Libya: News and Views      LibyaNet.Com      Libyan music       Libya: Our Home
Libyan Writer Yasin Abousaif Yasin
الكاتب الليبي ياسين أبوسيف ياسين

الجمعة 13 فبراير 2009

الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

من مشاهير الشعـراء الشعـبيين فى ليبيا (11)

 

ياسين ابوسيف ياسين


لقد انتقيت نحوا من عشرين شاعرا من الشعراء الليبيين الذين كانت قصائدهم ملئ السمع والبصر فى كل الربوع الليبيه من أدناها لأقصاها وهذه  الكوكبة من فطاحل الشعراء فى الشعر الشعبى الليبى تركوا لنا قبل رحيلهم تراثا جميلا خالدا ستذكره  لهم الأجيال القادمة ما بقي للشعر هواة ومريدون. هؤلاء الشعراء القدامى يرحمهم الله تأثروا بمجتمعهم وأثروا فيه  فكانت قصائدهم تاريخا لشعب فى ما خلا من الزمان  وفنا فى حد ذاته ترويه الأجيال جيلا بعد جيل . 

الحلقة الحادية عشر

 

الشيخ اشريف حسن السعيطي

 

عاد الشيخ اشريف السعيطى من المهجر فى سنة 1945 ليأخذ وضعه كواحد من فحول الشعراء فى ذلك الوقت اشتهر بالهجاء فكان لاذعا فى هجائه وبالمدح فكان مجيدا فى مدحه وله سجل زاخر من الشعر الشعبى فى الحكمة والمدح والغزل.

عرفته عن كثب واخترت له هاتين القصيدتين :  

 

فمن قصائده فى الحكمة قصيدة ( العيب ) :

 

العيب شين وايخلف اوجاع اولوعه   والعقل كيف يداعى صعيب اقدوعه

 

العيب امصيبه                             وايخلف امواجع واجدات اوغيبه

والصاحب اللى تعرف انداك ايجيبه     تقسم  عشاك  عليه  ليلة   جوعه

وحبيبك اتشيله شيل واتجازيبه         واتشوف خاطره واتطيبه مزروعه

ومن جفاك يلزم عليك اتسيبه                اتبيعه ابسياته ونقص ضلوعه

 

 العيب ايثمل                                والجرح لا طق العروق يعمل

العيب واجفا والنقص كيف الدمل         يامن بكن ناسات قبل اسبوعه

والصاحب اللى ترعيه فيك امهمل        تبديعك عليه ورغبته الدبوعه

 

العيب ايكبر                                 والقزاز ما عمره اكسر واجبر

وقطعة نصيب الحى ما تدبر           او بوعقل ما يرضى اللى طبوعه

وراى دروعكروات ما يتعبر        من عامت اللى جافن اشوى دموعه

ورا الصبر واعر والمثيل امصبر    ورا العين ما ترقد اوهى موجوعه 

 

العيب عيب معله                             والنقط عمره ما ايحيد الغله

العيب هو ربط الكلام اوحله                 اوعند المقادم حدته مبدوعه

والصاحب اللى يرثاك لا تامنله         امراكب مع ريحه ايحل اقلوعه

 

العيب وجيعه                          والصاحب اللى تشريه ليش تبيعه

العيب شين ما قرت عليه شريعه          ولا شابهوه بتسكره مطبوعه

يدير عقل ما يصمل بعد تبديعه          الا من امواجع دايرات هلوعه

 

العيب صغاره                             ايهمن اللى غالى اوتبرد ناره

كيف ما سرقت الموت فيش اتجاره          ومعاه امة المقدم اوهو مبلوعه

عند المراضى تلزمه الكباره             وفى الشرع من باب الحلال بيوعه

العيب شين او يخلف اوجاع او لوعه   والعقل كيف يداعى صعيب اقدوعه

 

وله قصيدة غزلية شارك فيها وتناولها عدد من الشعراء المجيدين وكان رأس البيت فيها من نظم الشاعر سيف النصر عبدالجليل أمد الله فى عمره حيث يقول :

 

سبحانه اللى هنتك او هونتينى                انسيتك بعد ولعات وانسيتينى

 

يقول الشيخ اشريف السعيطى :

 

سبحان كيف توازه                              غلانا اللى مفهوم فى مركازه

العقل كان شورك غالب الحزازه         وانتى اتعاندى الحسود واتراضيتى

وسبحان من هون ع العزيز اعزازه      ويفوت يوم لا نطريك لا تطرينى

 

سبحان كيف تغير                           والياس فى غلانا لا بطا لا حير

ياما جرى ريدى اوياما نير                اوياما سعى فى كل ما يرضينى

واليوم شايفه وين الزمان ادير             انجى انقابله بالوجه ما يعطينى

 

