Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Thursday, 13 December, 2007

ريتك يا عـين

ياسين ابوسيف ياسين

ريتك يا عين اوما ريتى مالحال المايل ملليتى
كيف اصبحتى كيف امسيتى

لا عاد اتجيه اولا ايجيك

ريتك يا عينى ظليتى داجيتك واجد ما بيتى
ودرتى عقلك وانسيتى

غاليك اللى ايخاف عليك

ريتك يا عينى مهبوله من ساعت فارقتى زوله
لا بتى ليله معدوله

لا خاطر جاك ايهنيك

ريتك يا عينى ذبلانه ما نمتى ليله فرحانه
من يوم انسيتى عنوانه

سهرانه من غير شريك

ريتك يا عينى مقهوره من ليلة ما درتى دوره
ثاريتك كنتى مغروره

طوحتى الصوره بايديك

ريتك يا عينى محتاره بين الصبر او بين امراره
بين اتسيرى في مشواره

بين اتزيدى في التشبيك

ريتك يا عينى ملتاعه طحتى في سيد الزراعه
وقتا لف عليك اذراعه

جا دوبك غير التصكيك

ريتك يا عينى مهمومه وين اتبعتى طير البومه
رتب لك خطه مرسومه

شلتى لفعه في كفيك

ريتك يا عينى مهزوزه وين احتجتى عند العوزه
حطك في شيشت قازوزه

ما ايفكك منها تكتيك

ريتك يا عينى دواره عاللى راح اوساب ادياره
ليش اليوم عليك توارا

ما تبيه او هو يبيك

ريتك يا عينى محقوقه كيف انسيتى سمح التوقه
وين ايهل عليك ابروقه

تشكع يجامل واديك

ريتك يا عينى مليوعه من سباه او كثر ابروعه
كل شوى اتقولى يوعا

يقفز باوجاع ايفاجيك

رينك يا عينى تنتظرى حال الغايه يمشى دغرى
بان عليك انتى ما تدرى

بكره يفضا وايوريك

ريتك يا عينى سباقه عاللى ناصب لك نقناقه
واللى ذاق حليب الناقه

ما يرضا باكراع الديك

ريتك يا عينى دباره من بين المليون عصاره
ما تلقى غير السمساره

لا فيهم واحد يفديك

ريتك يا عينى مشتاقه تبى واحد مالصفاقه
ماعنداش جمل لا ناقه يلها بيك ما ايخصك غير ادربيك

ياسين بوسيف ياسين
yasinabuseif@yahoo.com


Libya: News and Views      LibyaNet.Com      Libyan music       Libya: Our Home