Libya: News and Views      LibyaNet.Com      Libyan music       Libya: Our Home
Libyan Writer Ahmed Milad al-Houti
الكاتب الليبي أحمد ميلاد الحوتي


أحمد الحوتي

السبت 14 نوفمبر 2009

العين سامره

وبعض الردود عليها

أحمد ميلاد الحوتي

قلت :

مغير سامره ما با النوم ايجيها.. العين حايسه صوبا خطر غاليها
دمعها قجاج .. اتريد تنعما وانا الها محتاج
وانشافت عزيز ايكون هو العلاج .. ويروق حالها واترد كي ماضيها
يامن غفرت الذنب للحجاج .. ان تهدي العين اللي وحلنا فيها
العين ضاله خلّت الخاطر ماج .. تبكي عللي من زمان انسيها
عارف شقاها ما يجيب انتاج .. وما تنال منه غير ما يعميها
مابت اتغفي ساعه .. عليها خطر هللي نظيف اذراعه
تبكي عليه وصايفه ملتاعه .. بعد عزيز مالقيّت اللي داويها
اتريد العزيز اللي اسماح اطباعه .. وماعاد ظني كيف قبل ايجيها
ان جابت سريب اللي صعيب وداعه .. ايضيق علمها تغّلب اللي ناهيها
خطر ماضيه .. ومي عارفه تنسى قديم الغيه
العين كيف ننهها اتحوس عليا .. اتريد من ايشيل الصوت ويعزيها
وين ماحذاها يجبدوا طاريه .. ايسيلن ادموع العين من ماقيها
مغير سامره ما با النوم ايجيها .. العين حايسه صوبا خطر غاليها

وسلمتوا

اخوكم احمد ميلاد الحوتي

* * *

و ردّ الاخ الشاعر سيف الاسلام عقوب وقال :

مغير سامره ما با النوم ايجيها .. العين حايسه صوبا خطر غاليها
سـامـره وفــي عـــازه ..من غيبته بو عين كي القـزازه
تبكي عليها تقول غير جنـازه ..وفيها الميت حد مـن ولديهـا
فيها انصبر غير خوذي إجـازه ..عالله بكره تجيـك وتشوفيهـا
عصّت معايه ليـش هاللبّـازه ..عيني وسالت ويـش بيهديهـا
يا لنظر جفت والا علي منحازه ..وجاء دونها النقار مو راخيهـا
مغير سامره ما با النوم ايجيه..االعين حايسه صوبا خطر غاليها

* * *

و ردّ الاخ ناصر الفرجاني وقال :

خـطـر خطرهــا..عزيز غيبته ع العين هاض بحرهـا
صعبت عليّـا قلـت بنصّبرهـا..اللّي البعد زايدهـا علـي مابيها
القيت واخذة منّي علـي خاطرهـا .. تحسابنـي مانيـش سايـل فيها
وتحسابني ع الصبـر بنجبرهـا..ليـن تتركـه مدعـاه وانقسّيها
ونـا هـذي مستحيل مانقدرهـا..ولاي واردة عـنـدي ولا نبّيـها
المفروض كل ليلة واجبي نسمرها..واقـف امعاها مانجيـش عليهـا
عينـي امعـاي ولّي ماننكرها..ولو كان تسمر عمـرمانرخيهـا
ولا نلومهـا عالدمـع لا ننهرهـا..امخلّي العيـن اتديـرمايرضيها
علي شانها وشانه اللّـي قاهرهـا..نبكي امعاها دمّ وانبكّيها

* * *

و ردّ الاخ الشاعرالمهدي بشير وقال :

ما بت النوم اطيقه.. ولابت تحّود ع ا لغلا وطريقه
ولابت اتهّمد ع الوساد دقيقة.. وين ما خطر صوبه اللى عاميها
وعدت اتقالب فى امواج غريقه ..وجبتها على الاوهام مسخة فيها
حتى وكل سيقه ظاهره من سيقه .. ابرّحت وين ما قطع اقدم لوايها


Libya: News and Views      LibyaNet.Com      Libyan music       Libya: Our Home