Libya: News and Views      LibyaNet.Com      Libyan music       Libya: Our Home
Libyan writer Essa Abdel-Qayoum


Essa Abdelqayoum

Thursday, 21 June, 2007

       
       

خمسه حكاوي(*)

عـيسى عـبدالقيوم

المجموعة الرابعـة

1. صاحب حرفتين مفقود

الوليه : العيّل يبي كندرة كوره .. والبنت تبي بلوزه للمدرسة .
الراجل : وأنتي شن تبّي ! .
الوليه : أنا نبّي نسخة من عقد زواجنا !.
الراجل : ليش .. ياك لا حر لا شر .
الوليه : لا .. بس نبّي نتأكد أنه مفيهش تاريخ إنتهاء صلاحية !.

2. تدفق المعلومات

* تعرف شنو معنى المُجنـّب ؟! .
ــ صدقني والله سامع بيه ! .

3. كان ياما كان

الأول : العرب لوّله تقول راقد الريح يلقى العظم فـ الريّه !! .
الثاني : الله .. الله .. خطـّرت عليا أيام كان راقد الريح يأكل فالريّه ! .

4. غناوة الموسم

ـ أمس كتبت أول قصيدة ليا .
* مبارك .. مبارك .. سمعنا مطلعها .
ـ أوكي .. مطلعها يا سيدي يقول :
واح .. واح .. واح..
هضاك النجع طاح..
فغطيسة إصــلاح .
* وقف .. وقف .. أبصر وين سامعها هالغناوة .

5. الشي بالشي يُذكر

ـ تعرف أحسن حاجه فى الصيف شنو ؟! .
* شنو ؟! .
ـ الشرموله ! .
* خطرها ع الشرموله .. شنو صاير فالحزب أمتاعكم !.

والسلام

عـيسى عـبدالقيوم
http://essak.maktoobblog.com
________________________

 (*) "خمسه" : تشير الى عدد الحكايات .. وفى ذات الوقت هي لفظ ليبي دارج يعني خمسة دقائق وقت مستقطع .


       
       

Libya: News and Views      LibyaNet.Com      Libyan music       Libya: Our Home