Libya: News and Views      LibyaNet.Com      Libyan music       Libya: Our Home
Libyan Writer Yasin Abousaif Yasin
الكاتب الليبي ياسين أبوسيف ياسين

الأحد 23 أغسطس 2009

الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

من مشاهير الشعـراء الشعـبيين فى ليبيا (16)

 

ياسين ابوسيف ياسين


لقد انتقيت نحوا من عشرين شاعرا من الشعراء الليبيين الذين كانت قصائدهم ملئ السمع والبصر فى كل الربوع الليبيه من أدناها لأقصاها وهذه  الكوكبة من فطاحل الشعراء فى الشعر الشعبى الليبى تركوا لنا قبل رحيلهم تراثا جميلا خالدا ستذكره  لهم الأجيال القادمة ما بقي للشعر هواة ومريدون. هؤلاء الشعراء القدامى يرحمهم الله تأثروا بمجتمعهم وأثروا فيه  فكانت قصائدهم تاريخا لشعب فى ما خلا من الزمان  وفنا فى حد ذاته ترويه الأجيال جيلا بعد جيل . 

الحلقة السادسة عشر

  

الشيخ  بن رويله المعداني :

 

هو أول من قال قصيدة ( عليك وقت متعاكس غلب هندازه ) ثم تبعه شعراء آخرون

نهجوا نهجه حتى أصبحت هذه القصيدة ملحمة أدبية رائعة.

 

عليك وقت متعاكس غلب هندازه            او كل واحد واخذ م الهموم مجازه

 

وقت ازقوزه                                    وعاد يبرزوا برزة نجوم الزوزه

واطا عرب كانت ثقال الروزه                    وشيع اللى كانت لهم زرمازه

اليوم الحبارى يضربن فى الحوزه             ونقب الصقوره ع الوطا عزازه

وكم زغزغى منه اتخاف الحوزه          توطى او صار الخرب فى مركازه

 

وقت ملاحه                                   مشايخه مشايخ شوشده  او قباحه

لا للعرب فيهم صلاح او راحه                  فى مكانهم دارو مشايخ عازه

 

 

وقت ندامه                                       الله لا يدومه  كشر هو وايامه

خللى جماعه دايخه خدامه                      عساكر ابغير افلوس للزنهازه

بين الله يجعله قريب قصار ايامه            ويجى زمان اخرى نظيف قزازه

الحجر والقش والفحامه                      اولاد البيوت خسارهم فى العازه

ما اتقول كانو يظهروا عزامه                    ولا اتقول كانو يركبو ميازه

الله يجعله قريب اقصار أيامه               ويجى زمان اخرى نظيف قزازه

 

وقصيدة ( الدار خاليه ) من أروع ما قاله بو رويله وما أشبه الليلة بالبارحه :

 

اليوم خاليه ما عاد والى فيها                   هلها اللى ديجوجهم  ماليها

 

ماعاد فيها والى                          ولا اتقول شبحت زول يا همالى

هلها اللى ما مات عنها جالى             اللى قبل ضارى سعيهم كاسيها

لباسين للعلق الرفيع الغالى                 وركابه ع اللى سالمات ايديها

وهل طفل فى الصيفه اتقول اهلالى    ونفسه على باب العصر ساطيها

سبيل عادته يوما ينق الخالى                سكمت سكايم حاجته يقضيها

تجى سابقه فى اول سبيب اتشالى         م الغيض ما مفتاح طق ايديها

يحيد طليبه يتم سرزه خالى                يجيب السلاح وسابقه ساعيها

اصحاب نفس لازامن طبول عوالى      وكشح رقيق السفو من عاليها

 

ماعاد فيها خاطر                             ولا نجع بين ادفوعها  متساطر

ولا اتقول يوم الشيل دنوا فاطر                  كادورته حار الرحيل عليها

يشلط بذيله ورغوته اتناطر                  لين زعل الراكب شفق وخطيها

 

ما بان فيها سارح                                 لا نجع بين دفوعها متطارح

سرت أمس للمغرب وسرت البارح           وانى أصبحت اليوم ننظر فيها  

ما قابلوا عرب الشلوق القارح          من يوم حولوا سمطت الملح اخطيها 

 

ما قابلوا لشرافى                               خذا جدهم مولى العلم رفرافى

زعم ما يريد الوقت يبقى صافى               وتعمر كما كانت ابهلها  فيها

ويبدن نواجع طاقات حفافى                     يسفه اللى جالى بعيد ايجيها

 

ما قابلوا فى شمر                                ولا قابلن بين الدفوع مطمر

وهل طفل لا عمره حصد لا غمر         وهل بيت تمثيل الحصار شبيها

منها حيدوا عرب الركاب امحمر            اللى عدته حولين يسطوا فيها

 

 

وقال بورويله  المعدانى  مخاطبا وادى سوف الجين ومذكرا إياه بما مضى من الأيام فى سالف العصر والزمان :

 

تعال خبر يا سوف الجين      ع القديمين       عرب كانت تعرفها وين

 

