Libya: News and Views      LibyaNet.Com      Libyan music       Libya: Our Home
Libyan Writer Khairi Aboushagur
الكاتب الليبي خيري أبوشاقور


خيري أبوشاقور

الاثنين 10 مايو 2010

تعليق على محاضرة الدكتور عارف النايض

خيري أبوشاقور

لقد قمت بكتابة التعليق التالي على المحاضرة التي ألقاها الدكتور عارف النايض ولخصها هشام الشلوي ونشرها الأستاذ أحمد الفيتوري في مدونته سريب، رأيت أن أنقلها هنا لتعم الفائدة. وهذا الرابط لما نشر على مدونة سريب: http://afaitouri.maktoobblog.com/1625083/هشام-الشلوي

عارف النايض في رده على سؤال السيد سالم هابيل حول ما إذا كان القرآن كلام الله أعلاه قال: “هذا الكلام من الكفر البواح والعياذ بالله، وقال بعض الأئمة الأعلام يُستتاب منه، وقال آخرون لا يُستتاب منه”.

يعني شنو قصدك يستتاب؟! وكان ماتابش كيف ما تبو شنو بتديروله؟ تقطعوله راسه!!

كان عليك يا دكتور أن تفند هذه الأقوال الي استدليت بيها ومثيلاتها التي كانت السبب الرئيسي في تخلف العرب والمسلمين وأن تدافع عن حرية الرأي والتفكير والتعبير، إلي لولاها لما تمكنت أنت ولا غيرك من تلقي العلوم الراقية ولا التعمق في تاريخ الفلسفة ورواده في جامعات الغرب الليبرالي الحر.

إذا كانت هادي هي آراؤك، أنا أتأسف على هذا العلم الي حامله في راسك والبزنس الكبير الي دايره مع مجموعة “مشوقة” من الشركات العالمية. أسأل الشركات الي تتعامل معاها زعما هل وصلت إلى ماوصلت إليه بمثل أفكارك هذه ؟! وشنو رايك توا نبعتولهم ونوروهم حقيقة أفكارك باش يعرفوا مع شكون قاعدين يتعاملوا؟!

وبعدين كيف حصلت على التوكيلات التجارية الكبيرة هادي في ليبيا الي معروف في بلادنا كان ماتكونش واحد من الجماعة الي مرتبطين بالسلطة مباشرة والله ماتشوف منها حاجة! أقل شي لازم تكون متورط الى ودانك في الرشوة. بالكشي توا تقدر إطلعلي فتوة من فلسفة “الهيرمونطيقا” تقول أن الرشوة حلال يا فيلسوف زمانك!!

وأخيرا نبي نسأل سؤال: علاش في مؤتمر جامعة برنستون مع المسيحيين واليهود طالع أمرد ومن غير لحية وفي المؤتمرات الإسلامية تظهر بلحية إسلامية منمقة (على غرار لحية عاشور الشامس)؟! شنو العامل المشترك وشنو سبب النفاق هذا زعما؟!

(أما انتي يا “ليبيا اليوم” فطز فيك وفي حرية التعبير والصحافة الي تتشدقي بيها. طبعا حتقوليلي طز فيك انت ومن تكون وانت مش حاجة كبيرة باش نديرولك قيمة. معليش هذا الكلام قالوه هلبة غيرك، ومع ذلك طزين فيك في كل الاحوال).

خيري أبوشاقور


Libya: News and Views      LibyaNet.Com      Libyan music       Libya: Our Home