Libya: News and Views      LibyaNet.Com      Libyan music       Libya: Our Home
Libyan Writer Yasin Abousaif Yasin
الكاتب الليبي ياسين أبوسيف ياسين

السبت 4 أبريل 2009

الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

من مشاهير الشعـراء الشعـبيين فى ليبيا (14)

 

ياسين ابوسيف ياسين


لقد انتقيت نحوا من عشرين شاعرا من الشعراء الليبيين الذين كانت قصائدهم ملئ السمع والبصر فى كل الربوع الليبيه من أدناها لأقصاها وهذه  الكوكبة من فطاحل الشعراء فى الشعر الشعبى الليبى تركوا لنا قبل رحيلهم تراثا جميلا خالدا ستذكره  لهم الأجيال القادمة ما بقي للشعر هواة ومريدون. هؤلاء الشعراء القدامى يرحمهم الله تأثروا بمجتمعهم وأثروا فيه  فكانت قصائدهم تاريخا لشعب فى ما خلا من الزمان  وفنا فى حد ذاته ترويه الأجيال جيلا بعد جيل . 

الحلقة الرابعة عشر

 

جبريل الرعـيدى البرعـصي عائلة حسين

 

هو أول من نظم شعرا فى وصف معركة بير ابلال الشهيرة التى انتصر فيها الليبيون على الغزاة الطليان  وكان حاضرا بشخصه فى معركة يوم البريقة التى وقعت بعد يوم واحد من معركة بير ابلال :

 

دراه كبد م الشارف او من العابديه          معاركات يا صالح  بجد  او  نيه

 

جن جرادى                                  من موج البحر لاعند خيط الوادى

صقوره جواعه مرهمات عوادى            جا  اصدافهن  دوار  وان  عشيه

خذينا ذويهم  والصلاه  ع الهادى           حتى ان كان ودرنا اكباش ضحيه

اللى وين ما يلعب ايحوز البادى                ويسلك  اثنيناته   بعين   قويه

 

ظهر فى صوله                              خذن ثويه ناصرهن عليه المولى

اوهلبهن دقيل كراهبه او بغوله                    او هلبوه للعاله اللى حربيه

 

صال او جاهن                            او قيل خاطره هازى على معانهن

القيهن مصابى قادات اوتاهن           كمين مارقى  حصل  على  جوجيه

عساكر على سوق البلا داعاهن             قطعوا   قباطينه   او  بيباصيه

 

جابدات جهدهن                                 اداعن عليه او ربنا ساعدهن

اولا عمر من جاهن خذا مقعدهن           عاصيات ع الباشا او ع الصفيه

يا بال نصرانى ايريد بلدهن                  او خرب مقاعد سيدنا او زويه

 

جانا زاخر                           (الشطرة الثانية من هذا البيت محذوفة)

والشارف الخارف والحذاوى لاخر            عليهم قدح كابى اتقول وليه

وتخشيش العدو للوطن موش مساخر       وهلها فيه ركابه على المعشيه 

 

وقال فى حق السيد بوسيف ياسين خاصة وقبيلة المغاربه عامة :

 

جيته او نا مكسوف فى اقويله            رديت منبسط منه او فاضى البال

بوسيف ف الكرم والجود جابد حيله      بوسيف فيه ماره من اولاد هلال

بوسيف ف العرب مسع القيت مثيله         بوسيف عقدته ما يحلها حلال

بوسيف طير عالى من طيور قتيله     بوسيف راجل من اصلاب ارجال

لا اصحاب الميل يرادعو له ميله        وايشيل اللى فى الوطن ما تنشال

اشراف المناسب هل عناه طويله             وايفكو اللى ساير معاه اقتال

 مبسوط جارهم مبرك عليه الويله           ايمسو عليه او يصبحو بالفال

وان صار المعيط يفزعو لكحيله             وايجوها ع اللى مسبقه بنعال

ايام الشلف يبقن الصيد دليله                  ايشقوا النار او يهتكو الاذال

والصف القديم ينقضوا تاويله             وان جاهم ايجوه براى م العقال

او لا عمرها جازت عليهم حيله        او قصر الزقاطه ويرفضو لاذال

وهل حرب تنبيه الحراب طويله          كسارة الكراهب فى نهار بلال

وهل ناب عايشه فى البساط خويله          ما يسوقها بو فرد بو مروال

عندى عين ما تغفل عليهم ليله             تعامر الضايف فى سنة لكلال

وناكل ونلبس وكل شى نمشيله               وعندى عليهم بهكمه ودلال

لباسة الكاط اللى عجب تنقيله            اللى فى المدينه امحرجه بهلال

وان كان خالطوا ما يخالطو الوذيله       خبيث المناسب ما ايجهم خال

 

وقال أيضا فى حق السيد بوسيف ياسين :

 