تعال خبر واحكى بالحق                       على اللى ريته قبل اوزال

اليوم خالى ما فيها رشق                            طريلك مطرى لتلال

الناس اللى بيهم شارق                            اللى كانوا عزوة للمال

تقاصوا عنك خشوا رق                            سرابه ع العالى هيال

ان ما جونى لازم نلحق                        بزادى وزوادى واجمال

وتقطع غيم يبان ازرق      بلا تظنين        بزادى ورجالى وعيوين

 

تعال خبر ما ريت عرب                      ولا ريت انجوع كثيرات

ولا ريت عساكر تلعب                        لهن سنزق فيه اعلامات

يفزن كان البوق ضرب                           لجيه فيسع ملزومات

جنود ايكيدن من يحسب                         عددهن سربه بالميات

وحاكم يصلب كان غضب                      أمير على ست آلايات

يونس وين ايجى راكب                        ينوضن منه مقبوضات

يتم عليهن يصلب                             نداوى بادى فى حوزات

نهار اللى يدارى ع السب                    تحجى دون الحرماوات

ضرب جا طايح يشقلب        وتم اينين          تعرم بين العراكين

 

تعال خبر ما ريت قديم                         ولا ريت نواجع حكام

ولا ريتش مال جراثيم                         شون ياسر كادن لزدام  

ولا ريتش خيل ملاضيم                         أدب ناس ملايا بالنام

يفزن لا صار التنغيم                       منبن طق الميصور وزام

يجن غير اتقول براريم                      منين ثوب البيضا يدغام

منين فيهن صار التعريم      وطاح الزين     فنى من هذين وهذين 

 

ولعل قصيدة النجع التى نظمها بن رويله المعانى هى من أفضل ما قال هذا الشاعر الموهوب :

 

النجع اللى ايجيه الميعاد        ووجوه اجواد         اليوم دونه جوبه تسواد

 

النجع اللى يونس م الخوف                            اليوم دونه جوبه تدغام

سرير ورمله اتدير سيوف                             وهى جاى وهم  لاقدام

تبى مده تمشى فى ادفوف                              نفازتها  بالعشر   أيام

جلوا م اللى ما فيهم روف                          عرب همه وتبنى ع النام

عرب صف ايقالب فى صفوف                      عرب سنسق بهلاله تام

عرب عيل ماهو مخفوف     فرسان اشداد    من يوم غابوا ما صار جهاد

 

النجع اللى يرد المضمون                           اليوم دونه جوبه تشهاب

سرير ايقابل  لون  ابلون                            امظلم  يقلب فيه  سراب   

وهم لقصى والخالى دون                            الناس اللى  بيهم  تنهاب

زعم ما يبرم بيهم عون                           زعم ما يلفوا ناس اصحاب

يجوا كيف امعاز الغيدون                          انهدن  فى  جدون  سياب 

وبيديهن طعن وطاعون                            مناشير  ومدفع  واحراب

عرب صوله لرواح تهون                         نهار علف الموزر ينذاب

نهار ما فيهم من مدفون                           الخيل  بلا  هلهن   سياب 

نهار جوهن كيف الدبنون                          قطا وارد مضنون وعاب

نهار كيف نفيض العرجون                        زنايزهم  مرد  او  شياب  

عرب تعرك غير بالمسنون                       نهار موت الفرسان مناب

عرب تركب غير المصيون                      عفى جنبه ما جاه اركاب

نهار نار من اوطى وفى الجون                   نهار دار السامر  لهلاب

نهار يقالب فيهن عون                            اغلابن   والياسر  غلاب

نهار طايح مرمى سعدون                        كمل يومه  وتمم الحساب

نهار تلاقن فى  مامون      صبر ما حاد       بعزمه جيش الرومى  كاد

 

النجع اللى يدارى ع السب                    ويستاهل  تعظيم  الشان

عرب همه ولهم منسب                        ضنا  جد ايقولوا درمان

بعدهم حال الوقت اخرب                      ابرايه  كل  وذيله   بان

لو كان توه ايقولوا شرب                      اسقد  من  بر  السودان

على مرزق جا متصلب                       خذا غات او واو وفزان

نواذيره   طقن   للشب                        يبن مركز هون اوودان

اسمع بيه الطليان اقرب                       لو خايف لا هو مطمان

محضر جيشه ومكذب                        نصيب اوهى لقوام اتبان

مدافع فى لبراج نصب                       اوتومج  له دون  البلدان

تلاقن وعد الله اركب                        الرومى  واولاد  سليمان

وعاد اللى فى ادماه يخب                  وعاد  اللى  طايح  غلبان

مرامى تحلف غير نشب                   العسكر فى وسط الميدان

سوارى ع الكردون تكب                   نصرهم مولاى الرحمان

وفرج ربى عونه هب    ابخيره جاد     ضوت  بعد ظلومه وسواد

 

ياسين ابوسيف ياسين

yasinabuseif@yahoo.com

 


الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

Libya: News and Views      LibyaNet.Com      Libyan music       Libya: Our Home