Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Thursday, 15 June, 2006

شيّطت ريقي(*)

ياسين ابوسيف ياسين

يا قلب مانك صافى ولانك معايا عالمحبه وافى
تباعدت عنى نين طال اريافى

حسيبى المولى فيك هو اللى ايكافى

تركت ادروبى نشفت ريقى ليش يا محبوبى
باب المحبه كان دوبك دوبى

لاهى ابغيرى ما سريبك خافى

شيطت ريقى سلمت أمرى ما اتصح رفيقى
طريقك صعيبه ما اتجى الطريقى

تعبر صحارى واسعه و فيافى

مانك باهى تعرف الزينه غير عنها لاهى
تضحك على اتقول وقتى زاهى

ونا القهر كايدنى او كاد أولافى

مانك لول فى طلعتك كنا عليك انعول
قلنا اهلالك هل تو ايحول

دراه كبدنا مالبايدين أسلافى

تغير حالك لا عند وين اتريد ماوسع بالك
نا حرت فيك اوفى اسباب افعالك

او فى اسوال يبحث عن جوابا شافى

مشيت امشرق او تالى امغرب قلت تو اتبرق
بامزان خيرها الساع العموم اتغرق

ونا العقل عندى حار بين اجوافى

كل يوم ادباره وكل يوم راى او فكر فيه اخساره
ونا يا قليبى ما لقيت جساره

نقول بس ريحنى وهذا كافى

خلك جنبى بهت الحالى زين ما تتعبنى
را الوقت وحده هو اللى يغلبنى

بالله يا اقليبى ما اتزيد احسافى

ايطول الزمان او ينقضى ويعدى وانت يا اقليبى ما اتريد اتهدى
ونا الصبر ما غيره بقى فى يدى

كلامى معاك امغير كيف اقطافى

يا قلب وينك رايح عنادى اوما تنفع معاك نصايح
خليتنا بين البرور ذوايح امتى اتحن يا ربى اتحل اكتافى

ياسين بوسيف ياسين
yasinabuseif@yahoo.com
________________________

(*) اضغط هنا للأطلاع على تكملة القصيدة :
http://www.libya-watanona.com/adab/ybyasin/yb25076a.htm


Libya: News and Views      LibyaNet.Com      Libyan music       Libya: Our Home