Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Tuesday, 3 April, 2006

الصبر فى أوّله مر

ياسين ابوسيف ياسين

الصبر فى أوله مر              او فى آخره تلقا حلاوه
و الصبر حلو ولو مر           و الصبر للداء امداوا
و الصاحب اللى ساعة الزر    يجفاك ما به اعباوه
كى صحبة الحوت والهر       لا ود بينهم لا جفاوه
الحوت ما ايعيش ف البر       والقط فالبحر ما له مآوى
ولا صاحبك فيه تغتر            أحيان بعد الصداقه عداوه
وان عاديت ما اتزيد فالشر      أوقات بعد الكريها غلاوه
و ما بين لثنين راه سر           وان ذاع منك غباوه
وكلمة الحق ما اتضر             و الصدق فيه النجاوه
والعما موش فقد النظر           ع العين تلفا الغشاوه
والعما موش ف البصر           فقدان البصيره بلاوه
ولا تخاف قل او فقر              ولا من زمان القساوه
ولا تشتكى شدة الحر              ايجيب النسيم الطراوه
والطير فالسما وين يبكر          مهما تعلا تهاوى
والنمر راه ما ايبصر              كان بانت اسنونه تضاوى
وان رافقت رافق الحر            ما تلحقك منه دناوه
والرزق كان لك مقدر              ايجيك قاصدك بالعناوه
والعمر كان تم قاصر              ما اتزيد فيه السطاوه
ويوم ساعتك وين تحتر           لا ينفعك بيع لا اشراوه
خليك ديما الله ذاكر                 يدلك طريق الهداوه.

ياسين بوسيف ياسين
yasinabuseif@yahoo.com


Libya: News and Views      LibyaNet.Com      Libyan music       Libya: Our Home