Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

فرج الفاخرى.. وأطفالنا وأطفال الحجارة؟؟؟؟

اذا اردنا ان نعرف ماذا فى ايطاليا يجب ان نعرف ماذا فى البرازيل ... واذا اردنا ان نعرف ماذا فى البرازيل يجب ان نعرف ماذا فى ايطاليا ... واشرحلاها عان حالاتو... روح ياناسينى حبك اه ها ها... امغير شنو تلبز وتفترم يافرج ليدز توا فى ناس هللللللللبه .. وجوهم ولت زى الكركم الاصفر.. وخذوها سكاطوا للحمام... ويدوروا على الحبوب باش يزرطوها من التخزريط والرعايش..... لكن المرة هذه .. اممممممم... ماعلينا. ان عدتم عدنا... كلامك يافرورتى على المجرمه ابنة المجرم سليمان محمود ماعندنا مانقولوا فيه ... لكن بصراحة دوتك على جيان كبيداتنا وولادنا وبناتنا للاعتصامات راك شكشكتها يايونس شلبى...
بالله قوللى كانا صغارنا يبو الرقاد والماكله والحنية اماله شنو اتقول على اطفال الحجارة فى فلسطين ؟؟؟ وشنو اتقول على اطفال الانتفاضة امتاع بنغازى الاخيرة ؟؟؟ هذه معناها انت ضد اطفال الحجارة وايلا شنو؟؟؟؟
انت مافيش حد ضربك على ايدك وقالك اتجى مع ولدك للمظاهرات .. وتقدر تقعد اتننى بزلباحتك فى حوشك متبحبح مع ولدك وترضى ضميرك عبر تفريجك لصور الاعتصامات من خلال مواقع الانترنت. واقعد الحس "جيلاطى البنقوينا"... وقرمش "الكوكو برنج".... من بعيد لبعيد.... وكفى المؤمنين شر القتال... لكن ماتكونش زى حرام مكة وتبدا تشرحلى بمنديلك.. زى فهد بلان الله يرحمه.. وتبدا اتجيبلى فى الاعذار الواهية.. امتاع دراه الكبد زى ناس هللللللبه وتحطلى عذر اكبر من دمنقلك.... وعذر اقبح من الذنب... وراهو الشى ايلى كاتبهولك ربى ماعندك ماوين تهرب منه يارى.. والطفل كان ربى يبى ياخذه من اماليه يقدر ياخذه وهو فى حجر امه او وهو فى بطنها .. وهذه حكمته... ووين ماتكون الموت اتجيك يافروجة.. ولو كنت امقعمز بحدا عويدات اتفرمطله فى ذات العماد.. وايلا حديثك هذاعلى الاطفال نقدروا انقولوا عليه بداية لترويج فكرة ان الطفل تربيه امه؟؟؟؟؟؟
وبعدين تعالالى جاى ياحليليف انت وينك امغطس كل هذه المدة ؟؟؟ من مظاهرة بوسليم ايلى اندارت العام ايلى فات وانت مابنتش؟؟؟ ... اكيده حاط واحد درناوى بحداك يقيدلك فى الاحوال.. ومتكىء جنبك.. وتقشرله فى البرتقال الهش.. على خاطر الدراونه.. (عندى الكثير منهم اعز اصدقائى) راهو واخذين بطولات وميداليات فضية وذهبية فى تقييد الاحوال والكلوف. من حيش ماصاروا .. وكانك تبى تعرف واحد انه من درنه .. امغير اساله وقوله: .. تره قول مكرونه؟؟. فاذا قالك مكرونه فهو موش من درنه .. واذا قالك ماكرونيا.. بالياء فهو درناوى... وقياد احوال وحشيشته المحلبية ايلى يسموا فيها فى درنه (زبط الجنة). ان شاء الله بس يافروجه مازعجتش منام سعادتك.
يافرورتى مشاركة اولادنا فى الاعتصامات مفخرة لليبيا.... ولما يوقفلى فى اعتصام طفل زى ايمن حسن الامين (ايلى يشارك هو وبوه.. هذا المناضل الشريف ايلى بشغله وجهده وتفانيه ووطنيته يساوى شغل تنظيم كامل....)(اقسم بالله يخلينى نتحشم على وجهى... ويخلى الطراطير والهراطيل والهفاك.. ايلى يمتنعوا على مجىء للاعتصامات ايلى شناباتهم تقيد ثيران اسبانيولية هايجة.. وهما حجمهم زى الجرادة.. يستحوا على وجوههم... لكن فى ندوة كيف ندوة بنت المجرم سليمان محمود تلقى البعض.. يمرد مرد ويزحف على بطنه وظهره وجنبه ومخاريقه باش يلق ويزمزك ويحضر الندوة .. ولما ينفضح امره.. شوف صحة الوجه وشوف شنى يقول؟؟: يقولك يافروجة: والله ياجماعة سامحوووووونى .. ورحمة امى... انى كنت خاطم من الشارع مع (الواشون) ونبى انخش لمكتبة الساقى على خاطر نبى نشريلها كتاب "كيف تكون فحل على المنادير.. مش على السرير"... وبالغلط انبلطت للكوفة غاليريى.. ولقيت نفسى مقعمز ياخال فى الندوة وراء على زيو (ايلى محسن شعر حواجبه باش مايزبطوشى ويورقوله...) وعجبنى الجو ... ماصح والله... ؟؟.... الله غالب مانقدرش انكملها.
