Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

نصائح لوجه الله (3)
إلى السيد المقريف والشيخ بن غـلبون

ياجماعة الخير .. الواحد دايخ لما يقرأ اللي يكتبوا فيه بعض من الجماعة اللي بيغروا البلاد ، حيث لا يزداد إلا دوخة وتلخبيط .. تذكروا زمان سيدي محمود حسين أو كما يقال ، بدأ بنشر مسلسل طويل نازل في الجبهة ، بحجة الدميوقراطية ، وانه قد بلغ السيل الزبي ، ومن مصلحة الشعب الليبي أن يعرف الحقيقة .. نصحنا الرجل ، لكان شوف ماذا حصل له ألان ... يارب استر استر يارب .

ثم جاء بعده سيدي شاكير وهو عضو في نفس التنظيم ، لكنه بدا إظهار العداوة والندامة أيام العز واكل العصبان والسهر حتي الفجر ، والرقاد حتي القايلة يكتبوا ويناقشوا ويغنوا ، وشوية كارطة ، لكن أعلن التوبة والهجوم السافر علي من صنعوا له هذه المكانة ، وخلوة يسافر ويناظر، ويكتب ويطلع في التلفزيون. ..
عجيب أمر هذه الدنيا.
طبعا ثم جاء دور سيدي الخوجة وهجومه الشديد علي سيدي المقريف ، وتنبيه الحكومة والشعب الليبي بخطورة الجبهة والإنقاذ وان معمر أحسن منهم ، فقط... اصبروا عليه ، واقسم باليمين الغليظة أن الجماعة مخابرات أمريكية وجاء بالبراهين والقرائن ، وحقيقة الواحد دايخ ودايخ واجد ، فمن هو الصادق أو اللي يقول الحق ومن هو البلعوط ؟ المهم المقريف سلح الرد علي سيدي الخوجة ، وترك الامر لي ولك بان نحكم ، أو نشوف الموضوع ؟ ثم جاء موضوع الفا ، جماعة متمركنيين ليبيين ، مرتاحين ماديا ومهنيا ، لكن يبوآ يخدموا الشعب الليبي ، ووجعهم مافيش ديموقراطية ، والرجل طول واجد في الحكم ، فداروا جمعية الفا ، ثم تحاربوا ، وتخاصموا واستقالوا ،، وطلع سيدي بوقعيقيص يتبرأ من أعمال بويصير ، ولكن الشويطين بويصير عنده كل شئ مسجل بالصوت والفيدو .. وربما شاله معه ليوريه للعقيد في احدي السهرات ، لكن الري العقيد سلحه ، وسلحة مع من تساقط كما قال العقيد " تساقط أوراق الخريف .. لكن سيدي بوقيعقيص اقرب للصواب فهو رجل غني ولا يحتاج إلي كثرة مال أو منصب ، فهو معنقر يدرس والا يطبب في الامريكان ، ويتقطع قلبه مش قادر أن يخدم الشعب في بنغازي البلاد السمحة أو حتي في فزان الكحلة . وطبعا هو يخاف أن يلحق نصيبة الدكتور عبدالرحمن اللي مات صغير ، ويجي دوره اللي جاي جاي ، والله ما فيش مفر ولا مهرب ، فكل نفس حتي معمر حتموت ، وبعدين إما يأكلها الواحد في زلاغتة ، وتبدا حياة سودة ونكدة ، وشينة وفضيحة كبيرة ، وحامية وحارة ديمة ديمة ، والا حياة مسوطة ، لا يصدعون فيها ولا ينزفون ، لا غيبة ولا حسد ولا نميمة ولا غيرة ، فقط نزيكة وسلام وسلام ،، وايضا ديمة ديمة ،،، الا اذا أراد المالك أن يعمل شئ أخر .. ما تخفوش هو رحيم وغفور .. فشوف روحك وين ماشي .. واللي مكذبني يتصل بي لنعمل موعد هناك ، ونشوف الصحيح من الخطأ والحق من الباطل .

