Libya: News and Views      LibyaNet.Com      Libyan music       Libya: Our Home
Libyan Writer Ahmed al-Houti
الكاتب الليبي أحمد الحوتي


أحمد الحوتي

الثلاثاء 30 يونيو 2009

قصيدة "حواء"

أحمد الحوتي

ابتدأها الشاعر عبد الرحمن بو مغّيب وقال :

مهناكشي مشكل إلا من حوّا .. سواء كان في ما فات ولا توّا

عندي عليهن غنه .. وكانن أسباب خروجنا م الجنه
صويحبات يوسف هن اللي حبسنه .. سنين في زنازن مصر حاصل جوا
وحصحص الحق وهن اللي خرجنه .. كفاه شركن وانتن خذيتن سوّا

وقد عرض الشاعر عبد الرحمن بو مغيب تلك الأبيات على الشاعر الكبير عقوب الشرمي فقال :

راحت علينا ليل لولا حوا .. لا كان بيت ولا طعام اسوا

فيهن عيوب كبار ولهن عوزه .. سبحان من خلق ف الكون زوج وزوجه
وتلقى الشايب كي تغيب عجوزه .. يشين منظره تقلب معاه الدوه
وتلقاه متخوخم ولاوي بوزه .. كيف المريض اللي معاه حموه

الهن تمييله .. وديما يجي منهن خراب العيلة
عوج ضلعهن تحتار في تمييله* .. أصحاب كيد كي كيد العدو لعدوا
إن تبعتهن يومك أسود من ليله .. وإن خالفتهن شعشع نهارك ضوا
سود نياهن .. لا خير فيهن لا حياه بلاهن

ودامينك قادر تعيش معاهن .. وتهون وينما تبقى قليل مروا
لا تنشغل بيهن ولا تنساهن .. عبرهن إلا ما عون فيه فروا
ان عاشرتهن لازم يبان خياهن .. كيمن بناله بيت تحته هوا

ولا تقول غلابه .. كم نجع عامر هن أسباب خرابه
كي مشير تلقاهن لهن نقلابه .. حتى إن روقّن لازم يديرن نوا
اللي يريد راحتهن يبيع أصحابه .. قديم كيدهن حتى مع النبوه

ومن ثم التقيت بالشاعرين وقمت بتسجيل تلك الابيات منهم فجادت قريحتي بهذة الابيات عساها تنال رضاكم واستحسانكم وما انا الانقطة في بحر هؤلاء الشعراء الفحول ادامهم الله ذخرا لنا ورحم الله المتوفى واطال الله في عمر الحي وامتعه بالصحة والعافية وقلت :

يا بومغيّب شكوت من حوا .. وهي نارها شاطت معايا جوا

اتقول هن كادنا .. يوسف نبي الله ما رحمنا
لولا خزر فيهن وهن راعنا .. ماقطعت ثوبه وخشت جوا

فيهن اوحود عصارا .. حمالات كيف هاجر اللي صبارا
وين ماحكم ربي الكريم اقدارا .. طاعة لامره وماشكت م الهوا
ووين ماجنين الكبد زاد امرارا .. عليه هرولت شور الصفا بالقوا
وفيهن مراة ايوب واخرى سارا .. بلاه ربنا مسا بدود اشوا
باعت شعرها غصب موش تجارا .. اللي قبل تفخربه غثيث املوا

وفيهن اللي حماله .. موال اسيا يشفع لجيل بحاله
حطلها اللوح وبالحديد لوالا .. اقعدت صابره نين التراب تروا
ربك بعث جبريل جاب رساله .. انظرت قصرها في العرش نورا ضوا

وفيهن اعزاز عليا .. لانسيتن لاعاد انسيت الغيه
يابومغيّب كان تنشد فيا .. قديم جرحهن في الكبد دار افروا

يا بومغيّب شكوت من حوا .. وهي نارها شاطت معايا جوا

مع تحياتي
الباحث احمد الحوتي
ahmed_alhuoty@yahoo.com
________________________________________________

*هذه الشطرة قام الشاعر عبدالكريم موسى بوجديّدة باضافتها بدل هذه الشطرة (منعولات هن وابليس مية نعيله) لأن اللعنة لا تجوز وقد عرضت هذا التعديل على الشاعر الكبير عقوب الشرمي ووافق عليه واثنى على الشاعر بوجديدة فجزاه الله خير الجزاء.


Libya: News and Views      LibyaNet.Com      Libyan music       Libya: Our Home