتك.. وتفرهد فيها العويلة اليوم.. شنو قلت موافق؟
- ايه ايه موافق
- وحدة كاكاوية مفيضة هنا..
بعد الاستلام و التسليم
- مش عيب عليك تدف للراجل سيارة مخززة, طروفها امقلدات, وماطورها فايت فيه من الخرط, وواكلة على قلبها لين قالت بس.. بها السعر يا ظالم!!
- يا خوي هذا قانون السوق.. والقانون, زي ما تعرف, ما يحميش المغفلين.

*   *   *

والى حكايات قادمة أستودعكم الله.

البشير بن محمد
albashirm@hotmail.com


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home