Libya: News and Views      LibyaNet.Com      Libyan music       Libya: Our Home
Libyan Poet Yasin Abousaif Yasin
الشاعر الليبي ياسين أبوسيف ياسين

Wednesday, 2 May, 2007

ساعات

ياسين ابوسيف ياسين

ساعات يزها خاطرى و ايروق
او ساعات عندي ع الزمان احقوق

او ساعات ننسا
او ساعات نذكـّر او غيري ينسا
و اوقات نسمع من بعيد الهمسا
و أوقات تبّيلك او نين انفوق

مرات فيه ادباره
او مرات حلـّها يصعب على الدباره
او مرات حظ امواتيات أزهاره
او مرات بختى تحت وانا فوق

ساعات مانى طايق
ونغضب على الدنيا وها الخلايق
او ساعات علمي من عملهم ضايق
او فكرى ايموج بعاصفه و ابروق

مرات مانى فاضي
او مرات قاعد بالغصايص راضى
او مرات نبعد عن أشباح الماضي
او نفرح ابطلعت شمس كل شروق

أوقات عقلي فايق
اوصافى معا نفسي او قاعد رايق
او لا انسال ف اللى فعلهم مو لايق
امخللى على الخالق اكفا المخلوق

مرات فيه ملام
اتعدّه على الصاحب او هو يلتام
او مرات تلفا لك أضغاث احلام
بلا معرفه أحسن عليش الشوق

أوقات فيه جواب
و أوقات تسـّكـّر جميع أبواب
وأوقات يبقا كل شي باحساب
تشبح الناطق تعرف المنطوق

ساعات فيه احساس
و ساعات تبنى بالمحبه ساس
و ساعات تشرب م المراره كاس
يهوّن عليك الياس وان ايتوق

مرات فيه مساس
و مرات ما ترضى جميع الناس
ومرات قالوا كان تقطع راس
يبرن امعاه او ييبسن العروق

أوقات فيه دموع
واوقات لعبك غير ف الممنوع
واوقات ما تقدر عليه ارجوع
ولا عاد تفرق لا تفيد افروق

ساعات فيهن جوع
وساعات تصبر تكسب المطلوع
او مالك الى غير الكريم اركوع
ايجيب الفرج واينزله من فوق

أوقات نبقا هايم
في ذكر مولاى العزيز الدايم
كانـّيب يسرع بالمنى و ايلايم
او يبرن بعد قطعة الراس عروق.

ياسين ابوسيف ياسين
yasinabuseif@yahoo.com


Libya: News and Views      LibyaNet.Com      Libyan music       Libya: Our Home