المهم جاء دور سيدي الشيخ بن غلبون .. وحقيقة لا اعرف الرجل إلا ما سمعته عنه وما قاله عن نفسه في أكثر من مكان من مقالاته الناقدة ، وحط جماعة واجدين علي القرمة ، ولكن بطريقة حضارية ، والله يعلم النية والقصد ،،المهم قيل أو قال انه رجل متاع ولد بلاد ، مسوط وثري جدا ويعمل تاجر كبير في سوق الظلام ، وفكر بعد سنوات من الغربة ، وتحويل سيدي إدريس من الحكومة ، أن يدير معارضة ويطالب بالدستور ، وكل شئ مكتوب في المواضيع المكتوبة عند سيدي اغنيوة او المواقع الاخري القديمة والجديدة بدون مر علي الرقابة اللهم موقع الجبهة الإنقاذ لأنه وصل ألان في صاحب الراس الكبير بروحه سيدي المقريف فكيف ستنشر له مذكراته.

تعرفوا ليش سيدي معمر مزال مسيطر علي الحومة والقلوس متاعكم ، لان الحقراء وجدين وجدين ، والناس النزكية شردوا أو قتلوا او اعتزلوا ممارسة اللي يقولوا لها " الحسبة " يعني الإصلاح ، يعني تغيير الحكم ، يعني الامر بالمعروف والنهي عن المنكر ، لو داروا شوية ما داره الشيخ البشتي المختفي ، او الشيخ مبروك غيث رحمة الله عليه اللي قتلوه وقطعوا جثته ورموها الكلاب امتاع المخابرات في شوارع السعودية ، تصوروا قسوة الفروخ الليبين نقصد البعض طبعا ، لا رحمة ولا حنية ، وألان تبوا الله يغير معمر .. لا والله .. حتي يفيق الناس شوية ، ويفكروا ويغيروا روحهم اولا ..
المهم المليونير سيدي الشيخ بن غلبون شنها فضيحة بعد فضيحة ضد من لم يساهم معه في التنظيم الاتحاد الدستوري ، بالله عليكم صححوني ان غلطت ، من سيدي بن كاطو الي البربري الامازيغي الي حميده الباكوش الي .. حتي الان سيدي دكتور المقريف ، وهيا معا نسأل الشيخ :
لماذا ياشيخ الان ؟ لماذا تحرك ما تبقي من هذة الشخصيات ؟ لماذا لا تستر الناس ، وتحتسب الامر إلي ربك ؟
هل يصدق الواحد توه أن سيدي المقريف بلعوط وكذاب ، كما يفهم من مقالك ؟ إذا أنت تدافع عن الدستور اللي عملوه الكفار متاع الأمم المتحدة واحد سويسري اسمه يحن ويرن في بنغازي وطرابلس أدريان بلت ، والخمسة الممثلين للدول الكبار، وشوية وطنيين ما عندهمش شهادة إعدادية وحطوا شعار الماسونية "حرية ، اخوة ، مساواة " .. والمهم انه ينص علي وراثة العرش ، فما هو ياشيخ موقعك من سيدي الامير محمد الحسن ، لماذا لا تبايعه وتخدم معه ؟ سمعنا انه أنت متعارك معاه ، لماذا . اقترح أن تكلم سيدي الدكاتره الطبرقي جاب الله فهو رجل بدوي باهي باهي واجد يحل المشكلة بينك وبين الامير ، كما حلها مع جماعة الفا ؟ ويسعي ليتوسط لحلها مع المعارضة كلها والعقيد . والخوجة وسبتموس الدكتور،أو جماعة البالتوك متاع التغيير السياسي ، أو يحلها هو ووزارة التعليم الليبية ؟! بلكي يعطي حصة إضافية في الويك اند في جامعة طرابلس !

ياجماعة الخير المعروف عن سيدي المقريف سياسي محنك ، ومحاسبي ماهر واجد ، وممتاز يلعب علي الحبال فهذة سياسة وضرورة ، وألان هو زاهد في السلطة ويكتب تاريخ البلاد من اجل البلاد والعيال في المستقبل ، فخلوا لرجل في حاله ، فهو عنده ولده طارق" ماشاء الله " برفسور في الاقتصاد.. فلماذا لا تقترحوا علي الرجل ان يخلي ولده يعلم سيدي سيف الاسلام ولد الطير العقيد ، دروس خصوصية في الاقتصاد العالمي ويوفر علي سيف عناء السفرالي الخارج ، وربما يديروا معارضة اصلاحيه مع بعضهما ، فهم شباب شاطرين فواحد عنده شوية بلايين من الدولارات ، والاخر خبرة وعلم في الاقتصاد والمال والبطالة والتضخم الاقتصادي ...
هل نقف الآن هنا ؟


ولد البلاد الثاني
عـبدالعزيز احمد


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home