Libya: News and Views      LibyaNet.Com      Libyan music      Libya: Our Home

send

previous letter                 next letter                 list of all letters

رسالة الى معـمر القذافى

فى بداية الكلام ومن غير سلام اريد ان اتكلم معك باللهجة المحلية حتى تفهم المقصود جيد.
توه انت يا عميرينه عارف كويس الى صار ومفيش داعى ادير روحك جبل ما يهزه ريح وانت عرم رملة ولا قافلة تسير وكلاب تنبح (غير وين هى القافلة كنشى قافلة المغول الى تهدم وتخرب وتقتل) لان هذا شعب كامل (مش شويت طلبه ولا فرقة من جبهة ولا جماعة مقاتلة) عرف الطريق وبدى ايفكر فى حل لمشكلته معاك وبجد وزى ما كتبو على صورتك لا حياة بدون كرامة ولا كرامة من غير حرية او زى ما كتبو الياين انا الشعب مش زى عهدك بيه ومع انى عارف انك فاهم لكن غرورك وكبريائك وتجبرك ايخلو فيك تسكر فى راسك اليابس والنتيجة انه هو الى يتكسر فى الاخر والله لا تنفعك امريكا ولا كلاب الدم الى بالامس القريب هجمو على المثابات فى الليل وشرطو القوائم الى فيها اسمائهم (86) المهم الوضع هالمرة مختلف مهما تعتقل وصل عدد المعتقلين 3000 وانا ابشرك انا العدد قد يصل الى ملايين من المعتقلين لانك سفاح ودير مكثر لكن وين تبى تحطهم كنشى تقتلهم كلهم وتعيش انت ابروحك فى البلاد زى البوم.
انا نكلم فيك بنيابة عن الشعب فى الداخل ومن بنغازى خصوصا الفرصة مازال قدامك لكى تنقذ نفسك انت وكمشت المخنثين اعيالك وحتى لو قدرت انك تستمر فما اظن ان سوسو ولا ميسو ولا عودى ولا ميدو يقدرو ايسطرو على الشعب من بعدك لانك عارف ما فيهم كويس وصورهم الى زى البنات مالية الصحف الغربية المهم قدامك حلين مش ثلاثة :-
الاول انك تركب فى الشعب كله وتقتلهم زى عوايدك انت وامثالك وتريحنا من العيشة بدون كرامة ممكن ندخلو الى الجنة بسسب الظلم الى عنيناه منك وتلقا روحك زى ما قلت زى البوم وانا نتوقع اختيارك لهذا الحل لانه الاقرب الى نفسك الدموية
اما الثانى انك تبدى فى التنحى على السلطة تدريجيا اول خطوة تحول جميع القتله وجماعة التصفية الجسدية من اى منصب او وظيفة حكوميةاى شخص يده تلوثة بدماء الليبيين ابتداء من هدى بن عامر الى معتوق الى اخر القائمة ويرحلو من ليبيا الى الابد (اظن ان هذا اقل عقاب ممكن يقع عليهم لما فعلوه) ويمسك الوزارات ناس وطنيين واظن انك تعرفهم كويس لان سجونك ملينه بيهم وبعد ما تستقر البلاد تعلن على استفتاء عام على الطريقة الى الشعب يبى ايعيش بيها من طريقة الحكم وما الى ذلك وهما احرار حتى لو اختاروك انت من جديد(ههههههههههههه) او اختارو النظرية الهروكيه امتاعك. استفتاء تحت اشراف الامم المتحدة ايكون مضمون النتائج وبدون تزوير ايوه وبعد الاستفتاء ممكن ان الشعب ايسامحك على درته ويخليك يا اما ترحل او تعيش بامان انت وافروخك لان الشعب الليبي شعب طيب ومسامح.
يا معمر كون راجل لمرة واحدة فى حياتك واتخذ القرار الصح واحقن دمائك انت ومن معك ودماء الليبيين لان هذى هى البداية واول السيل قطره اعمل شى واحد لاخرتك لكى لا تخسرها زى ما خسرت الدنيا الغرور كان يبى ينفع راه نفع صدام.
وانا اذ اكتب لك هذى الرسالة اعطيك الفرصة الاخيرة وقد اعذر من انذر والكورة فى ملعبك وانت حر يا تلعب بالنار والمرة هذى مش حتكون ساهلة لانها ستحرقكك معها واما اتكون راجل طيب وتسمع الكلام.
واكرر ما كتبه شعب بنغازى المجاهدة.
لاحياة بدون كرامة       ولا كرامة بدون حرية
وقتلانا فى الجنة         وقتلاكم فى النار بأذن الله .
والله اكبر وعاش الشعب الليبي البطل ويسقط كلاب الدم ومن على راسهم.
وبدون سلام .

ابو الزهـراء
من وسط بنغازى


previous letter                 next letter                 list of all letters

Libya: News and Views      LibyaNet.Com      Libyan music      Libya: Our Home