سبحان كيف هونتينا                       وانسيتك ابطول الياس وانسيتينا

حسود الغلا منظر او صاغت عينه      او صار الخطا والياس م الثنين

وسبحان ما حكم مولاى فى تكوينه       اليوم ناكرك وانت نكرت دينى

 

وفى مداخلة ثانية قال الشاعرذائع الصيت السيد  معتوق آدم الرقعى أمد الله فى عمره :

 

سبحان كيف قسمنا                      بعد الغلا هو كيف صار خصمنا

وليش فى الفراق انت ونا ساهمنا         عليه نين لا لمتك او لا لمتينى

وليش نركنو للياس نين حكمنا          اوهو قبل ما يقدر احذاك ايجينى

 

سبحان كيف صبرتى              او كيف يا مرادى ع الخلاف اقدرتى

زمان فى سبيل ارضاى ياما درتى      حتى للشروط الواعرات اتلينى

واليوم عن طريقك لولى حودتى           بلا عيب درته فيك عاديتينى

 

سبحان كيف تحول                        غلانا اللى هو كسبنا فى لول

ربيعه زهى واجد او خيره طول         اياما او كانن مقبلات اسنينى

واليوم فيك ياسك بالخراب ايعول    او صافن اخضاراته قبالة عينى

 

سبحان كيف انسيته                       زولك اللى فى خلق مسع ريته

واليوم ناكرك يا حلوة التبهيته          حتى لو طرونى فى علل تنعينى

 

سبحان كيف انسيتك                  اوهو كيف جانى صبر نين اخطيتك

ايام قبل ما نزها اللا فى بيتك                نا حرك وانت زاد ما تنهينى

اليوم من سريب غلاى طارت نيتك    او كى بضاعة اسرائيل قاطعتينى

 

سبحان كيف تلاشا                           غلانا او فيه الياس حطو باشا

والقدر بيننا تما امغير شباشا          على الحال تبرمى حتى ان لاقيتينى

ما نحسبوه ايسير يا دوداشا                  الخطا بيننا وانت عليه اتعينى

 

انسيت ايامك                          وابقى شطب فى دفتر غلاى كلامك

وزالت امهاياته جمال قوامك           او هو قبل حتى فى المنام ايجينى

الياس قاطره ذوب عقاب غرامك         اللى قبل جا بين الحياة او بينى

 

انسيت منابك                             وانت زاد من شورى قفلت بابك

لا عاد تشقيبى ولا نشقابك                 انت دنقرى ونا انواطى عينى

حتى بيش نقار الغلا يحسابك                 لا قبل ريتك يوم لا ريتينى

 

انسيت سحر اعيونك                 وانسيت كيف سبحانه لطافة لونك

حساد الغلا دارو دسايس دونك           حتى نين جافيتك او جافيتينى

اوعاد يطعنو لى فى بياض اسنونك      اللى قبل ما تزها بغيره عينى

 

انسيت سريبك                        اوناجد الساع نصيب كيف نصيبك

مخدوع كنت فى كثرة غلاك او طيبك      بين الرجا والياس خلليتينى

وين ما قريت اسطور فى تنسيبك     نهيت خاطرى بطل عليك حنينى

 

انسيت حقوقك                        وانت زاد سكرت احساب اطلوقك 

واليوم شيك غياتى زطل فى سوقك   وانت عملتك ما عاد ماء تسقينى

 

انسيت لوعة نارك                او قصر على زرعى سحاب امطارك

ايام والغلا مصيون بين اقدارك           نا نسال وانت بالجواب اتجينى

واليوم وين منظارى خطى منظارك    ما عاد جيمك حل غامض سينى

 

انسيت لفظ السانك                    وانسيت كل درب ايشيلنى لمكانك

بعد صار باب النقص فى ميزانك         خللى سرنا مدفون بينك بينى

وخللى اللى حارس اثمار جنانك      ايحاحى على طيرى بعد يرعينى

 

وقال الشاعر مصطفى اعبيد الهونى رحمه الله :

 

هنتى هانك                             تركتى ترك عقلى انسيت زمانك

غليتى اغلى فى العقل علا شانك     رفعتى رفعتك فوق حاجب عينى

برمتى على ليش بعد احسانك          خطا قبل ما نعرف او علمتينى

مازال فى ايدى ماسكه عنوانك              اللى فيه واعدتى اوما جيتينى

من يومها عندى نقص ميزانك           الله ايسامحك فى ما مضى قيلينى

 

باللى جابت                                      برمتى برمنا والعقيده غابت

نفسى علييا لا اتلومى زابت              برد الخطا واصل الخطا خاطينى

عندى عليك اشهود حقى ثابت                     عهد بيننا ما بيه وافيتينى

وان كانك نكرتى والعداله صابت     انجيب لك مضى يدك رهن فى دينى

 

