Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Wednesday, 18 April, 2006

ما بي مرض غـير..

ياسين ابوسيف ياسين

ما بى مرض غير غربه طويله
او عيشه هزيله ... او قلة اللى م الخطا تشتكيله

ما بى مرض غير موحة اديارى
وظيقة افكارى
او قلة اللى ينشدو عن اخبارى
اسماح المطارى ... اللى ف القبيله لهم وزنهم يوم يربخ ثقيله

ما بى مرض غير نهبة أملاكي
والظلم ع الحق زاكى
او لا من ايلاقيك كان جيت شاكى
ويزيد فى ارباكى ... قلة الحيله ... فى وقت شين واحباله طويله

ما بى مرض غير سرقة اموالى
وسهر الليالى
او فقدت اللى يسألو عن احوالى
لصحاب الغوالى ... موش الوذيله ... اللى ما لهم لا أصل لا تاصيله

ما بى مرض غير طولت اغيابى
او فقدت احبابى
او غيبت اللى ينطرو من اصحابى
كانو مصابى ... راحو دقيله ... بين الجفا و الأمراض النعيله

ما بى مرض غير ضيعت احلامى
او شويت منامى
او تفكير فى وطن فيه المسامى
بوى او عمامى ... او تاريخ جيله ... مضا فات ما عاد يرجع مثيله

ما بى مرض غير ضيعت الجيل
او هدت الحيل
او فقدت اللى ما هناك كيفا مثيل
الحاج الفضيل ... شيخ القبيله ... اللى ايشيل ديما ف الحمول الثقيله

ياسين ابوسيف ياسين
yasinabuseif@yahoo.com


Libya: News and Views      LibyaNet.Com      Libyan music       Libya: Our Home