Libya: News and Views      LibyaNet.Com      Libyan music       Libya: Our Home
Libyan Writer Yasin Abousaif Yasin
الكاتب الليبي ياسين أبوسيف ياسين

السبت 5 سبتمبر 2009

الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

من مشاهير الشعـراء الشعـبيين فى ليبيا (18)

ياسين ابوسيف ياسين

لقد انتقيت نحوا من عشرين شاعرا من الشعراء الليبيين الذين كانت قصائدهم ملئ السمع والبصر فى كل الربوع الليبيه من أدناها لأقصاها وهذه  الكوكبة من فطاحل الشعراء فى الشعر الشعبى الليبى تركوا لنا قبل رحيلهم تراثا جميلا خالدا ستذكره  لهم الأجيال القادمة ما بقي للشعر هواة ومريدون. هؤلاء الشعراء القدامى يرحمهم الله تأثروا بمجتمعهم وأثروا فيه  فكانت قصائدهم تاريخا لشعب فى ما خلا من الزمان  وفنا فى حد ذاته ترويه الأجيال جيلا بعد جيل . 

الحلقة الثامنة عشر

 

هيبه بو ريم

 

هو هيبه بوريم من عائلة بالقراقع مغاربه ومن سكان منطقة النوفليه اشتهر بقصيدته (عليك وقت متعاكس) التى جاءت ردا على القصيدة التى قالها الشيخ  بن رويله المعدانى :

 

عليك وقت متعاكس غلب هندازه            وكل قلب شايل م الهموم مزازه

 

قال السيد هيبه بوريم ردا على تلك القصيده ( عليك وقت متعاكس ) :

 

عليك وقت مو متجنز                        او واجد اللى ريته جرى وامعنز

هيال خاطره منه يريد ايكنز                     جا قادعه ماقدر على مكنازه

 

لاذ من قدامه                                   اوجا قادعه طايب الا باخزامه

كذاب هاللى قايل النفس حمامه          بعد ما اتطير ما تنزل اوهى عجازه

وبعينى اوهى تخدم مع الخدامه              وما ترد لا كلمه على الشنهازه

 

عليك وقت متعاكس اومطول ذيله           او يا نوريتى ع الكابو م العيله

يزوار بحمل كبير جاير كيله                واللا يتل فى مجبد ثقيل افرازه

وان كان هو ترجا ما هناك القيله               يجدن عليه انظار م الهمازه

 

عليك وقت مو متعاكس                   مريضه ايفتح يوم يصبح ناكس

يهفن الطايح وسومه واكس                         كرموده  شغل جنازه

لا تريس يداعك اوحظا واكس            او لا ايلاغمك بارود م الميازه

 

عليك وقت عاكس خاربات ارياحه      وافكاره تموج اتقول فى درجاحه

عليك وقت ما تنفع معاه فلاحه            واعياط الثقيل امضهر الحجازه

 

عليك وقت عاكس واجدات اهمومه           ولا فيه متهنى رقد فى نومه

من عام عامنول شارته معلومه                  زلازيل تمن للوطا هزازه

وجميع العمايل ذايبه من شومه           وجلودها ادمن من حكيك حجازه

ومركاز الصقوره حط فيه البومه          عليك وقت علاها على مركازه

اللى قبل لا شافت اطيور الحومه     اتخش فى القبوره على الوطا وزازه

 

عليك وقت متعاكس على الرجاله       وكل قلب واخذ من الهموم حماله

دايخين فى اموره او فى مرساله             طابو اطياب ضرايب السنفازه

والباطل وقف هو اللى رقى مكياله         وسلوا الحق سلة ناول النشازه

 

خلى يا دنيا                                اللى قبل كانت هى احدود المنيا

واليوم للفضايح راقده منثنيه                  افلق دلوها ما فيه ما يتعازه

ولاى دين لاهى مله                       ولا عاد واحد ع الصلاح اتدله

عجوز صوقرت فى عقلها مو خلا       عقاب وقتها تمت اللا رهمازه

 

قاربه ساعتها                           واقريب خرير الموت من رقبتها

وياخذ المقريف عرف من قصتها       عشيرة هنا عايش امعاها طازه

وحتى امهدى مو طارب على ميتتها      ما عمر صاداته حذاها عازه

وعلى بوم ويش مريض من عشرتها         ديمه احذاه وبينهم حزازه

 

عليك وقت متعاكس غلب فساره       وكل قلب واخذ م الهموم اعباره

حايس مداره قرنوه ايساره                تخاطن اشواره والمقدر حازه

وايريضن على وجه احصان احماره     وايجى غالبا لزن مع اللزازه

وفيهن ردى يمشى اللا بفناره         وقرعة البيت متكدر وفارغ قازه

متطرش فناره طايحات اكداره         وهو قبل مو كيف القزاز قزازه

 