وقال الشاعر نصر آدم الرقعى رحمه الله :

 

سبحان كيف توارى                اوسبحان يا مرادى كيف راح اخساره

حبا كوانا فى القلوب ابناره              اوعلي بقاه عاهدتك او عاهدتينى

خضعنا الحكمه تحت طوع اماره        سلطان حب وحدنا احنا لاثنينى

اوعملنا على صونه وكتم اسراره      وبتى عليه مطمانه   او طمنتينى

كلا من اصحاب الحسد والمكاره       لا جو فى احساباتك ولا تخمينى

غير عابيين بفتنهم واخطاره            امغامرين فى بحر الهيام اسنينى

وانرحنا ضحية حب موش اخساره        ايجى يوم وانلاقيك واتلاقينى

وانعشنا انالو من معين انهاره           تطفاى لظماك انت ونا يروينى

ولازم نتقاسم حلوته وامراره                  بالروح يا نفداك يا تفدينى

هذين هن اهداف الحب يا مكاره                يا مخادعه ياللى قليلة دينى

ايام وغلاك امعاى توقد ناره                     على كل ما نبيه شجعتينى

حتى نين اسياجك هدمت اسواره      وطيت فى حرم حبسك وسامحتينى

ومعاه وين ما حبى نقص تياره      درتى العيب جا منى  اوهو خاطينى

ساندوك رواج الخطا وانصاره              خذيتى بخاطرهم او جافيتينى

خضعت الحكم الياس واستعماره        اوهنتى سريب غلاى وانسيتينى

اونا اللى خطاك اشربت كاس امراره         حتى ان سم عليه زريتينى

خذيته وانا عالم بكل اضراره             انضحى بكل نفيس كى هنتينى

عازم على تركك عملت ادباره    وان كان لك ضمير ايحس ما لمتينى

وحبك امحى م القلب طفيت ناره           ردمته بسياتك حسب تظنينى

بقى طيف خيالك امغير شراره           تلوح فى سما ذهنى بها ياتينى

حتى لو انسيته باقيات آثاره             ايجى نصب تذكاره اقبالة عينى

 

وقال الشاعر ابوبكر آدم الرقعى  :

 

سبحان كيف لفاله                             غلانا اللى توا نقص مكياله

ياما زهينا في ايام اقباله                          ناصحه  لى بيه دليتينى

واليوم بارمه عنا او عن مواله             خنتى الفاظ العهد واكرهتينى

عليك درت عزم واجد مو باحياله   حرمت ذكرتك فى السهو والتعينى

 

سبحان كيف انسيبه                          غلا قبل كان ابشهوته فى طيبه

ابقى من اسباب الخطو فيه الغيبه       وابقيت جاحده فى العقل وامردينى

وبعد ما المغالى سد باب نصيبه             وقالو نقص وانا اللوم اخطينى

نشطب عليه باحمر سجل سريبه     وبالنار نحرقه وانشوف من يرضينى

 

سبحان كيف انهونه                            غلا قبل ولانى او قابل عونه

لو ما عزيز بادر ابفعل الخونه            كنت بالوفا عابى اوفاسرع حينى

لكن ارضى لخلاف سود اعيونه            نكرنى برم عهده امعا لاخرينى

مالى حسايف عن رطب عرجونه         كليت خيرته فى شهوت التعيينى

 

سبحان كيف تهاضى                     غلا قبل كاين فى القلوب تماضى

وسبحان من مغالى كيف خان الفاظه              اللى قبل نا وياه متفقينى

اليوم بالغلا برم مع الحراضه            ندمت فى غلاى امعاه شوه زينى

سبحان كيف اتخونى                   وسبحان يامرادى من يقول اتهونى

سياتك محن ذكراك من مكنونى           ولا لك احقوق ان كان عاتبتينى

حساد الغلا تبعت بعد كرهونى               او فى قولهم بالكذب ظنيتينى

واعلنتى خطاى معاك جا فى كونى      ونا معاك صادق فى الغلا بيمنى

 

سبحان كيف صبرنا                       وكيف نا وانت ع الغلا هاجرنا

الياس من شورك خش خاض بحرنا            لا فيه نتيتى ولا انذرتينى

لون الغلا خص شان خبرنا            او تم فى افواه الناس صيته شينى

 

سبحانه اللى هنتك او هونتينى             وانسيتك بعد ولعات وانسيتنى


ياسين ابوسيف ياسين

yasinabuseif@yahoo.com

 

 


الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

Libya: News and Views      LibyaNet.Com      Libyan music       Libya: Our Home