Libya: News and Views      LibyaNet.Com      Libyan music       Libya: Our Home
Libyan writer Essa Abdel-Qayoum


Essa Abdelqayoum

Saturday, 19 August, 2006

       
       

خمسه حكاوي(*)

عـيسى عـبدالقيوم


قصص قصيرة جداً.. مهداة الى رواد "المقهي الثقافي"

المجموعة الأولى

1. ألعـاب شاطئية

تلاقو على شط البحر .. فى بلاد الله الواسعه .
هو : من وين أنتي ؟! .
هي : أنا من ليبيا .. وأنت ؟! .
هو : حتى أنا من ليبيا .. أتجي نبنوا قصر مالرمله ؟! .
كشـّخت فى وجهه وقالت : قصر بس ؟! .. ليش ما نبنو " إقتصاد سوق "..
وإلا نقولك خلينا نبنوا " إصلاح سياسي " بالمرة .. الرمله واجده .. والجو كساد ! .

2. المهم حوار

ـ أسكت .. مش أمي طلعت حامل ؟! .
ـــ والله أمك هذي ما تحشـّم .. حامل فى رمضان ؟! .
ـ صدقت .. نلقنه أمس أخر يوم فى شعبان .
ـــ وبوك شنو رايه ؟! .
ـ باتي يخلص ع التاريخ الفرنجي ؟! .
ـــ ايوه .. نعرفهم هضوم اللي مرتباتهم 160 .. ويعطلوا بالجمعه .

3. مجتمع مدني

ـ يا صاحب الجمعيه .. نبي طماطم حكيه.. وكمون حوت .. ومكرونة قراجيط .. وصابون سوسي .. وكوتي نفه .. ومشطه ضيقه .. وحريرة كلوب .. وطشة فول مدشش.. ومستكة ماجاره للعيال .
ـــ يا أخينا نحن راهو جمعية حقوق إنسان !! .
ـ حقوق شنو ؟! .. نسمعوا ونسلموا ..
يا خويا نحن ناس شعبيين ما نكلوش فالوكال الجاهز.. باهي ماعندكمش لنا " فليـت " ! .

4. غـرام الليبو

ـ شنو مقدار حبك ليا يا فايزه ؟! .
ـــ متحشمه يا رجب ! .
ـ وراسي عندك تقولي ؟! .
ـــ نحبك على قـّد الطريق الساحلي ! .
تذكر رجب طول الطريق الساحلي فضحك ..
وتذكر عدد مطباته فشك فى نية فايزه .

5. شفرة محلية

الطبيب : انتي شنو فيه يحس هاجه ! .
الحاجه : أنا نحس فى أعظامي نار وحطب.. وظهري سحابات سحابات.. وعيوني يشرّقن ويغرّبن ..
وعقلي قعد يشيل ويجيب .
نظر الطبيب الهندي الى المترجم الصامت .. فإنهار المترجم وقال للطبيب :
اعترف لك بسر ..أنا عائد من المهجر ! .

والسلام

عـيسى عـبدالقيوم
________________________

 (*) "خمسه" : لفظ ليبي دارج يعني خمس دقائق مستقطعة .


       
       

Libya: News and Views      LibyaNet.Com      Libyan music       Libya: Our Home