ويا بو ارويله خرف                  عليك وقت ما بيه العقب يصرف

العارف يورى الناس ما يتعرف          وكثر التعرف للرجال نفازه

اليوم التجار مسيبين الشرف         واما الثنو غالى شور بيه العازه

لا يشتروا من يالا                     ولا ياخذوا شرف او لا الحواله

وان كلا الثنى هابا على مواله          بوابير منه قطعن وادى زازه

 

عليك وقت متعاكس ومكثر هوله         وما نشتكوا منه اللا للمولى

وعارف الثنى ما هى طريقه حوله   تجبايته على وادى ثقال امعازه

ونريدو خبر ميكود بعد اوصوله       جوابين والثالث قطع مدزازه

 

جوابين والثالث رقد فى زرفه         هذاك هو اللى فبه الكلام الطرفه

وعارف نقيز الثنو فوق الجرفه            ماله سياسه من عرب غايازه

وتمن اقلوبه فى عليق الغرفه             وانحازن عليه بحر بعيد تمازه

وبقى اشحمه تدان سمعاه القرفه   وانباع والفلوس حصلن فى الشكمازه

 

عليك وقت متعاكس غلب تفسيره      على كل صايب منقلب تحكيره

من مات اوله رايد الله ابخيره              هاللى توارى قبل لا اتوازه

واحد حدر اوواحد ارقى السريره     وعقاب انقدع نين انفرغ منفازه

واكثرها تكاصى تحت م البنديره    وتم حمل شين ثقيل ع اللى رازه  

 

قال الشيخ هيبه بو ريم فى مدح قبيلته - قبيلة المغاربه - مهنئا ومشيدا بانتصارتهم ضد الحكومة الأيطالية الغازية ومعزيا فى شهدائهم فى معركة  يوم بير بلال الشهير :

 

قصيدة  ( براوه عليكم ) :

 

أول مبادى      بالصلاه ع الهادى       الصلاه ع الرسول تباعد الشيطان

ونزيده كرامه       ربحكم بالقامه        تميتوا  سبايب  هلك  ها   القران

ويحسن عزاكم   صبر فى شهداكم       ويسلط  عليه   الذل   و  الرهبان

خبركم تردد     ف البرور تبدد          زهاة  من  يعدد  بيه  ف الميدان

وبراوه عليكم     ربنا عاطيكم           عمل من ايدكم  موش  قول لسان

كراهب ايكدن    شور هلكم مدن        هيالهن  ايردن  ف أول الرحلان

تمن مسافى      فى عجاجا سافى       تقول غير  فيهن  عندكم  عدوان

وتمن شظايا      غير فى وهطايا      بحضرة  مشايخكم  فلان  فلان

بجاه الحلاله       ومن قرا الرساله    يجعل احسانكم فوق كل احسان

واللى مات يومه   طاح ف اول قومه  مكتب ارسومه  جنة  الضوان

وعيال القبايل     جا ثناهم طايل      ضرابة النعايل فوق  م  البيطان

ركابة السلايل     عز من جا سايل    الحسين  فيهم  عامة  القحطان

ع الضايف ينابى   والتريس مكابى   ماله مزابى ريت  فى  العربان

ولنا عزايل         غير حال الحايل   عليكم ولايل خاطرى  شرهان

سلامى عليكم    جمل باللى فيكم      حقا ع العويل  وكافة  النسوان

سلاما اهواوى    دازه غرباوى     قاعد جلاوى  يذوح  فى  لوطان

 

وقال هيبه بوريم ردا على قصيدة رجب بوحويش (ما بى مرض غير دار العقيله)

 

ما  بك مرض غير عارف اوجاعك   وخبه ذراعك  وقالوا ع السوق قاصر كراعك

ان كان غير مولاك حرج او باعك   ودار لك عديله  اتشيلها  سوى خف واللا ثقيله

وان كان هو رجع فيك ساهل ارجاعك  عليكم جليله  يجيب الفرج بين حطه اوشيله

 

ما بك مرض غير هيضة افكاركك   وهلبة عقارك  وواجدين من نارهم كيف نارك

الا انت فى خير يامن   احزاركك    من قلة اكحيله   تزليع  كبد  تفريغها  بالعزيله

 

ما بك مرض غير فقدة الغايب   وصقرك الطايب   اللى اليوم مدفون تحت النصايب

وهذى مزنه فوق جمل العرايب  الله نشتكيله له   تضعيف دين لاسلام ما يرتضى له

وينوض عون وينوب عنك النايب    ميله بميله     ويجى  قنو  لسلام  زاكى  ابحيله

 

ايجى قنو لاسلام بالحيل زاكى  ويصير الدعاكى  ويبقى الضرب تكميد فوق التكاكى

ويضحك اللى كان م الزور باكى    وتعطن اكحيله     وتوارد بلا شيشمه ع الطويله 

ياسين بوسيف ياسين
yasinabuseif@yahoo.com


الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

Libya: News and Views      LibyaNet.Com      Libyan music       Libya: Our Home