تعرفوا ياجماعة تاريته فيه مخطط كبيييييير.. وخاش فيه فرج نجم ايلى محضرتله المخابرات الليبية قائمة فيها اسماء تانية من اللقاقة والزمزاكة من مثقفين الهايك... ويبى ايديرلهم ندوات فى لندن فى حالة نجح فى ندوة المجرمه امال ... لكن يافروجة الطاولة انقلبت على راسك وراس المخابرات الليبية وراس عيسى عبدالقيوم... ونية الاسر الليبية المظلومة ايلى شنق وقتل وسحل ابنائها المجرم القذافى بواسطة مجرمين زى الخامر سليمان محمود وبنته الساقطة.. هى ايلى وقفت وكانت بالمرصاد وافشلت واجهضت هذا المخطط الجهنمى ايلى بواسطته تريد المخابرات الليبية تفتيت العمل المعارض الشريف وانهائه.
خلى انغيروا الجو شوية توا.
فيه مذيعين هلبه داروا لقاءات ومقابلات تلفزيونية مع المجرم معمر القذافى.. (ايلى حلم ببوه المعكرش والمسفط مؤخرا .. وبشره بان وجهه سيتحول بالتدريجى الى وجه ناقة قحصية جرباء وماتعدلش ياقايد.. زى ماصار لجده الاول ايلى تحول وجه فى ايامه الاخيرة الى وجه سحلية .)... من امثال المذيع المصرى"قنديل" راجل نجلاء فتحى ، وسامى حداد والمذيعة ليلى الشيخلى، والهاشمى (اشنوا عاد) صاحب المستقلة... وغيرهم من المسترزقين والمتملقين والمطبلين... وماحد عدل عليهم من قبل؟؟؟ فااعلاش ياسى بن غلبون شايطة فيك النار ومعرقب اكمام سوريتك ومشمر جلابيتك وهايج .. على المذيعة نجاح المساعيد بالذات لاجراءها مقابلة تافهة مع المجرم القذافى لاتغنى ولا تسمن من جوع (اقطاف زايد)؟؟؟؟
ياولد بن غلبون نجاح المساعيد اتصلت بالقذافى علنا بحكم مهنتها وهذا شىء طبيعى ولكن المصيبة تكمن فى ان فيه ناس وووووواجده... تتصل بالقذافى سرا وتتفاوض معاه على استرداد املاكها فى ليبيا ، وفى نفس الوقت اتقول للناس انها معارضة وضد القذافى.. تى كيف الدوه يا معلم ؟؟؟ وبصراحة نبيك تتربع على طريقة.. اربعة تربيع وتقولى من هما ايلى يدحنسوا ويتخرمدوا.. ويمشوا خارج بريطانيا باش يوصلو لفروخ القذافى واللجنة ايلى قاعدة تتفاوض مع الحثالة الليبيين (زبالة المجتمع).. ايلى باعوا ضميرهم باش يرجعوا للبلاد ؟؟؟
وبعدين تعالالى جاى يابوكسييرى.. تعالالى جاى تعالالى جاااااااااى.... انت شن دوتك بالزبط ... قاعدلى كيف العجل المنطلق فى الحوازة ايلى يصكصك برجليه فى الهواء.. ويضرط وينطح فى اى واحد يقابله... ويبى حد يشده ويربطله رجليه الاربعة بربطة تل امتاع غل.. باش معادش يقدر يتحرك.
