Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Thursday, 2 November, 2006

ايجدّن عـليه احوال

ياسين ابوسيف ياسين

ايجدن عليه احوال ... العقل وين ما دوبا فهم

أحوال ايجدن         مع كل وادى يسرحن و ايمدن
                        ايعلن الواطى و الشديد ايهدن
                        ايحطن العاقل تحت باط سفيها

أحوال جديده         ايجدن بتنكيده ورا تنكيده
                        ومعاهن اللى يسعى بكل مكيده
                        حال غايته يلقاك حاصل فيها

أحوال تعيبه         ايجيبن معاهن كل يوم عجيبه
                        ايجنك امواجع واعرات صعيبه
                        لا تبوح بيها عيب لا تكميها

أحوال تعيسه         أوقات تخدعك وأوقات تعمل نيسه
                        وان ما افطنت لها تلبسك تلبيسه
                        تسمر امعاها أيام ب الياليها

أحوال فريده         اتطير منام العين ف التهميده
                        اتريد تحسدا حتى احلام سعيده
                        اتفرج عليه انكان يحلم بيها

أحوال عجيبه         فى وقت ما تسمع الا الغريبه
                        وين الخبر يلفا عليك سريبه
                        ايغطن عليه اخبار ياما فيها

أحوال اتعجب        عدو فى قفاك اوكان تقت ايرجب
                        ايقول مرحبا ب اللى علينا حجب
                        او هو من وراك ايزيد غير كريها

أحوال كريهه         أحوال تلحقك لو كان ما تبغيها
                        غصبن عليك اتشوف ب امياميها
                        سوا عاد تاخذها سوا تخليها

أحوال غريبه         ايجدن عليك ابشى ما تدريبه
                        كل يوم طرح وكل يوم مصيبه
                        ايفرج عليك الله هو باريها

أيجدن عليه أحوال ... العقل وين ما دوبا فهم

ياسين بوسيف ياسين
yasinabuseif@yahoo.com


Libya: News and Views      LibyaNet.Com      Libyan music       Libya: Our Home