Libya: News and Views      LibyaNet.Com      Libyan music       Libya: Our Home
Libyan Writer Husain Erhouma
الكاتب الليبي حسين ارحومة

الأثنين 13 أبريل 2009

في جنب الكوشه

حسين ارحومة

في جنب الكوشه..في راس الشوكة..على تراب في شارع زنقتنا
على الركّابه والحيطان
خربشنا حروف حكايتنا
تقاسمنا الحلوه والشينه..ولا حد يعادي في الثاني
لعبنا في الشارع وجرينا..وغنينا للوطن اغاني
ووين في زردة صيف مشينا..اشتقنا لنسمة حارتنا
في جنب الكوشه..في راس الشوكه..على تراب في شارع زنقتنا..
..
كنا صغار الوقت معانا..والدنيا لينا مفتوحه
نقسم عالجيران غذانا..عيب يتيم يعيش بروحه
هكّي..علّمنا شيوخ مدينتنا
في جنب الكوشه..في راس الشوكه..على تراب في شارع زنقتنا..
..
وتحت النخلة في جنب الجامع
في ايام المولد والعيد
لعبنا كوره
رسمنا صوره
صنعنا كرّوسه باليد
درنا للسهرات مجالس
خُفنا من غوله وجثامه
وفي الصبح ضحكنا لدنيتنا
في جنب الكوشه..في راس الشوكه..على تراب في شارع زنقتنا
..
وين كبرنا شويه قالو
من الصف الاول تبدوها
قرايه ومدارس وشناطي
حييه عليكم لو ترخوها
تسقط وتعاود من ثاني
والفلقه صارت غولتنا
في جنب الكوشه.. في راس الشوكه..على تراب في شارع زنقتنا
..
طلعنا م الحومه والزنقه..وخشّينا في طريق جديد
كُبرت دنيتنا يا خساره
ورّا ظهره الجار لجاره
وصكّر بيبانه بحديد
وبيدينا حرقنا خبزتنا
في جنب الكوشه..في راس الشوكه..على تراب في شارع زنقتنا
..
اليوم الكوشه صارت عَشره
رفعنا الخشم..نسينا العِشره
كوّشنا نحسابو وصلنا
غسيل الجار ضحكنا لنشره
شبحنا في مرايا كذّابه
وزينّاه عوج رقبتنا
في جنب الكوشه..في راس الشوكه..على تراب في شارع زنقتنا
..
سامحنا يا تراب بلادي
ويا صمعه رفعوك اجدادي
تغيّرنا نحسابو الدنيا
بدلة ومكتب..شهرة وهيبة..وحساب في بنك اتحادي
ويا رُكّابه في راس الشوكه
رديني لأيام زمان
احكيلي حكايات قديمة
وغذّيني حب وعرفان
في جنب الكوشه..في راس الشوكه..على تراب في شارع زنقتنا.

حسين ارحومة التربي
هلسنكي ـ فبراير 2008


Libya: News and Views      LibyaNet.Com      Libyan music       Libya: Our Home