قوللى بالله ياسبع البرمب... انت شنو قدمت للعمل الوطنى والقضية الليبية. تره قوللى؟؟؟. الا الشلش.. ومهرجانات الدوة ووجان الناس بالدبابيس ومسلسلات الرسائل (اتقول كاتبها واحد سورى؟؟؟؟) وانتحال شخصية الغير... وتطليع صور الملوك والامراء اسيادك ... والله العظيم ياولد بن غلبون شكلك وتفنيصتك ووقفتك طالعه فى الصور مع الملوك والامراء اتقول واحد ارهابى من الالوية الحمراء او من عصابات الماو ماو.. وواخذ رهائن معاه.. وحابسهم ... باش يتحصل على الفدية ويليييييييخ .. ماصح والله وجهك .. المفروض ياولد بن غلبون مادام عندك عرق اسبانى زى ماتقول ديما وتملك قصور وحصون ملقا... تتفرغ لرياضة مصارعة الثيران (ورد بالك ياولد بن غلبون اديرينا فالطة وتصارع الثيران بجلاليبك وشنتك وشلايكك..) وغادى ياحنين ياايما ترقع الثور او الثور يرقعك بقرونه ومافيش عم ارحمنى ...؟
على فكرة راهو مرات الثور بقرونه يقدر يخليك قدام المتفرجين عريان... وهذه صارت قداش مرة... واحنا موش ناقصين هم وصدمات نفسيه باش نتفرجو عليك... بالله نبى نسالك على اجواء اسرائيل بماانك اتزور فيها ديما على خاطر فيه واحد قالى ان القدس مليانة بالناس النصابين ايلى يحلموا وامصدقين نفسهم انهم حاجة كبيرة وانهم يتحركوا بالاحلام والشعوذة والضحك على السذج .. مزبوط هالكلام هذا ياولد بن غلبون وايلا مش مزبوط؟؟؟؟
المهم راهو فيه واحد اسمه بوبردعه يبلغلك فى السلام الحار ويقولك ياحصرة على ايامات سوق الظلام. وايامات التشليش والسكير فى البحر.. وشج الجو.
المرة الجاية يافروجه.. خلى المصوراتى بن غلبون مستشارك على خاطر حتى هو عنده افكار ووسعة بال وصبر زى صبر الحواته.. (قالك بن غلبون (اربعه تربيع) يرفع فى سريره معاه لما يمشى لمركز الارشيف والوثائق الانكليزية.. باش ينوض بكرى وماتفوتاش حتى وثيقة ويكلوطها... تى خطرها يابن غلبون انت اسمك بن غلبون وايلا بوبردعة..؟؟؟ ياعم ماترسيلك على بر ياعم؟؟ وبلاش حركات الارعة ده احنا دافنينو سوا .... لكن يافرج هابا لو تشوف بن غلبون زمان كيف كان يدربك على رجل واحدة.. (احنى سمعنا ان بن غلبون مازل محتفظ بالدرابيك فى حوشه (ويملك ايضا دربوكتين تمر.. وزكرة وثلاتة بنادير زليطنية.. وشكشاكات مصراتيه ودنقة وبلغة فزانية يلبس فيها فى عيد الاضحى بس.. كلها هدايا مقدمه له من فرقة بنغازى للفنون الشعبية..) ولما تبدا عنده الحكايه كساد وحر ومافيش مصارعة يطلعهم ويبدا فى التسخين والدبدحة والدربيك..
انقولك حاجة يافرجرج... انت فكرتنى فى الاخوان المسلمين بتوع ليبيا مش الاخوان بتوع مصر... تعرف انى كنت ناسينهم مرة واحدة يا بوحا.. لكن ياعطيك الصحة.. فكرتنى فى هالطابلينو.... ماعندهم ماوين يهربوا منى. يا شيخ.. وجايهم سونامى ميزرانى .. الله لا تروعك... يخليهم امفحجيين.. ويمشوا على اربعة ..وعلى روؤسهم.. وعلى مقاعدهم ... كل التسهويك والعربدة ودرهات الكبد والفهلوة ايلى داروها لشعبنا فى كل السنين ايلى فاتت.. واللعب بقضيتنا الوطنية وتمييعها. ماتمشيش بلاش.. تي قسما بالله تطلع من عيونهم وخشومهم ووذانهم وابقوا خلوا سيف (المحشة) امتاع دين امكم ينفعكم.. نحى منهم الشرفاء والجذريين.. والباقى رك النم ..
صار قوتولى ياخوان المسلمين تبوا الجيفة معمر يطلقلكم محابيسكم (محابيسكم الشرفاء كوم وانتم كوم).. وطلق المحبوس يامعلميه؟؟.. شنوا درتو؟؟ .. ياجييف.. راهو فيه الاف السجناء ايلى قاعدين يتعذبوا كل يوم فى سجون الجيفة معمر وانتم لاتكلمتوا عليهم ولادحية ومش حاسبينهم؟؟ وكأن امهاتهم ارانب مالطية ياجييف.. ياخيبة ليبيا... انى مانبيش ندوى عليكم اكثر من هكى.. لكن موعدنا قريبا... اه صحيح والله ازى حال المرشد بتاعكم انا مش عارف ليه شكله كل مايطلع فى التلفزيون تقول عليه يشم فى حاجة معفنة... وايلا شكوكو (بسيكرى)ايلى تقول هيئته زى ممثل كومبارس مع اسماعيل ياسين والشاويش عطية.. هو لسه بيحب يسمع لشعبولا.... طب اسمعوا دى : انا باحب موسى كوسا وبااكره المقاتله... وايييييييييييييييييييييييه... بس خلاص.

ولد ميزران


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home