Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

إلى الدكتور عـبدالحكيم الفيتوري

بسم الله الرحمن الرحيم
والحمد لله والصلاة والسلام على رسول الله.. وبعد
خلينى نكتبلك بالعامية ياسيدى الدكتور.. بالله عليك ياسى عبد الحكيم لمن تكتب فى هالمواضيع اللى لا لهن راس ولا ذيل. راهو من لاخيرى الدين ساهل وفكنا بالله من كثرة الدوة.. قوللنا لشنو تبى توصل.. مرة كتبتلنا عن الصبايا .. وحديث لايفلح قوم ولو امرهم امراة... وموش عارف كيف درت لخبطتها لنا وعجنتها وطلعتلنا الصبايا هنا بوها وكيالها.. وقبلها كتبلتنا على حديث اخرجوا المشركين وطلعتة لنا موش عارف مش عارف كيف على راى صاحب الغيطة.. وتقريبا كتبت عل الحاكمية.. صدقنى ياسى عبد الحكيم انت زى بونا لكن كلامك يما صقع علينا يانحنا صقع عليه كيف مايقولوا صغار البلاد.. انجوا لكلام سيدنا وتاج راسنا عليه الصلاة والسلام لما جاه الشلافطى على قول خوتنا الغرابة.. قاللة .. انى لااجيد دندنتك ولا دندنت معاذ.. فعلمه كلمات خفيفة يذكر الله بها وقال له.. حولها ندندن.. الزبدة لو ان كلام شيخنا سى عبد الحكيم جاء وهو يرد على اهل الضلال راهو قلنا مافى الهم عزاء بس المشكلة يشكك فينا فى كلام واجد ولا فهمنا ولا خلانا على فهمنا القديم.. والباين عليه سيدنا عبد الحكيم عداه المريض بو العشة.. مع الفرق طبعا بينا لاتنين.. لان السردوق بو العشة كلماته زى الالغاز والباين عليه فرحان لانه كيف مايقولوا هذينا ادوات الشغل يعنى بالمصرى.. لزوم الشغل ياعم.. مرة يقول بيروقراطية وبيزنطية سفسطائية وزياطية شكلها فى قاعدة ننصح بيها خوتنا اللى يبوا يطلعو مثقفين امثال بو العشة والثانى المصراتى المريض صاحب القزيزات معرفتوشى بالله اللى مسمى روحة الموكب ولا مسميينا معاش نذكر متاع القهوة العربية.. اطروقة القزيرى وصورتة الحلوة .. ياناس عندا نظرة فى الصورة اتقول عباس بن فرناس.. ونظرته هذى لما تركزوا فيها متاع واحد مخنس وداير روحة فاطن ومورق للجو.. عموما نرجعوا للقاعدة اللى قلنا عليها... اى كلمة تبيها تعطى ظخامة وجو كبير زيدها فى اخرها حرفين بس ي ة الياة والتاة المربوطة وكان لقيت سوقها راقد زيد قبلها حرفين لاصقات فى بعضهن غ و... الغاء والواو.. نعطوكم المثلة ياجهلة.. مثلا وقبل مانعطو مثال فى حرفين مسقعات حتى هنا ج ي جيم والياء.. مثلا تيى تحكى عل القومية... بسرعة بسرعة وهما يتكلموا معاك قول الحركة القومجية موش كويسة.. ولا تبى تحكى عل الصرف الصحى .. المجارى يعنى اجلكم الله وبدل مااتقول عمال البلدية قول الصرفاجية ومشى امرورك الزياطية والشلالية.. وماتنسوش الزاء حتى سوقة وارى على راى الشراقة.. وراى بوالعشة بالذات المافيوزية .. فكونا توة من الموكب وبو العشة الخنابجية... نردوا لدكتورنا المسوط.. يعنى الباهى.. وحدة وحدة علينا ياسى عبد الحكيم.
وسامحنا ياسى عبد الحكيم الباين عليك راجل باهى بس حبيت ننصح على قدر معرفتى... لقول الرسول عليه الصلاة والسلام.. انما الدين النصيحة .. قلنا لمن يارسول الله .. قال لله ولرسوله ولكتابه ولائمة المسلمين وعامتهم... وانت ان شاء الله من ائمة المسلمين.
سبحانك اللهم وبحمدك اشهد ان لا اله الا انت سبحانك انى كنت من الضالمين.

كتبه الفقير إلى عـفو ربه... ولد البلاد


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home