Libya: News and Views      LibyaNet.Com      Libyan music       Libya: Our Home
Libyan Writer Yasin Abousaif Yasin
الكاتب الليبي ياسين أبوسيف ياسين

السبت 29 أغسطس 2009

الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

من مشاهير الشعـراء الشعـبيين فى ليبيا (17)

ياسين ابوسيف ياسين

لقد انتقيت نحوا من عشرين شاعرا من الشعراء الليبيين الذين كانت قصائدهم ملئ السمع والبصر فى كل الربوع الليبيه من أدناها لأقصاها وهذه  الكوكبة من فطاحل الشعراء فى الشعر الشعبى الليبى تركوا لنا قبل رحيلهم تراثا جميلا خالدا ستذكره  لهم الأجيال القادمة ما بقي للشعر هواة ومريدون. هؤلاء الشعراء القدامى يرحمهم الله تأثروا بمجتمعهم وأثروا فيه  فكانت قصائدهم تاريخا لشعب فى ما خلا من الزمان  وفنا فى حد ذاته ترويه الأجيال جيلا بعد جيل . 

الحلقة السابعة عشر

 

الأبعج بن عدوان

 

 

قال فى مدح الأجواد :

 

عايش مع لجواد حالى ابحالهم               وديمه على الجضرات جابد سريبهم

على يجبدوا سرهم وطرفة ايكالهم                ويقول انريدونى وانا ما نريدهم

أياما اوفيدى شى نرد بدالهم                      وايام شى لوجه الله قدام انقريبهم

فى كل مجمع نجبد اسوالهم                            انغالى حبيبا لى وانا حبيبهم

روس العرب هابا على موالهم                  ما يعملوا فى الجار حاجه اتغيبهم

ديمه ورا الجيران رايج انعالهم                     وديمه عدو جارهم هو طليبهم

عليه يفرسو بالروس واوقات مالهم                   هذا بند الجواد حقه عطيبهم

يوم شيلهم له يدنوا اجمالهم                     وان حاش لقحهم له يجيبوا حليبهم

وان خربوا مع السلطان فضوا احبالهم  بالسيل عالجبل العريض يرقى شطيبهم

يشهر اساميهم اويفتح اقفالهم                        ويجرى ابناده اوهو ملتويبهم

ولهم دم فى الزحنان جاوت اعيالهم       فوق اشرف الناموس يجرى قضيبهم

هم خير وللا ابغانم امثالهم                         البسهم على كل جيه واسيبهم

زادهم رحيل الضيف مشروح بالهم             هل قدر واحسان يالف غريبهم

اثقال فى اوجوه الخير يوم ينحكالهم      وانجابو على لصغار راغب رغيبهم

واللى طاح شالوه وقتا ثغابهم                   فى توامج النيران مصبا سبيبهم

وايزمن اللى طال هفة انظامهم                  ينفس اوهو شرقان مستذريبهم

وساعة دراه الكبد يرسن ا ثقالهم                 وقنو العدو مقنود من تصليبهم   

على كافة لوطان تاقن عمالهم              وكاش العرب بردان من فرق نيبهم

ان قالوا معاك القول يوفن اقوالهم        وروس العرب ممنون طيب ابطيبهم

وذيل العرب فى تعس ياملايالهم                  يخيبوا على اليد ساعة لبيبهم

وذيل العرب هبل حاسر اهبالهم                  متكبرين والوطن ما يندريبهم  

وذيل العرب م البخل جايز اقتالهم             موتى اوهم حيين عدى اوسيبهم

وذيل العرب خرب جوالى جالهم              باهتين كيف التين ماحد اشقيبهم

لانى ابناخيهم ولانى خالهم                     او لا هم انسابا لى لا نا  نسيبهم

روس العرب نقضى بصيفة عمالهم            وذيل العرب ربهم هو حسيبهم   

 

وقال أيضا :

 

والله ما انسلم تحت من البنديره                  ولا نقبلو دنوة اخباث الجيره

اوحق من عليكم راد بالتيسره                  انتو هك وازاكم او نا وازانى

ان زالت عليكم نازله الحشيره                       الدنيا امتاع الله يا حبانى

وين ما ايجى الامام هى الكبيره               اتمو كرايس تحت م التحتانى

 

والله ما انسلم تحت م السبيوسى             و ايحرم القاضى ذبيحة موسى

او لا اتم بنت امدنداشات اعقوصه          خذا م الذهب بوها ثلاث حفانى

واعقوصه يرنن تحت من برنوسه      تمشى غر فى شوق الحبيب الدانى 

 

 

الشيخ أحمد بن حسن لانقروط :

 

قال  فى معرض الحديث عن التسليم تحت الحكم الأيطالى :

 

والله ما انسلم تحت م الطليانى            او تبقى اسلاميتى خبر لقانى

 

لا نريد انخايم                          او لا نبيع دينى فى اسباب بهايم

رزقى على الله الكريم الدايم            واسع المعاطى مو بهن مننانى

او لا نريد نبقا كيف ها الحلايم        اللى راجيين الروف م القبطانى

قولت الحاج افلان يا الفهايم         ايطليين او مو مجبور باى معانى

ابجاه من خلق بين الضلوع كرايم    ان ترزق ابجى ايمامنا عجلانى

 

والله ما انسلم تحت ها البراطل   او نبقا صولدى ناحف صغير زاطل

او لا نطيع كلب اريالته اتهاطل       مقامى  او شيلى بامر ها الزبانى 

 

وقال أيضا :

 

وخذت اصوار الساكرة من ديها               حرقنا كراهب صاليات عليها

 

لا نخضعوا للعايب                          او لانا ازويى ف السريره غايب 

نحنا هم اللى درنا مدار عجايب                امنين ما بقى حجاز يبرم فيها

او نحنا هم اللى والدم خاثر رايب                نار العدو نوطوا حفايا فيها

او نحنا هم اللى لا صار طاب عطايب     اللى وراه خرخوطه اينادى بيها

او نحنا هم اللى جمله صغير او شايب    سهراية الطرب جاضين باتهجيها

وقاطعين لسنك غير عقلك غايب         ان طار العجب مالعود توحل فيها

واتقول ثلث من لثلاث بى درايب        او تمشى او ما طوحت حيطه فيها

او عديتوا اتقول مجفلات نحايب             او عاد الغلم م الخط نسقوا فيها

او برقه اللى بقيت اليوم قلايب              عليك حجرت ما عاد تنزل فيها

 

او لا نطبعوا للكافر                          او لا نا افواخر نتبعوا فى ظافر

لو يقرضونا تحت ضم حوافر                  ما مغربى باحلاطها يعطيها 

 

وقال حمد لانقروط واصفا معركة جهاديه هى موقعة يوم الكيروانه :

 

زينك يوم يوم الكيروانه                       ايخلص فى أياما فايتات

رقيق الدق داير طربخانه                  المدفع غاب تمن خالطات

او عاد اللى ايداروا على العفانه      ايلاجو فى الحراب الماضيات

ظهور الخيل ساعة لنطنانه                  يشلن من بعيد باغايبات

قسم اعيون خاويات الحسانه              او طلق اوجوه للمتعنسات

ان راد الله ما نرضوا عفانه               او نحنا فوق قدر عاتيات   

ياسين بوسيف ياسين
yasinabuseif@yahoo.com


الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

Libya: News and Views      LibyaNet.Com      Libyan music       Libya: Our Home