Libya: News and Views      LibyaNet.Com      Libyan music       Libya: Our Home
Libyan Writer Salim el-Ragi


Salim Naser al-Ragi

Saturday, 21 July, 2007

خساره يا عـمر المختار

سليم نصر الرقعـي

إضغط هنا للأستماع

خساره يا عمر المختار
كلاب كبار
كلوا وطنك خلوه دمار
خساره يا عمر المختار

خساره والمخسور كبير
العقل يحير
في اللي ساير من تدمير
الوطن اللي بادي بتعمير
اليوم إنهار
بعد ماقلنا آهو صار ؟

خساره
خساره يا عمر المختار

خسارة والمخسور إنسان
كان زمان
هو لول قبل البنيان
اليوم إنهان
بقي محتار
في وطنه طايح الأقدار

خساره
خساره يا عمر المختار

خساره والمخسور أمجاد
تريخ بلاد
كتبوه بدم الجهاد
رجال عصارى من الأجداد
حديد ونار
يصلن ضد الإستعمار
اليوم ابعاد
حكمنا الضيم والإستعباد
بومنيار
خذانا غيله في ألفجار
خساره

خساره والمخسور أخلاق
الأب إنعاق
واليوم الفوقي سراق
والشناق
والمنافق والبندار
كلاتنا نار
والجار يودر في الجار

خساره
خساره يا عمر المختار

خسارة وراهو الواسع ضاق
الحر إنساق
بقينا في هالــوطن ارقاق
المر إنذاق
ذل وعار
والشعب يعاني منهار
خساره

خساره والمخسور كبير
العقل يحير
في اللي ساير من تدمير
الوطن اللي بادي بتعمير
اليوم إنهار
بعد ماقلنا آهو صار ؟

خساره يا عمر المختار
كلاب كبار
كلوا وطنك خلوه دمار
خساره يا عمر المختار

سليم نصر الرقعي
كاتب ليبي يكتب من المنفى الإضطراري
elragihe2007@yahoo.co.uk

إضغط هنا للأستماع

Libya: News and Views      LibyaNet.Com      Libyan music       Libya: Our Home