الخاطر بعد لولاف بو ميمونه          جميع من ترقى ما لحق جا دونه

صيته عالى                              شهير النقابه اتقول صيت اهلالى

ولا ريت من يطرا بلا لفعالى            ولا الفرس الجيده  كى الحرونه

والجيده تروح للقفهزها تالى            اوتمنع الفارس مو عقاب اتخونه

ورا كل شى عنده هناك امثالى          واصحاب العقول ايفسرو قانونه

حيل النقابه فى كنف الاهالى                اللى قبل كانت سايبه مركونه

ولا كلها تحسب احساب ارجالى        الواجب امغير عذاب فوق النونه

ما يرد ما منهم نهار ابشالى              ولا يخلص الوحده اللى مشيوله

يا موعر الضونه على بدالى                 اتريد ناس بيه كل شى ايهونه

شهير النقابه بو صيتا عالى                     ايدير عاللى عالقين بشونه

من بر كونه للجبل للغابه                      لا ريت كيفه لا هناك زبونه

ايدير عاللى عاتقين غلابه                    حنين قلب يتقى على واشونه

ولا هو م اللى يخدمو بانصابه                هذا شريف الله يكون ابعونه

انعن كما منهل غزير شرابه                 ومنا ايعابى فايضات اركونه

لا نريد نطلا لا انريد اطلابه               لاجواد شورى عندهم فرتونه

نرفع ثناهم كل شى بصوابه              والمولى يحب الشكر فى قانونه

عطانى الله بصبر الدوابه                 ورزقى  عاللى زوق الفكرونه

 

عبد ربه بوبكر احموده

 

هو شقيق الشاعرين عبدالجليل وموسى بوبكر احموده قال فى معركة بير ابلال :

 

جايات ايشقن                            لا  جردن  لا  البعيد  احتقن

وين صادفن عاد فيه ايزقن             خلاط دك بالسنقى اوبالكميه

وعاد ذايحات وبالبحر يتقن           مطاويح فوق التفل م الرسميه

وعاد السوارى بالسيوف يلقن           جزارة مناب امطيبات النيه

 

عيال عصاره                        ركابه على بوعنق سمح مساره

اداعن على سوقا تلاقت ناره            دكم بالمشارب دك بالغدريه

وعاد يفرعوا فيهم كما الجزاره       مناضيد تسطيرة غمار عشيه

اوتموا مثيل الحبل ع الجراره        والنار شايطه فيهم اتقول قليه

وهذا اكفا خالد ارداد بذاره       على اخشومهم عطبك عليهم جيه

 

عطبك عليهم زرقه                   شاطت معاهم نار تمت ترقه

ونحنا اقدم نحنا حماية برقه          مع  صفنا  يابال  فى  الذميه

اصداف قايله لا دغرثه لا سرقه     جابوا  كراهبهم  مع  الثقليه

لا فى السما لقيوا درج لا مرقى   اولا فى الوطا لقيوا بلاد غفيه

قلال العقيده خاطين الطرقه   امغير كسر نالوا ما قضوا مقضيه 

 

ما قضوا لا نوبه                            عطبك عليهم  جيتا  منكوبه

عاد يفرعوا فيهم اتقول جلوبه               ماهو شخير اوكال كاكويه

اولاهو طبيخ اعراك ناس اعروبه    خذوهم على لاسراع سوقه حيه

اطفال يحدروا ع الكور والهلوبه             ما  كبكوا  شقوا  الكبينيه

وعاد المسوع يسلبوا فى ثوبه           وادماغه يفور تحت م الطاقيه

وعاد يرزمن فيها جمال اثلوبه       وعاد يهتكوا فى الدرع بالحربيه

واللى فى الجبين امنزله مكتوبه     ورا الذل غير ارعاب عند الريه

 

الذل راه معاره                           معا صفنا يابال جيش نصاره

ما تخيبوا لظنان يا نغاره                راه الفرج جابى  اقريب  جيه

اللى شهيد فى الجنه امصوقر داره      واللى حى ممحيه عليه السيه

وهذا ف الكتب مكتوب موش ابصاره  بعد الأنبياء ماهو من الجهليه

وتريض فى الروامس غصب ع النكاره    تاكل عفا برقه تبات هنيه

وهلها عصاره للعدو كساره            ما هم  لمايد  كل حد من  فيه

وهم قضا من جاريات انهاره         ولاهم قضا وزان فى العطريه

ركابه عاللى يذوب فى مشواره       ايعيط  كما  دلال  وان  عشيه

مكلوف ف الليالى ما عليه احزاره      مو  بثمن  بقال الكبير ركيه

ركوبة ولد ساكر او صاحب ثاره    ايطيع فارسه لوكان عمره ميه

واللى مشى جالى او ساق انفاره      ما لاحظت غيره احراج وليه

وانكلا المتصرف مع لاداره         ما زودوا فى الالف كوبه طيه

 

ياسين ابوسيف ياسين

yasinabuseif@yahoo.com

 

 


الحلقة الأولى     الحلقة الثانية     الحلقة الثالثة    الحلقة الرابعة    الحلقة الخامسة
الحلقة السادسة   الحلقة السابعة   الحلقة الثامنة   الحلقة التاسعة    الحلقة العاشرة
      الحلقة 11          الحلقة 12        الحلقة 13       الحلقة 14          الحلقة 15
                                   الحلقة 16          الحلقة 17        الحلقة 18       الحلقة 19

Libya: News and Views      LibyaNet.Com      Libyan music       Libya: Our Home