Libya: News and Views      LibyaNet.Com      Libyan music       Libya: Our Home
Libyan Writer Ahmed al-Houti
الكاتب الليبي أحمد الحوتي


أحمد الحوتي

الخميس 30 يوليو 2009

طال العـزيز اغـيابه

أحمد الحوتي

طال العزيز اغيابه .. رجيناه واجد والرّجا ماجابه .. علينا بطا

بطا ماجاني .. نظيف العضا مولى القرون مثاني
حامل بلاه وكي خطر بكاني .. مانسيتشي صوبه كحيل هدابه
حتى عند نوم الناس ماهناني .. انوض بالغطا وقتا منامي جابه

غابت علي اخباره .. لواي بواطراف حرير فوق ازراره
اللي وين مانبرّم اوهام دياره .. اتجي م المواقي دمعتي سكابه
مابت امعانا يوم تبرد ناره .. حتى وهو بعيد ايطولني منشابه

وغاب علينا .. عزيز قبل يالانا وبين ايدينا
ووين ماتباعدنا انسي طارينا .. سحب دفاتره صفى معاي حسابه
ياريت كافيته بفعله فينا .. وارتاح خاطري منه ومن شخشابه

وطال اريافي .. تباعد علينا بوقرون مسافي
لباس المقصب فوق م الكتافي .. دنداش الحزام معا اطراف اجنابه
بيني وبينه وطن شين وجافي .. ماهناك لا والي يطيق عذابه
كان اجدبت يبقى عجاج وسافي .. حتى خبير الوطن فيه يهابه

بطا مرسالي .. لاعلم منه لاجواب لفالي
اللي قبل ع الخاطر عزيز وغالي .. ينسى غلاي اليوم مانحسابه
نظيف الخواصر بونياب مجالي .. حيّر دليل العقل زاد عذابه
وجابه معا تيار موجه عالي .. ارماه وسط ديموم الغريق وسابه

طال العزيز اغيابه .. رجيناه واجد والرّجا ماجابه .. علينا بطا

وسلمتوا .

مع تحياتي
احمد الحوتي
ahmed_alhuoty@yahoo.com


Libya: News and Views      LibyaNet.Com      Libyan music       Libya: Our Home