Libya: News and Views      LibyaNet.Com      Libyan music       Libya: Our Home
Libyan writer Essa Abdel-Qayoum


Essa Abdelqayoum

Saturday, 19 August, 2006

       
       

خمسه حكاوي(*)

عـيسى عـبدالقيوم


قصص قصيرة جداً.. مهداة الى رواد "المقهي الثقافي"(**)

المجموعة الثانية

1. عـناوين الغـد

الأول : وين تسكن توه ؟! .
الثاني : شفت مكان النهر الصناعي مش داروه مصنع بلوك .. نسكن فرابع زنقة ع اليمين ! .
الثاني : وأنت وين جت طبتك ؟! .
الأول : مش بحيرة 23 يوليو نشفت .. حصّلت فيها قطعه 200 ميترو قاعد نبني فيها ! .

2. تشابه مواقف

ـ اتفيه عليه .. مش كان طول النهار يبقبق .. ليش سكت توه ! .
* بشواش عليه يا راجل .. باهي اللي داير عزم ويدوي ! .
ـ رخاني فوقت الشدة يارا .
* معليش بعذره .
ـ خسارة لو كان ما هو " سوني " وملوّن ! .

3. الصراحة راحة

الأول : حصلت نصيبك من الثروة ؟! .
الثاني : لا والله .. شنو أنت حصلته ؟! .
الأول : لا ! .
الثاني : باهي ليش تنشد ؟! .
الأول : غير قلت بالك حصلته انت بيش نحسدك !.

4. شفافية

ـ شنو رايك فالهني ! .
* باهي لو كان ينحّو منا الواحد ! .
ـ هكي ! .
* إينعم ! .

5. تعـددية

ـ أنت معارض .. وإلا معارض ؟! .
ــ لا .. أنا معارض .
ـ آآه .. غير أحسبتك معارض بس ! .

والسلام

عـيسى عـبدالقيوم
________________________

 (*) "خمسه" : لفظ ليبي دارج يعني خمس دقائق مستقطعة .
(**) سقط سهوا الاشارة الى أن الصور منقولة عن ألبوم موقع " عين ليبيا " العائد الى الشبكة بتألق وحيوية .
      ألبوم صور المقهي الثقافي ببنغازي تجده تحت هذا الرابط :
      http://www.libyaeye.net/culter%20negative/coffe.htm


       
       

Libya: News and Views      LibyaNet.Com      Libyan music       Libya: Our Home