Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Saturday, 21 January, 2006

أحـلام

شعـر : ياسين ابوسيف ياسين

أحلام راودتنى كل يوم انجيها            حتى فى منام الليل نحلم بيها

كل يوم اتجينى            تقعد معاى شوى وتخلينى
بين الحقيقه                 بين غمضة عينى
نالوقت حابسنى            وهى راخيها

أحلام راودتنى .......

كل يوم تعدى              طريق لا ترد ولا هناك تودى
وكان هى بطت            نقعد نزيد انهدى
ونسرح مع الاكوان        فى عاليها

أحلام راودتنى .......

كل يوم بحاله               وصورة جديدة تغلب المثاله
بعيد تبعد الخاطر           على مواله
ويسبح مع الابراج          ويناجيها

أحلام راودتنى .......

كل يوم قصيده               تجى شايلة باللحن والتغريده
مع الطبل والمزمار          وتزغريده
وصوت كيف صوت انغام        يصدح بيها

أحلام راودتنى .......

وكل يوم امانى               واحلام واسعة فوق كل معانى
ينوض خاطرى منها         ايدير غنانى
يكسر يحطم يدمر             يجيب عاليها على سافيها

أحلام راودتنى .......

كل يوم تنادى                تريد شى يسحر من رموز بلادى
من بشر وبريقه              وغرب الوادى
شوى من ثراها              يجلى هموم النفس ويسليها

أحلام راودتنى .......

كل يوم تخطر               تاريخ ماضى فى كتاب مسطر
معارك تشرف               وين ما نذكر
بوى وعمامى                شاهدين ارحيها

أحلام راودتنى كل يوم انجيها           حتى فى منام الليل نحلم بيها
أحلام فى مراعى خاطرى نرويها       ونسرح معاها بين جيها اوجيها

ياسين بوسيف ياسين
yasinabuseif@yahoo.com


Libya: News and Views      LibyaNet.Com      Libyan music       Libya: Our Home